‘ભારતીયો અને પાકિસ્તાનીઓ આપણી નોકરીઓ છીનવી રહ્યા છે’: બ્રિટિશ MP ના રંગભેદી નિવેદનથી મોટો વિવાદ

British MP Rupert Lowe racist remarks | યુનાઇટેડ કિંગડમ (United Kingdom) માં સ્થળાંતર કરનારા ભારતીયો અને પાકિસ્તાની નાગરિકો વિરૂદ્ધ બ્રિટનના એક સાંસદ (MP) દ્વારા કરવામાં આવેલી આપત્તિજનક ટિપ્પણીએ મોટો વિવાદ (Row) જગાવ્યો છે.

રિફોર્મ યુકે (Reform UK) માંથી અલગ થઈને તાજેતરમાં જ જમણેરી વિચારધારા ધરાવતો નવો રાજકીય પક્ષ ‘રિસ્ટોર બ્રિટન’ (Restore Britain) શરૂ કરનાર રુપર્ટ લોવે (Rupert Lowe) એ લાખો પાકિસ્તાનીઓ અને ભારતીયો પર બ્રિટિશ નાગરિકોની નોકરીઓ છીનવી લેવાનો ગંભીર આરોપ લગાવ્યો છે.

રુપર્ટ લોવે સોશિયલ મીડિયા પ્લેટફોર્મ એક્સ (X) પર એક વિવાદાસ્પદ પોસ્ટ શેર કરતા લખ્યું કે, “હું એવું બિલકુલ નથી માનતો કે આપણે લાખો પાકિસ્તાનીઓ અને ભારતીયોને એવી નોકરીઓ કરવા માટે આપણા દેશમાં લાવવા જોઈએ જે વાસ્તવમાં બેરોજગાર બ્રિટિશ નાગરિકોને મળવી જોઈએ.”

આ નિવેદન બાદ પોતાના પર રંગભેદી (Racist) હોવાનો લેબલ લાગવાના જોખમ અંગે પણ તેણે સ્પષ્ટતા કરતા ઉમેર્યું કે, “જો આ વાત મને રંગભેદી બનાવે છે, તો ભલે તેમ જ હોય.”

તેણે પોતાની અગાઉની એક પોસ્ટમાં દાવો કર્યો હતો કે ઉત્તર પશ્ચિમ ઇંગ્લેન્ડ (North West England) ના કેટલાક ભાગોની મુલાકાત લેતા એવું લાગે છે કે જાણે કોઈ વિદેશી દેશ (Foreign Country) માં આવી ગયા હોઈએ.

લોવે આક્ષેપ કર્યો હતો કે, “આ બધું અકસ્માતે નથી થયું, પરંતુ લેબર (Labour), રિફોર્મ (Reform) અને કન્ઝર્વેટિવ (Conservative) પક્ષના રાજકારણીઓ દ્વારા ત્રીજી દુનિયા (Third World) માંથી લાખો ઓછી કુશળતા ધરાવતા પ્રવાસીઓ (Low-skilled migrants) ને દેશમાં લાવવાનો આ એક ઈરાદાપૂર્વકનો નિર્ણય હતો. આ સમસ્યા સતત વધી રહી છે અને વધુ ખરાબ થઈ રહી છે.”

તેણે બ્રિટનની મુસ્લિમ વસ્તીને પણ નિશાન બનાવી હતી અને બુરખામાં મહિલાઓ સાથે ફરતા પુરુષોને જોવા અંગે નફરત વ્યક્ત કરી હતી.

તેણે દાવો કર્યો હતો કે માન્ચેસ્ટર (Manchester) ની મુખ્ય બજારો ઇસ્લામિક બની રહી છે અને આ ઇમિગ્રેશનને વસાહતીકરણ (Colonisation) નું એક સ્વરૂપ ગણાવ્યું હતું. અપક્ષ સાંસદ લોવે અબજોપતિ સર જિમ રેટક્લિફ (Sir Jim Ratcliffe) ના અગાઉના વિવાદાસ્પદ નિવેદનનો સંદર્ભ આપતા આને સંપૂર્ણ ‘ટેકઓવર’ (Takeover) ગણાવ્યું હતું.

લોવેના આ નિવેદનની સોશિયલ મીડિયા પર આકરી ટીકા થઈ રહી છે. યુઝર્સે તેને બ્રિટનના વસાહતી ભૂતકાળની યાદ અપાવી હતી. 1 યુઝરે લખ્યું, “જ્યારે તમારો દેશ રોયલ ક્રાઉન જ્વેલ્સ (Crown Jewels) ને અન્ય લોકો પાસેથી છીનવી રહ્યો હતો ત્યારે વિચારવું જોઈતું હતું કે તમે જ્યાં આક્રમણ કરશો, તે લોકો એક દિવસ તમારા ઘર સુધી પણ આવશે.”

સત્તાવાર આંકડા (Data) ની વાત કરીએ તો, યુકેના ઓફિસ ફોર નેશનલ સ્ટેટિસ્ટિક્સ (Office for National Statistics), 2021 સેન્સસ (Census) મુજબ, લોવેના પોતાના મતવિસ્તાર ગ્રેટ યાર્માઉથ (Great Yarmouth) માં ભારતીય અને પાકિસ્તાની મૂળના માત્ર 907 રહેવાસીઓ છે, જે ત્યાંની કુલ 99,750 વસ્તીના 1% કરતા પણ ઓછા છે.

ઓક્સફર્ડ યુનિવર્સિટી (University of Oxford) ના અહેવાલ મુજબ, જુલાઈ 2014 માં બ્રિટનમાં પ્રવાસી કામદારો હિસ્સો 12% (3.5 મિલિયન) હતો, જે ડિસેમ્બર 2025 સુધીમાં વધીને 20% (6.5 મિલિયન) થયો છે.

જોકે, રિપોર્ટ દર્શાવે છે કે જાન્યુઆરી 2021 થી ડિસેમ્બર 2025 ની વચ્ચે ભારતીય અને નાઇજીરિયન નાગરિકોની રોજગારીમાં મોટો વધારો થયો છે, પરંતુ તેઓ બ્રિટિશરોની નોકરીઓ નથી છીનવી રહ્યા.

આમાંના મોટાભાગના શ્રમિકો હેલ્થ અને કેર સેક્ટર (Health and Care Sector) જેવા ક્ષેત્રોમાં કાર્યરત છે, જ્યાં બ્રિટનમાં પહેલેથી જ સ્ટાફની ભારે અછત (Staffing Shortages) પ્રવર્તી રહી છે.