અમેરિકાના રિટેલ સેક્ટર (Retail Sector) માટે વર્ષ 2025 અત્યંત કપરૂ સાબિત થયું છે. વધતા ટેરિફ (Tariff), દેવાના ડુંગર અને ગ્રાહકોની બદલાતી આદતોને કારણે સમગ્ર દેશમાં 8,200 થી વધુ રિટેલ સ્ટોર્સ બંધ થઈ ગયા છે. આ આંકડો અમેરિકાના ઇતિહાસમાં અત્યાર સુધીના સૌથી વધુ સ્ટોર્સ બંધ થવાના આંકડાઓ પૈકીનો એક છે.
સ્ટોર્સ બંધ થવાના દરમાં 12% નો વધારો
રિટેલ ઉદ્યોગની સંશોધન સંસ્થા ‘કોરસાઈટ રિસર્ચ’ (Coresight Research) ના ડેટા મુજબ, વર્ષ 2024 માં 7,325 સ્ટોર્સ બંધ થયા હતા, જેની સરખામણીએ 2025 માં આ સંખ્યામાં 12% નો જંગી વધારો જોવા મળ્યો છે. આ કટોકટીની અસર ફાર્મસી, ડિપાર્ટમેન્ટ સ્ટોર્સ, કોફી શોપ્સ અને ડિસ્કાઉન્ટ રિટેલર્સ સહિત લગભગ તમામ ક્ષેત્રોમાં જોવા મળી છે. નાણાકીય નિષ્ણાતોના મતે વર્ષ 2026 માં પણ આ સ્થિતિમાં સુધારો થવાની શક્યતા ઓછી છે.
ટેરિફ અને વધતા ખર્ચનો માર
અમેરિકા દ્વારા આયાતી માલ પર લાદવામાં આવેલા ઊંચા ટેરિફ (High Tariffs) રિટેલર્સ માટે સૌથી મોટું નુકસાનકારક પરિબળ બન્યું છે.
Orvis: આ આઉટડોર રિટેલરે 2026 ની શરૂઆત સુધીમાં 36 સ્ટોર્સ બંધ કરવાની જાહેરાત કરી છે.
Carter’s: બાળકોના કપડાં વેચતી આ કંપનીએ વધતા પ્રોડક્ટ કોસ્ટને કારણે આગામી 3 વર્ષમાં 150 સ્ટોર્સ બંધ કરવાનું લક્ષ્ય રાખ્યું છે.
At Home: આ હોમ ડેકોર ચેઈને જૂન 2025 માં નાદારી (Bankruptcy) નોંધાવી અને 30 સ્ટોર્સ બંધ કર્યા.
‘ટેક્સ ફાઉન્ડેશન’ (Tax Foundation) ના અંદાજ મુજબ, વધતા ટેરિફને કારણે વર્ષ 2025 માં સરેરાશ અમેરિકન પરિવાર પર 1,200 યુએસ ડોલરનો વધારાનો આર્થિક બોજ પડ્યો છે.
દેવાના બોજ હેઠળ દબાયેલી મોટી બ્રાન્ડ્સ
ઘણી કંપનીઓ પ્રાઈવેટ ઈક્વિટી ફર્મ્સ દ્વારા લેવામાં આવેલા દેવાને કારણે નાદાર થઈ છે.
Rite Aid: એક સમયે અમેરિકાની દિગ્ગજ ફાર્મસી ચેઈન ગણાતી આ કંપની ઓક્ટોબર 2025 માં સંપૂર્ણપણે બંધ થઈ ગઈ, જેના કારણે અંદાજે 1,300 સ્ટોર્સને તાળાં લાગ્યા.
Joann: ક્રાફ્ટ રિટેલર જોઆને 1.1 અબજ ડોલરના દેવા હેઠળ 800 લોકેશન બંધ કર્યા છે.
S&P Global Market Intelligence ના રિપોર્ટ અનુસાર, નવેમ્બર 2025 સુધીમાં 717 અમેરિકન કંપનીઓએ નાદારી નોંધાવી છે, જે છેલ્લા 15 વર્ષમાં સૌથી વધુ છે.
ડિસ્કાઉન્ટ અને ફાર્મસી સેક્ટરની હાલત ખરાબ
ઓછી આવક ધરાવતા ગ્રાહકોએ ખર્ચમાં કાપ મૂકતા ડિસ્કાઉન્ટ સ્ટોર્સને ભારે નુકસાન થયું છે. 99 Cents Only એ પોતાના તમામ 371 સ્ટોર્સ બંધ કરી દીધા છે, જેનાથી 10,800 લોકોએ નોકરી ગુમાવી છે. તેવી જ રીતે, Dollar Tree એ પોતાના 1,000 સ્ટોર્સ બંધ કર્યા છે.
આરોગ્ય ક્ષેત્રે પણ મોટી અસર પડી છે. Walgreens અને CVS જેવી મોટી ફાર્મસી ચેઈન્સે હજારો સ્ટોર્સ બંધ કરવાની યોજના અમલમાં મૂકી છે. આના કારણે અમેરિકામાં ‘ફાર્મસી ડેઝર્ટ’ (Pharmacy Deserts) જેવી સ્થિતિ સર્જાઈ છે, જ્યાં લાખો લોકો પાસે દવાઓ ખરીદવા માટે નજીકમાં કોઈ વિકલ્પ નથી.
ખાણી-પીણી અને અન્ય ક્ષેત્રો
Starbucks: સ્પર્ધા અને બદલાતા વર્ક કલ્ચરને કારણે 400 સ્ટોર્સ બંધ કર્યા છે.
7-Eleven: ફૂટ ટ્રાફિકમાં ઘટાડાને કારણે 500થી વધુ લોકેશન બંધ કર્યા છે.
Wendy’s: આ ફાસ્ટ ફૂડ ચેઈન 2026 સુધીમાં 200 થી 350 રેસ્ટોરાં બંધ કરવાની તૈયારીમાં છે.
Macy’s: પ્રસિદ્ધ ડિપાર્ટમેન્ટ સ્ટોર મેસીસ પણ 2026 ના અંત સુધીમાં 150 સ્ટોર્સ બંધ કરશે.
ભવિષ્યનું અનુમાન
‘ફોર્બ્સ’ (Forbes) ના રિપોર્ટ મુજબ, 2026 માં યુએસ રિટેલ સેક્ટર માટે વધુ મોટો પડકાર આવશે. ઊંચા વ્યાજ દરો (Interest Rates), ઓનલાઈન શોપિંગનો ક્રેઝ અને દેવાના બોજ હેઠળ દબાયેલી કંપનીઓ માટે અસ્તિત્વ ટકાવી રાખવું મુશ્કેલ બનશે. જે કંપનીઓ પાસે રોકડની અછત છે, તેમના માટે ‘નાદારી’ એ એકમાત્ર વિકલ્પ બની શકે છે.