સુરેન્દ્રનગર હાઈવે પર કાળમુખો ટ્રકે 10 પદયાત્રીઓને કચડ્યા, સાતના મોત

ગુજરાતના હાઈવે પર અકસ્માતનો (Accident) સિલસિલો અટકવાનું નામ નથી લઈ રહ્યો. આજે વહેલી સવારે સુરેન્દ્રનગર (Surendranagar) જિલ્લાના લખતર-વિરમગામ હાઈવે પર એક હૃદયદ્રાવક દુર્ઘટના સર્જાઈ છે. લખતરના ભાસ્કરપરા નજીક એક બેફામ ગતિએ આવતા ટ્રકે (Truck) પદયાત્રીઓના સંઘને અડફેટે લેતા 7 લોકોના ઘટનાસ્થળે જ કમકમાટીભર્યા મોત નિપજ્યા છે.

એક જ પરિવારના 7 સભ્યોના મોતથી માતમ

મળતી માહિતી મુજબ, આ અકસ્માતનો ભોગ બનનારા તમામ લોકો ભરવાડ સમાજના મુંધવા પરિવારના સભ્યો હતા. આ પદયાત્રીઓ રાજકોટના (Rajkot) ગઢકા ગામે આવેલા મંદિરે સંઘ (Sangh) લઈને જઈ રહ્યા હતા, ત્યારે કાળમુખા ટ્રકે તેમને કચડી નાખ્યા હતા. મૃતકોમાં 5 મહિલાઓ અને 2 પુરુષોનો સમાવેશ થાય છે. એક જ પરિવારના સભ્યોના મોતથી સમગ્ર પંથકમાં શોકનું મોજું ફરી વળ્યું છે.

ટ્રક ચાલકની બેદરકારી

પ્રત્યક્ષદર્શીઓના જણાવ્યા અનુસાર, ટ્રક ચાલકે અંદાજે 10 જેટલા યાત્રિકોને અડફેટે લીધા હતા. અકસ્માત એટલો ભયાનક હતો કે પદયાત્રીઓના દેહ રસ્તા પર વેરવિખેર થઈ ગયા હતા. ઘટનાની જાણ થતા જ સ્થાનિક પોલીસ (Police) અને 108 ની ટીમ ઘટનાસ્થળે પહોંચી હતી. પોલીસે મૃતદેહોને પોસ્ટમોર્ટમ (Post-mortem) માટે ખસેડી ટ્રક ચાલક વિરુદ્ધ કાયદેસરની કાર્યવાહી હાથ ધરી છે. હાઈવે સુરક્ષા (Highway Safety) પર ફરી એકવાર મોટા સવાલો ઊભા થયા છે.