લોસ એન્જલસમાં દિવાળી અને હનુક્કાહની ઉજવણી: ભારતીય-યહૂદી સમુદાયો એક મંચ પર આવ્યા

Diwali Hanukkah | લોસ એન્જલસમાં ભારત અને યહૂદી સમુદાયો વચ્ચે ધાર્મિક સૌહાર્દ અને મિત્રતાનો સંદેશ આપતી દિવાળી અને હનુક્કાહની ભવ્ય ઉજવણીનું આયોજન કરવામાં આવ્યું હતું.

લોસ એન્જલસ સ્થિત ભારતીય કોન્સ્યુલેટ જનરલ દ્વારા અમેરિકન જ્યૂઇશ કમિટી (એજેસી) લોસ એન્જલસ, સ્માર્ટ વિલેજ મૂવમેન્ટ, સિનાઈ ટેમ્પલ, ફ્લેશ ફેમિલી સિનાઈ ટેમ્પલ ઇઝરાયેલ સેન્ટર અને હિન્દુ જ્યૂઇશ કોએલિશન ઓફ અમેરિકા સાથે મળીને સિનાઈ ટેમ્પલ ખાતે આ કાર્યક્રમ યોજાયો હતો. આ ઉજવણીમાં ભારતીય અને યહૂદી સમુદાયના લોકો મોટી સંખ્યામાં જોડાયા હતા.

કોન્સલ જનરલ શ્રીનિવાસ કેજે સાથે કોંગ્રેસવુમન સિડની કમલાગર-ડોવ, અશોક અમૃતરાજ, મેયર શેરોના નઝારિયન, વાઇસ મેયર જેમ્સ માઈ, આસામ શેખ અને પ્રો ટેમ મેયર ડૉ. પ્રિયા ભટ-પટેલ સહિતના મહાનુભાવો ઉપસ્થિત રહ્યા હતા. આ ઉપરાંત રાજદ્વારીઓ, વિવિધ ધર્મોના આગેવાનો તેમજ ભારતીય-અમેરિકન અને યહૂદી-અમેરિકન સમુદાયના પ્રતિનિધિઓએ પણ ભાગ લીધો હતો.

કાર્યક્રમમાં આંતરધર્મીય પ્રાર્થનાઓ, દીવાઓ અને હનુક્કાહની મીણબત્તીઓ પ્રગટાવવાની વિધિ યોજાઈ હતી. સાંસ્કૃતિક કાર્યક્રમમાં ભરતનાટ્યમ, ભાંગડા, યહૂદી સંગીત અને અન્ય સંગીતમય પ્રસ્તુતિઓએ ઉજવણીને વિશેષ બનાવી હતી. આ કાર્યક્રમ દ્વારા બંને સમુદાયો વચ્ચે વિશ્વાસ, એકતા અને મિત્રતાની ભાવનાને ઉજાગર કરવામાં આવી હતી.