TMC Split | પશ્ચિમ બંગાળના રાજકારણમાં ભારે ઉથલપાથલ મચી ગઈ છે. પશ્ચિમ બંગાળ વિધાનસભાની સત્તા ગુમાવ્યા બાદ અને રાજ્યમાં 58 ધારાસભ્યોના મોટા બળવા (Rebellion) નો સામનો કર્યા પછી હવે મમતા બેનરજીની તૃણમૂલ કોંગ્રેસ (TMC) ના અસ્તિત્વ સામે જ સૌથી મોટું સંકટ ઊભું થયું છે.
કોલકાતા બાદ હવે દેશની રાજધાની દિલ્હીમાં ટીએમસીના સંસદીય દળ (Parliamentary Party) માં એક બહુ મોટા વિભાજનની પટકથા લખાઈ ચૂકી છે. અહેવાલો અનુસાર, આગામી સપ્તાહની શરૂઆતમાં જ્યારે મુખ્યમંત્રી મમતા બેનરજી અને તેમના ભત્રીજા અભિષેક બેનરજી વિપક્ષી ઇન્ડિયા (INDIA) ગઠબંધનની બેઠકમાં ભાગ લેવા માટે દિલ્હી પહોંચશે, બરાબર એ જ સમયે પક્ષના ઓછામાં ઓછા 22 સાંસદો બળવો પોકારીને પોતાનું અલગ જૂથ બનાવી શકે છે.
આ બાગી સાંસદો પોતાને જ અસલી ટીએમસી જાહેર કરવાની તૈયારીમાં છે. સંસદમાં આકાર લઈ રહેલા આ મોટા રાજકીય તખ્તાપલટ (Coup) નું નેતૃત્વ બારાસાતના લોકસભા સાંસદ કાકોલી ઘોષ દસ્તીદાર કરી રહ્યા હોવાનું સામે આવ્યું છે, જેમાં લોકસભા અને રાજ્યસભા બંને ગૃહના સાંસદો સામેલ છે.
ભાજપના નેતાઓ દિલ્હીમાં સક્રિય બંગાળના આ અભૂતપૂર્વ રાજકીય ગરમાવા વચ્ચે પશ્ચિમ બંગાળના મુખ્યમંત્રી શુભેન્દુ અધિકારી અને ભાજપના પ્રદેશ અધ્યક્ષ સમિક ભટ્ટાચાર્ય અત્યારે દિલ્હીમાં જ ડેરા જમાવીને બેઠા છે અને સમગ્ર પરિસ્થિતિ પર નજર રાખી રહ્યા છે.
દિલ્હીમાં પત્રકારો સાથેની વાતચીત દરમિયાન ભાજપના રાજ્યસભા સાંસદ સમિક ભટ્ટાચાર્યએ દાવો કર્યો હતો કે, “હા, અમારા પર સતત ફોન કોલ્સ આવી રહ્યા છે. તૃણમૂલ કોંગ્રેસના સાંસદો સતત અમારા સંપર્કમાં છે. ટીએમસી હવે વીતેલા જમાનાની વાત બની ચૂકી છે અને નજીકના ભવિષ્યમાં તે ઇતિહાસના એક નાના પ્રકરણ પૂરતી જ સીમિત રહી જશે.”
બીજી તરફ, ભાજપના રાષ્ટ્રીય મહાસચિવ લોકેટ ચેટર્જીએ પણ સ્મિત સાથે આ વાતને ટેકો આપતા જણાવ્યું હતું કે, 4 મેના રોજ આવેલા ચૂંટણી પરિણામો બાદથી જ ટીએમસીના ઘણા સાંસદો ટેક્સ્ટ મેસેજ, વોટ્સએપ (WhatsApp) અને કોલ્સ દ્વારા સતત ભાજપના સંપર્કમાં છે અને તેઓ ગમે ત્યારે પાલો બદલવા માટે તૈયાર બેઠા છે.
પક્ષપલટા કાયદાથી બચવા માટે આંકડાની માયાજાળ સંસદમાં સત્તાવાર રીતે વિભાજનને માન્યતા અપાવવા અને બંધારણની દસમી અનુસૂચિ (Tenth Schedule) હેઠળ પક્ષપલટા વિરોધી કાયદા (Anti-Defection Law) થી બચવા માટે બાગી જૂથને બે-તૃતીયાંશ (Two-Thirds) બહુમતીની જરૂર પડશે.
હાજી નુરુલ ઇસ્લામના અવસાન બાદ લોકસભામાં ટીએમસીના 28 સભ્યો છે, જ્યારે રાજ્યસભામાં તેના 13 સભ્યો છે. દિલ્હીમાં કાયદેસર રીતે મોટો ખેલ કરવા માટે બાગીઓને ઓછામાં ઓછા 19 લોકસભા અને 9 રાજ્યસભા સાંસદોના સમર્થનની જરૂર પડશે. સૂત્રોના જણાવ્યા અનુસાર, બાગી છાવણીમાં અત્યારે બંને ગૃહોના મળીને કુલ 22 સાંસદોનો આંકડો તૈયાર થઈ ચૂક્યો છે, જે કાયદાકીય કટોકટીમાંથી બચવા માટે પૂરતો હોવાનો દાવો કરાયો છે.
ફઈ-ભત્રીજાની હાજરીમાં જ દિલ્હીમાં થશે મોટો ધડાકો બાગી જૂથના એક મુખ્ય સૂત્રે મીડિયા (Media) ને જણાવ્યું છે કે, આ તમામ અસંતુષ્ટ સાંસદો સોમવારે લોકસભા સ્પીકર (Speaker) ઓમ બિરલા અને રાજ્યસભાના અધ્યક્ષ સી.પી. રાધાકૃષ્ણનને મળીને પોતાને જ અસલી તૃણમૂલ કોંગ્રેસ તરીકે માન્યતા આપવા માટે પત્ર સોંપવાના છે. મમતા બેનરજી માટે આ બાબત અત્યંત આઘાતજનક અને પીડાદાયક હશે, કારણ કે જ્યારે ફઈ-ભત્રીજો (મમતા અને અભિષેક) દિલ્હીમાં રાજકીય બેઠકોમાં વ્યસ્ત હશે, બરાબર ત્યારે જ તેમની પીઠ પાછળ આ મોટો રાજકીય ધડાકો જોવા મળશે. ટીએમસીના વરિષ્ઠ રાજ્યસભા સાંસદ સુખેન્દુ શેખર રાયે પણ આ સંભવિત ભંગાણને સમર્થન આપતા કહ્યું છે કે સંસદીય દળનું વિખરાઈ જવું હવે અનિવાર્ય છે, તે બસ થોડા જ સમયની વાત છે.
15 સાંસદોના ફોન બંધ, સોશિયલ મીડિયા પર હોબાળો શુક્રવારે જ્યારે તૃણમૂલ કોંગ્રેસના અનેક સાંસદોનો સંપર્ક કરવાનો પ્રયત્ન કરવામાં આવ્યો, ત્યારે પક્ષના 16માંથી 15 સાંસદોના ફોન સતત સ્વિચ ઓફ (Switched Off) આવી રહ્યા હતા. આ સાંસદોમાં મનોરંજન જગતના સેલિબ્રિટીઝ (Celebrities), ભૂતપૂર્વ સ્પોર્ટ્સમેન અને પહેલીવાર ચૂંટણી જીતીને આવેલા સાંસદોનો સમાવેશ થાય છે.
આ આખા બળવાના મુખ્ય સૂત્રધાર ગણાતા મહિલા સાંસદ કાકોલી ઘોષ દસ્તીદારે સોશિયલ મીડિયા પ્લેટફોર્મ X પર અમેરિકન પ્રમુખ વુડરો વિલ્સનનું કથન અને ચાર્લ્સ મેકેની કવિતાઓ શેર કરીને પોતાની 4 દાયકા લાંબી રાજકીય સફરનો ઉલ્લેખ કર્યો છે. તેમણે પક્ષ સામે આર-પારની જંગનું એલાન કરતાં ચેતવણીભર્યા અંદાજમાં લખ્યું છે કે- “તતૈયા (મધમાખી) ના પૂડામાં હાથ નાખશો નહીં.”
બીજી તરફ, કોલકાતામાં બાગી જૂથના નેતા અને નવનિયુક્ત વિરોધ પક્ષના નેતા ઋતબ્રત બેનરજીએ આ સમગ્ર સ્થિતિ પર કટાક્ષ કરતા કહ્યું કે, “આજે મારે કંઈક કામ હોવાથી મેં 5 સાંસદોને ફોન કર્યો હતો, પણ બધાના ફોન એકસાથે બંધ આવતા હતા. હવે આનો જે મતલબ કાઢવો હોય તે કાઢી લો. ડર ચેપી (Contagious) હોય છે, પરંતુ સાહસ પણ ચેપી હોય છે.” આ પરિસ્થિતિ જોતા આગામી 48 કલાક બંગાળ અને દેશના રાજકારણ માટે ખૂબ જ મહત્વના સાબિત થશે.