ફિનલેન્ડમાં હૈદરાબાદનો વિદ્યાર્થી છેલ્લા 45 દિવસથી ગુમ: તેલંગાણા હાઈકોર્ટે કેન્દ્ર સરકાર પાસે માંગ્યો જવાબ

Manideep Reddy Missing | તેલંગાણાના (Telangana) હૈદરાબાદનો (Hyderabad) એક વિદ્યાર્થી છેલ્લા 45 દિવસથી વધુ સમયથી ફિનલેન્ડમાં (Finland) ગુમ હોવાની આંચકાજનક ઘટના સામે આવી છે.

આ ઘટનાને કારણે તેનો પરિવાર અત્યંત ચિંતામાં સરી પડ્યો છે. વિદ્યાર્થીના માતા-પિતાએ તેમના પુત્રને વહેલી તકે શોધી કાઢવા અને તેની સુરક્ષિત વાપસી સુનિશ્ચિત કરવા માટે કેન્દ્ર અને રાજ્ય સરકારોને તાકીદની અપીલ કરી છે.

4 મે ના રોજ થઈ હતી છેલ્લી વાતચીત

ગુમ થયેલા વિદ્યાર્થીની ઓળખ મણિદીપ રેડ્ડી (Manideep Reddy) તરીકે થઈ છે, જે હૈદરાબાદના વનસ્થલીપુરમના વૈદેહી નગરનો રહેવાસી છે. મણિદીપ ઉચ્ચ શિક્ષણ મેળવવા માટે ફિનલેન્ડ ગયો હતો અને ત્યાં એલયુટી યુનિવર્સિટીમાં (LUT University) બીટેકના (BTech) પ્રથમ વર્ષમાં અભ્યાસ કરી રહ્યો હતો.

પરિવારના સભ્યોના જણાવ્યા અનુસાર, મણિદીપે છેલ્લે 4 મે ના રોજ તેની માતા સાથે ફોન પર વાત કરી હતી. ત્યાર પછીથી તેનો કોઈ સંપર્ક થઈ શક્યો નથી. ફિનલેન્ડમાં રહેતા તેના મિત્રો અને સંબંધીઓએ તેની રૂમ પર તેમજ યુનિવર્સિટીમાં તપાસ કરી હતી, પરંતુ તેના વિશે કોઈ માહિતી મળી શકી નહોતી.

તેલંગાણા હાઈકોર્ટે નોટિસ જારી કરી

આ મામલો હવે તેલંગાણા હાઈકોર્ટમાં (Telangana High Court) પહોંચ્યો છે. મણિદીપના માતા-પિતા દ્વારા દાખલ કરવામાં આવેલી અરજી પર સુનાવણી કરતા જસ્ટિસ બી. વિજય સેન રેડ્ડીએ (Justice B. Vijay Sen Reddy) કેન્દ્ર સરકારને આ કેસમાં અત્યાર સુધી લેવાયેલા પગલાંની વિગતો રજૂ કરવા નિર્દેશ આપ્યો છે.

અદાલતે ફિનલેન્ડમાં આવેલી ભારતીય એમ્બેસી (Indian Embassy), તેલંગાણા પોલીસ અને અન્ય સંબંધિત સત્તાવાળાઓને નોટિસ પાઠવીને આ મામલે જવાબ માંગ્યો છે.

કેન્દ્ર સરકારના વકીલે કોર્ટને જણાવ્યું હતું કે આ અંગે પોલીસ કેસ (Police Case) નોંધવામાં આવ્યો છે અને ફિનિશ સત્તાવાળાઓ દ્વારા તપાસ ચાલુ છે.

જોકે, પરિવારનો આક્ષેપ છે કે આટલા દિવસો વીતી ગયા હોવા છતાં તેમને હજુ સુધી કોઈ નક્કર માહિતી મળી નથી. હાઈકોર્ટે બંને પક્ષોની દલીલો સાંભળ્યા બાદ આ મામલાની સુનાવણી આગામી દિવસો પર મુલતવી રાખી છે.