US Midterm Elections: ભારતીય મૂળના પિયા ડાંડિયાએ ફ્લોરિડામાં મરીન વેટરનને હરાવી કોંગ્રેસની બેઠક જીતી

Pia Dandiya | અમેરિકામાં યોજાયેલી 2026ની મધ્યસત્ર ચૂંટણીમાં ભારતીય મૂળના ઉમેદવારોએ નોંધપાત્ર સફળતા મેળવી છે. ફ્લોરિડાની 22મી કોંગ્રેસનલ બેઠક પરથી ડેમોક્રેટિક પાર્ટીનાં ઉમેદવાર પિયા દાંડિયાએ રિપબ્લિકન ઉમેદવાર અને મરીન કોર્પ્સના પૂર્વ સૈનિક કેસી અસ્કરને હરાવીને જીત નોંધાવી છે. આ જીત સાથે પિયા દાંડિયા અમેરિકાની પ્રતિનિધિ સભામાં પહોંચનાર ભારતીય મૂળનાં વધુ એક મહિલા નેતા બન્યાં છે.

ચૂંટણીના જાહેર થયેલા પરિણામો અનુસાર, પિયા દાંડિયાને 51.9 ટકા મત મળ્યા હતા. તેમણે ફ્લોરિડાના નવા સીમાંકન બાદ રચાયેલી 22મી કોંગ્રેસનલ બેઠક પર વિજય મેળવ્યો છે. આ બેઠક અગાઉના સીમાંકનથી અલગ હોવાથી ચૂંટણીમાં બંને પક્ષો વચ્ચે રસાકસી જોવા મળી હતી.

પિયા દાંડિયાનો જન્મ અને ઉછેર ફ્લોરિડાના પામ બીચ કાઉન્ટીમાં થયો હતો. તેમનાં માતા-પિતા ભારતમાંથી અમેરિકા સ્થાયી થયાં હતાં. તેઓ અગાઉ શિક્ષિકા તરીકે કાર્યરત હતાં અને ત્યારબાદ હાર્લેમમાં હાઈસ્કૂલનાં આચાર્ય તરીકે પણ સેવા આપી હતી. તેમણે વ્હાઇટ હાઉસ ફેલો તરીકે કામ કર્યું હતું અને એપલ કંપની સાથે પણ જોડાયેલાં રહ્યાં હતાં.

શિક્ષણ ક્ષેત્રે તેમના યોગદાનને પણ વિશેષ મહત્વ આપવામાં આવે છે. તેમણે ઓછી આવક ધરાવતા પરિવારોનાં બાળકોને શિક્ષણ અને આર્થિક સ્વતંત્રતાની તક મળે તેવા હેતુથી હાઈસ્કૂલની સ્થાપના કરી હતી. તેમના અભિયાનમાં શિક્ષણ, જીવનનિર્વાહનો ખર્ચ ઘટાડવો અને આર્થિક તકો ઊભી કરવી મુખ્ય મુદ્દા રહ્યા હતા.

તેમના પ્રતિસ્પર્ધી કેસી અસ્કર નેપલ્સના વેપારી છે અને મરીન કોર્પ્સના પૂર્વ સૈનિક રહી ચૂક્યા છે. તેમણે રાષ્ટ્રપતિ ડોનાલ્ડ ટ્રમ્પની નીતિઓને સમર્થન આપ્યું હતું.

પિયા દાંડિયાની જીતથી અમેરિકાની રાજનીતિમાં ભારતીય મૂળના લોકોનું પ્રતિનિધિત્વ વધુ મજબૂત બન્યું છે. 2026ની મધ્યસત્ર ચૂંટણીમાં ભારતીય મૂળના અન્ય નેતાઓએ પણ સફળતા મેળવી છે. વર્જિનિયાથી સુહાસ સુબ્રમણ્યમ ફરી ચૂંટાયા છે, જ્યારે મેરીલેન્ડનાં લેફ્ટનન્ટ ગવર્નર અરુણા મિલરે પણ વધુ એક કાર્યકાળ મેળવ્યો છે.

પિયા દાંડિયા જાન્યુઆરીમાં નવી કોંગ્રેસની શરૂઆત સાથે ફ્લોરિડાની 22મી બેઠકનું પ્રતિનિધિત્વ સંભાળશે.