Portugal Firing Incident | યુરોપિયન દેશ (European Country) પુોર્ટુગલ (Portugal) માંથી ભારતીય મૂળના એક નાગરિક પર જીવલેણ હુમલો થવાની સનસનાટીભરી ઘટના સામે આવી છે.
પોર્ટુગલના લિસ્બન મેટ્રોપોલિટન વિસ્તારમાં આવેલા ઓડિવેલાસ (Odivelas)ના સિદાદે નોવા વિસ્તારમાં ભારતીય મૂળના જાણીતા ઉદ્યોગપતિ કિશોર ગુજરાતી (Kishor Gujarati) પર અજ્ઞાત હુમલાખોરોએ અંધાધૂંધ ગોળીબાર (Shooting) કર્યો હતો. આ હુમલામાં તેઓ ગંભીર રીતે ઇજાગ્રસ્ત થયા છે.
આ સમગ્ર ઘટનાનો એક કથિત વીડિયો પણ સોશિયલ મીડિયા પર વાયરલ થઈ રહ્યો છે, જેણે સ્થાનિક લોકો અને ભારતીય સમુદાયમાં ચિંતા જગાવી છે.
આ ચકચારી ઘટના બાદ સોશિયલ મીડિયા પર એક ચોંકાવનારો વળાંક આવ્યો છે. ફેસબુક પર “રાહુલ આરકે મીના” (Rahul RK Meena) નામના એક એકાઉન્ટ પરથી પોસ્ટ અને વીડિયો શેર કરીને આ હુમલાની જવાબદારી સ્વીકારવામાં આવી છે.
આ કથિત ગેંગસ્ટરે (Gangster) સોશિયલ મીડિયા પોસ્ટમાં ધમકી આપતાં લખ્યું છે કે, કિશોર ગુજરાતીને નિશાન બનાવવામાં આવ્યા છે અને જો કોઈ તેમના મેસેજની અવગણના કરશે તો તે “મોતને આમંત્રણ” આપવા બરાબર ગણાશે.
આ એકાઉન્ટ પરથી વધુમાં દાવો કરવામાં આવ્યો છે કે તેમનું નેટવર્ક ગ્લોબલ સ્તરે ફેલાયેલું છે. આ પોસ્ટમાં સુનિલ મીના ગેંગ, અમન સાહુ ગેંગ, નરેશ અબોહર અને અર્ચિત ચપ્રાણા જેવી કથિત ભારતીય ગેંગ અને ગુનેગારોના નામોનો પણ ઉલ્લેખ કરવામાં આવ્યો છે. આ કથિત ગેંગસ્ટરે ભવિષ્યમાં અન્ય લોકો પર પણ આવા જ હિંસક હુમલા કરવાની ધમકી આપી છે.
જો કે, પોર્ટુગલ પોલીસ અને તપાસ એજન્સીઓએ સત્તાવાર રીતે આ વાયરલ પોસ્ટ કે વીડિયોની સત્યતાની પુષ્ટિ કરી નથી. પોલીસ હાલમાં આ સમગ્ર મામલામાં ગેંગ વોર અને વેરની વસૂલાત સહિતના તમામ પાસાઓ પર ઝીણવટભરી તપાસ કરી રહી છે.
સોશિયલ મીડિયા કન્ટેન્ટની ડિજિટલ તપાસ પણ કરવામાં આવી રહી છે જેથી હુમલાખોરો સુધી પહોંચી શકાય. સત્તાવાળાઓએ જનતાને સોશિયલ મીડિયા પર ચાલી રહેલી બિનસત્તાવાર અફવાઓ પર વિશ્વાસ ન કરવા અપીલ કરી છે.