કેલિફોર્નિયાના યુબા સિટીમાં સિખ પરેડ દરમિયાન ગોળીબાર અને છરાબાજી: બે ઈજાગ્રસ્ત, આરોપીની અટકાયત

Sikh Parade Violence | અમેરિકાના કેલિફોર્નિયા રાજ્યના સટર કાઉન્ટીમાં યોજાયેલી 47મી વાર્ષિક શીખ પરેડ અને મહોત્સવ દરમિયાન ગોળીબાર તથા છરીથી હુમલાની બે અલગ-અલગ ઘટનાઓ સામે આવતાં ચકચાર મચી છે. સટર કાઉન્ટી શેરિફ કાર્યાલય દ્વારા બંને બનાવોની તપાસ હાથ ધરવામાં આવી છે. જોકે, બંને ઘટનાઓ વચ્ચે કોઈ સંબંધ છે કે નહીં તે અંગે હજુ સ્પષ્ટતા કરવામાં આવી નથી.

મળતી માહિતી અનુસાર, શનિવારે રાત્રે આશરે 11:10 વાગ્યે યુબા સિટીના ટિએરા બુએના રોડ પર આવેલા શીખ મંદિરની સામેના પાર્કિંગ વિસ્તારમાં ગોળીબાર થયાની જાણ પોલીસને કરવામાં આવી હતી.

પોલીસ કર્મચારીઓએ સ્થળ પર પહોંચીને તપાસ શરૂ કરી હતી. આ ઘટનામાં કોઈને ગોળી વાગી નહોતી અને કોઈ જાનહાનિ થઈ નહોતી. તપાસ દરમિયાન એક શંકાસ્પદ વ્યક્તિની ઓળખ થઈ હોવાનું શેરિફ કાર્યાલયે જણાવ્યું છે. હાલમાં તપાસકર્તાઓ પુરાવા એકત્રિત કરી વધુ કડીઓ મેળવી રહ્યા છે.

બીજી ઘટના રવિવારે શીખ પરેડ પૂર્ણ થવાના સમયગાળા દરમિયાન બની હતી. પરેડનો છેલ્લો ઝાંખી રથ લોકો વચ્ચેથી પસાર થઈ રહ્યો હતો ત્યારે છરીથી હુમલાની ઘટના બની હોવાનું જણાવાયું છે. આ બનાવમાં 2 લોકો ઘાયલ થયા હતા, જેમને સારવાર માટે સ્થાનિક હોસ્પિટલમાં ખસેડવામાં આવ્યા હતા.

આ કેસમાં સેક્રામેન્ટોના 28 વર્ષીય દવિન્દર સિંહની ધરપકડ કરવામાં આવી છે. તેની સામે ગુનાહિત કાવતરું, ગંભીર શારીરિક ઈજા પહોંચાડવી, ઘાતક હથિયારથી હુમલો અને હત્યાનો પ્રયાસ સહિતના આરોપો હેઠળ કાર્યવાહી કરવામાં આવી છે. આરોપીને સટર કાઉન્ટી જેલમાં રાખવામાં આવ્યો છે.

હુમલામાં ઘાયલ થયેલી બીજી વ્યક્તિની સ્થિતિ સ્થિર હોવાનું અને યુસી ડેવિસ મેડિકલ સેન્ટરમાં સારવાર ચાલી રહી હોવાનું અધિકારીઓએ જણાવ્યું છે.

સટર કાઉન્ટી શેરિફ કાર્યાલયના જણાવ્યા અનુસાર, બંને બનાવોની તપાસ ચાલુ છે. તપાસકર્તાઓ શીખ મંદિરના આગેવાનો સાથે મળીને આ ઘટનાઓમાં સંડોવાયેલા અન્ય સંભવિત લોકોની ઓળખ અને શોધખોળ કરી રહ્યા છે. અધિકારીઓએ બુધવારે વધુ વિગતો જાહેર કરવાની યોજના હોવાનું જણાવ્યું છે.

શેરિફ કાર્યાલયે જણાવ્યું હતું કે આ બંને ઘટનાઓને ગંભીરતાથી લેવામાં આવી રહી છે અને સટર કાઉન્ટીના નાગરિકો તેમજ મુલાકાતીઓની સુરક્ષા સુનિશ્ચિત કરવા તંત્ર પ્રતિબદ્ધ છે.