એપસ્ટિન ફાઇલ્સમાં મોટો ધડાકો: પ્રિન્સ એન્ડ્રુ માટે મહેલમાં યુવતીઓ મોકલાતી હતી

Epstein Files | જેફરી એપસ્ટિન (Jeffrey Epstein) સંબંધિત સેક્સ ટ્રાફિકિંગ (Sex Trafficking) કૌભાંડમાં દરરોજ નવા અને સનસનીખેજ ખુલાસા થઈ રહ્યા છે. તાજેતરમાં સાર્વજનિક થયેલી 30 લાખથી વધુ ફાઈલોમાં બ્રિટનના પ્રિન્સ એન્ડ્રુ (Prince Andrew) અને એપસ્ટિન વચ્ચેના ગાઢ સંબંધોની કાળી બાજુ સામે આવી છે. આ અહેવાલો મુજબ, સગીર બાળકીઓના શોષણ માટે બ્રિટિશ રાજવી પરિવારના નિવાસસ્થાનનો ઉપયોગ થતો હોવાના ગંભીર આરોપો લાગ્યા છે, જેના કારણે સમગ્ર યુકે (UK) માં ખળભળાટ મચી ગયો છે.

‘લોલિતા એક્સપ્રેસ’ અને યુકેમાં 90 થી વધુ લેન્ડિંગ

એપસ્ટિન પાસે પોતાનું ખાનગી બોઇંગ 727-100 વિમાન હતું, જેને દુનિયા ‘લોલિતા એક્સપ્રેસ’ (Lolita Express) તરીકે ઓળખતી હતી. આરોપ છે કે આ વિમાનનો ઉપયોગ વિશ્વભરમાંથી યુવતીઓની તસ્કરી કરવા અને ગેરકાયદેસર પાર્ટીઓ યોજવા માટે થતો હતો. ફ્લાઇટ રેકોર્ડ્સ (Flight Records) દર્શાવે છે કે આ વિમાને યુકેમાં અંદાજે 90 થી વધુ વખત લેન્ડિંગ કર્યું હતું. આશ્ચર્યની વાત એ છે કે, વર્ષ 2008માં એપસ્ટિન જાતીય ગુનામાં દોષિત ઠર્યા બાદ પણ આ ફ્લાઇટ્સ ચાલુ રહી હતી. મોટાભાગે આ વિમાન સ્ટેન્સ્ટેડ એરપોર્ટ (Stansted Airport) પર ઉતરતું અને ત્યાંથી યુવતીઓને નિર્ધારિત સ્થળોએ મોકલવામાં આવતી હતી.

‘મિસિસ વિન્ડસર’ કોડ અને બકિંગહામ પેલેસમાં એન્ટ્રી

સામાન્ય રીતે બકિંગહામ પેલેસ (Buckingham Palace) માં પ્રવેશ માટે કડક સુરક્ષા તપાસ હોય છે, પરંતુ પ્રિન્સ એન્ડ્રુના કિસ્સામાં નિયમો નેવે મુકાયા હતા. તપાસમાં બહાર આવ્યું છે કે એપસ્ટિન દ્વારા મોકલાયેલી યુવતીઓને કોઈ પણ તપાસ વગર મહેલમાં પ્રવેશ આપવા માટે ‘મિસિસ વિન્ડસર’ (Mrs. Windsor) કોડ નેમનો ઉપયોગ થતો હતો. પ્રિન્સ એન્ડ્રુ પોતે સુરક્ષાકર્મીઓને ફોન કરીને આ કોડનો ઉપયોગ કરી યુવતીઓને અંદર બોલાવતા હતા.

અહેવાલો મુજબ, ઓછામાં ઓછી ચાર યુવતીઓએ આ કોડ દ્વારા મહેલમાં પ્રવેશ મેળવ્યો હતો. જેમાં મુખ્ય નામ વર્જિનિયા ગિફ્રે (Virginia Giuffre) નું છે. વર્જિનિયાએ આરોપ લગાવ્યો હતો કે જ્યારે તે માત્ર 17 વર્ષની હતી, ત્યારે તેને બકિંગહામ પેલેસ, લંડન અને એપસ્ટિનના ખાનગી ટાપુ પર પ્રિન્સ એન્ડ્રુ સાથે સંબંધ બાંધવા મજબૂર કરવામાં આવી હતી.

સુરક્ષા વ્યવસ્થા અને રાજશાહી સામે સવાલો

આ ખુલાસા બાદ બ્રિટનની સુરક્ષા એજન્સીઓ (Security Agencies) અને તંત્ર સામે ગંભીર સવાલો ઉભા થયા છે. પૂર્વ વડાપ્રધાન ગોર્ડન બ્રાઉન સહિતના નેતાઓએ આ મામલે સત્તાવાર પોલીસ તપાસ (Police Investigation) ની માંગ કરી છે. ઈમેઈલ્સ અને ફ્લાઇટ લોગ્સ મુજબ, બ્રિટિશ સરકાર પાસે એ માહિતી જ નહોતી કે પ્રિન્સને મળવા કયા દેશની યુવતીઓ આવી રહી છે.

આ કૌભાંડની અસર બ્રિટિશ રાજવી પરિવાર (Royal Family) ની પ્રતિષ્ઠા પર પણ પડી છે. તાજેતરના સર્વેક્ષણો મુજબ, પ્રજામાં રાજશાહી પ્રત્યેનો વિશ્વાસ ઘટ્યો છે. જોકે, બકિંગહામ પેલેસે સ્પષ્ટતા કરી છે કે જો તપાસ થશે તો તેઓ સંપૂર્ણ સહકાર આપશે.

વર્જિનિયા ગિફ્રેનું રહસ્યમય મોત

આ સમગ્ર કૌભાંડમાં જેણે અવાજ ઉઠાવ્યો હતો તે વર્જિનિયા ગિફ્રેનું 25 એપ્રિલ, 2025ના રોજ પશ્ચિમ ઓસ્ટ્રેલિયામાં નિધન થયું હતું. સત્તાવાર રીતે તેને આત્મહત્યા (Suicide) ગણાવવામાં આવી છે. તેના પરિવારે જણાવ્યું કે તે વર્ષોથી માનસિક આઘાત (Mental Trauma) અને કાનૂની લડાઈના દબાણ હેઠળ હતી.

હાલમાં, પ્રિન્સ એન્ડ્રુ પાસેથી તમામ રાજવી પદવીઓ અને અધિકારો છીનવી લેવામાં આવ્યા છે. આ કેસ આવનારા સમયમાં બ્રિટિશ રાજવી પરિવાર માટે વધુ મુશ્કેલીઓ સર્જી શકે છે.