Finland Citizenship Application | ફિનિશ ઇમિગ્રેશન સર્વિસ (Migri) દ્વારા જાહેર કરાયેલા નવા આંકડા અનુસાર, નોર્ડિક દેશમાં (Nordic country) એકંદર ઇમિગ્રેશનમાં ઘટાડો થયો હોવા છતાં, વર્ષ 2025 માં ફિનલેન્ડે રેકોર્ડ સંખ્યામાં નાગરિકતા મંજૂર કરી છે. આ અહેવાલમાં જણાવાયું છે કે ફેમિલી-બેઝ્ડ રેસિડન્સ પરમિટ (family-based residence permit) માટે અરજી કરનારાઓમાં ભારતીય નાગરિકો અગ્રણી દેશોમાં સામેલ હતા.
ગયા વર્ષે કુલ 14,703 લોકોને ફિનલેન્ડની નાગરિકતા (citizenship) આપવામાં આવી હતી, જે અત્યાર સુધીનો સૌથી મોટો વાર્ષિક આંકડો છે. વર્ષ 2024 માં આ સંખ્યા 13,973 હતી. મિગ્રીના જણાવ્યા અનુસાર, નાગરિકતાના આંકડામાં આ વધારો મુખ્યત્વે અગાઉના વર્ષોમાં સબમિટ (submit) કરાયેલી અરજીઓના બેકલોગની (backlog) પતાવટને કારણે થયો હતો. તેની સામે, ફિનલેન્ડની આર્થિક મંદી અને કડક ઇમિગ્રેશન નિયમોને (immigration rules) લીધે નવા આવનારા લોકોની સંખ્યામાં ઘટાડો થયો હતો. અગાઉના વર્ષની સરખામણીમાં વર્ક-બેઝ્ડ રેસિડન્સ પરમિટમાં (work-based residence permit) લગભગ 25% જેટલો મોટો ઘટાડો નોંધાયો છે.
વર્ષ 2025 માં ફેમિલી પરમિટ માટે એશિયન દેશોના (Asian countries) નાગરિકો સૌથી વધુ સક્રિય હતા, જેમાં ફિલિપાઇન્સ, શ્રીલંકા અને ભારત મુખ્ય છે. મોટાભાગના પારિવારિક સભ્યો વર્ક અથવા સ્ટુડન્ટ વિઝા (student visa) પર રહેતા જીવનસાથી કે વાલીના આધારે આ પરમિટ માટે અરજી કરે છે. ફર્સ્ટ-ટાઇમ વર્ક અને સ્ટુડન્ટ પરમિટમાં ઘટાડો થયો હોવા છતાં, ફેમિલી-બેઝ્ડ પરમિટમાં 10% નો વધારો જોવા મળ્યો છે.
જો કે, વર્ષ 2026 ના શરૂઆતના મહિનાઓમાં વર્ક-બેઝ્ડ પરમિટ માટેની અરજીઓમાં 11% નો વધારો થયો છે, જે લેબર ઇમિગ્રેશનમાં (labour migration) રિકવરી દર્શાવે છે. ફિનલેન્ડમાં ચાલી રહેલા વિવિધ ઇન્ડસ્ટ્રિયલ પ્રોજેક્ટ્સને (industrial projects) કારણે આ વધારો થયો છે. સૌથી મોટો ઘટાડો હેલ્થકેર (healthcare) ક્ષેત્રે 81% અને કન્સ્ટ્રક્શન (construction) ક્ષેત્રે 24% નોંધાયો હતો.
સરકારે વર્ષ 2024 થી નાગરિકતાના નિયમો કડક કર્યા છે, જેના લીધે વર્ષ 2025 માં નવી અરજીઓમાં 33% થી વધુનો ઘટાડો થયો છે અને તે તેના સામાન્ય સ્તરે પરત આવી છે. સત્તાવાર આંકડા મુજબ, ફિનલેન્ડની 56.5 લાખની વસ્તીમાંથી લગભગ 10% લોકો દેશ બહાર જન્મેલા છે.