અમેરિકામાં સ્કાયડાઇવિંગ દરમિયાન અકસ્માતમાં ભારતીય યુવાનનું મોત

Skydiving Accident | અમેરિકાના મેસેચ્યુસેટ્સ રાજ્યમાં એક અત્યંત દુઃખદ અકસ્માત સામે આવ્યો છે. અહીં સ્કાયડાઇવિંગ (Skydiving) કરતી વખતે લેન્ડિંગ દરમિયાન અચાનક પવનનો જોરદાર ઝાપટો આવતા પેરાશૂટનું સંતુલન બગડ્યું હતું, જેના કારણે 28 વર્ષીય ભારતીય મૂળના યુવાનનું કરૂણ મોત નીપજ્યું છે. સત્તાવાળાઓના જણાવ્યા અનુસાર આ દર્દનાક ઘટના 12 જુલાઈના રોજ રવિવારે બપોરે બની હતી.

મણિ ચંદ્ર તેજા ગદ્દામ (Mani Chandra Teja Gaddam) મેસેચ્યુસેટ્સના ઓરેન્જમાં આવેલા ‘જમ્પટાઉન સ્કાયડાઇવિંગ’ (Jumptown Skydiving) ખાતે સ્કાયડાઇવિંગની પ્રવૃત્તિમાં ભાગ લઈ રહ્યા હતા. જ્યારે તેઓ પેરાશૂટ સાથે નીચે તરફ આવી રહ્યા હતા, ત્યારે જમીનથી આશરે 30 ફૂટની ઊંચાઈએ અચાનક આવેલા પવનના ઝાપટાએ (Gust of wind) તેમની લેન્ડિંગ એપ્રોચ (Landing approach) ખોરવી નાખી હતી.

આ સંતુલન બગડવાના કારણે તેઓ સીધા જમીન પર પટકાયા હતા. ઇમરજન્સી રિસ્પોન્ડર્સ (Emergency responders) તેમને તાત્કાલિક એથોલ હોસ્પિટલ (Athol Hospital) લઈ ગયા હતા, જ્યાં ડોક્ટરોએ તેમને મૃત જાહેર કર્યા હતા.

નોર્થવેસ્ટર્ન ડિસ્ટ્રિક્ટ એટર્ની ઓફિસ (Northwestern District Attorney’s Office) અને અન્ય સત્તાવાળાઓ આ મામલે તપાસ કરી રહ્યા છે. જમ્પટાઉન સ્કાયડાઇવિંગે આ દુર્ઘટના પર ઊંડો શોક વ્યક્ત કર્યો છે અને તપાસમાં સંપૂર્ણ સહકાર આપવાની ખાતરી આપી છે.

સોશિયલ મીડિયા (Social Media) પર સામે આવેલી વિગતો અનુસાર, મણિ ચંદ્ર તેજા મૂળ ભારતના વિજયવાડાના વતની હતા અને બાદમાં હૈદરાબાદ (Hyderabad) રહ્યા હતા. તેઓ અમેરિકાની નોર્થઇસ્ટર્ન યુનિવર્સિટીના (Northeastern University) ગ્રેજ્યુએટ હતા અને તાજેતરમાં જ તેમણે સ્વતંત્ર રીતે સ્કાયડાઇવિંગ કરવા માટેનું ‘A લાઇસન્સ’ (A License) મેળવ્યું હતું. આ ઘટનાએ એડવેન્ચર સ્પોર્ટ્સમાં હવામાનની અણધારી ભૂમિકા અને તેના જોખમો પર ફરી એકવાર પ્રકાશ પાડ્યો છે.