TikTokના ફાઉન્ડરે મુકેશ અંબાણીને પછાડ્યા, એશિયાના બીજા સૌથી અમીર વ્યક્તિ બન્યા; જાણો નંબર-1 પર કોણ

TikTok Founder zhang yiming | દુનિયાની ટેક ઈન્ડસ્ટ્રી (Tech Industry) માં દરરોજ નવી વાર્તાઓ બને છે, પરંતુ કેટલીક કહાનીઓ એવી હોય છે જે આખી દુનિયાને ચોંકાવી દે છે. આવી જ એક ગાથા ટિકટોક (TikTok) બનાવનાર ઝાંગ યિમિંગ (Zhang Yiming) ની છે, જેમણે તાજેતરમાં એશિયાના સૌથી અમીર લોકોની યાદીમાં ભારતના દિગ્ગજ ઉદ્યોગપતિ મુકેશ અંબાણી (Mukesh Ambani)ને પાછળ છોડી દીધા છે.

ટિકટોકની પેરેન્ટ કંપની બાઈટડાન્સ (ByteDance) ના ફાઉન્ડર ઝાંગ યિમિંગ હવે એશિયાના બીજા સૌથી ધનિક વ્યક્તિ બની ગયા છે. ફોર્બ્સ (Forbes) ની તાજી રેન્કિંગ (Ranking) અનુસાર, ઝાંગ યિમિંગની નેટવર્થ (Net Worth) 92.8 બિલિયન ડોલર્સ પર પહોંચી ગઈ છે, જ્યારે મુકેશ અંબાણીની નેટવર્થ 86.9 બિલિયન ડોલર છે. આ યાદીમાં પ્રથમ સ્થાને ભારતના ગૌતમ અદાણી છે, જેમની કુલ સંપત્તિ 117.4 બિલિયન ડોલર છે.

આ માત્ર અઢળક દોલતની વાર્તા નથી, પરંતુ એક સામાન્ય માણસની સંઘર્ષગાથા છે જેણે સામાન્ય શરૂઆત કરીને વિશ્વની સૌથી મોટી ટેક કંપનીઓમાંથી એક ઊભી કરી દીધી.

ચાઈના (China) માં જન્મેલા ઝાંગ યિમિંગનો ઉછેર કોઈ મોટા બિઝનેસ પરિવારમાં થયો ન હતો. તેમણે સોફ્ટવેર એન્જિનિયરિંગ (Software Engineering) નો અભ્યાસ કર્યો અને પોતાના કરિયરની શરૂઆત એક સામાન્ય ટેક કર્મચારી તરીકે કરી હતી. શરૂઆતના દિવસોમાં તેઓ એક નાના 4 રૂમના એપાર્ટમેન્ટમાં રહેતા હતા, જ્યાંથી તેમની જિંદગી અને કામ ચાલતું હતું.

ઝાંગ યિમિંગ હંમેશાં માનતા હતા કે ઈન્ટરનેટ (Internet) માત્ર માહિતી મેળવવાનું સાધન નથી, પરંતુ યુઝર્સના બિહેવિયર (Behavior) ને સમજીને તેમને ગમતું કન્ટેન્ટ બતાવવાનું માધ્યમ છે. તેમણે શરૂઆતમાં સર્ચ એન્જિન અને ટ્રાવેલ વેબસાઇટ્સમાં કામ કર્યું. તેમનો પહેલો મોટો સક્સેસફુલ પ્રોડક્ટ (Product) ‘Toutiao’ નામની ન્યૂઝ એપ હતી.

આ એપમાં AI એલ્ગોરિધમ (Algorithm)નો ઉપયોગ કરવામાં આવ્યો હતો, જે યુઝરની પસંદગી મુજબ જ સમાચાર બતાવતી હતી. આ ક્રાંતિકારી આઈડિયા હિટ રહ્યા બાદ તેમણે શોર્ટ વીડિયો કન્ટેન્ટ પર ધ્યાન કેન્દ્રિત કર્યું, જેણે આગળ જતાં ‘TikTok’ ના રૂપમાં વૈશ્વિક ઈતિહાસ રચી દીધો.

આજે તેમની આ જ અનોખી ટેકનોલોજી અને વિઝનના જોરે તેઓ મુકેશ અંબાણી જેવા દિગ્ગજોને પાછળ છોડીને એશિયાના બીજા સૌથી અમીર શખ્સ બની ગયા છે.