TMCને ડોનેશનમાં 184.96 કરોડ રૂપિયા મળ્યા, એક જ વર્ષમાં ત્રણ ગણો વઘારો

મમતા બેનર્જીની આગેવાની હેઠળની તૃણમૂલ કોંગ્રેસ (TMC)ને નાણાકીય વર્ષ 2024–25 દરમિયાન ચંદામાં ભારે વધારો જોવા મળ્યો છે. પાર્ટીને આ વર્ષે કુલ 448 દાનદાતાઓ પાસેથી 184.96 કરોડ રૂપિયાનું ભંડોળ મળ્યું છે, જે ગયા નાણાકીય વર્ષ 2023–24માં મળેલા 64.24 કરોડ રૂપિયાની સરખામણીમાં લગભગ ત્રણ ગણું વધુ છે.

ચૂંટણી પંચને આપવામાં આવેલી માહિતી મુજબ, TMCને સૌથી વધુ દાન આપનારાઓમાં દિલ્હી અને મુંબઈ સ્થિત ઇલેક્ટોરલ ટ્રસ્ટ્સ, પશ્ચિમ બંગાળનો એક લોટરી ડિસ્ટ્રિબ્યુટર, તેમજ રાજ્યમાં કાર્યરત અનેક ઉદ્યોગો સામેલ છે. આથી સ્પષ્ટ થાય છે કે રાજ્ય સાથે જોડાયેલી કંપનીઓનો પાર્ટીના ફંડમાં મહત્વનો ફાળો છે.

દાનદાતાઓની યાદીમાં પ્રુડન્ટ ઇલેક્ટોરલ ટ્રસ્ટ સૌથી આગળ છે, જેણે TMCને 92 કરોડ રૂપિયાનું દાન આપ્યું છે. ત્યારબાદ ટાઇગર એસોસિએટ્સ નામની કંપનીએ 50 કરોડ રૂપિયાનું યોગદાન આપ્યું છે. આ કંપની પશ્ચિમ બંગાળમાં નાગાલેન્ડ, સિક્કિમ અને પંજાબની સરકારી લોટરી વેચવાનું કામ કરે છે. ઉપરાંત, મુંબઈ સ્થિત પ્રોગ્રેસિવ ઇલેક્ટોરલ ટ્રસ્ટ, જેમાં ટાટા ગ્રુપની કંપનીઓનું ફંડ સામેલ છે, તેણે પણ TMCને 10 કરોડ રૂપિયાનું દાન આપ્યું છે.

કોર્પોરેટ દાનની વાત કરીએ તો, રશ્મી સિમેન્ટ લિમિટેડએ TMCને 5 કરોડ રૂપિયા આપ્યા છે. આ કંપનીનું મુખ્ય કાર્યાલય કોલકાતામાં છે અને તેના કારખાના ખડગપુર અને ઝાડગ્રામમાં આવેલા છે. ઉપરાંત, શ્યામ ફેરો એલોયઝ લિમિટેડ અને કેજરીવાલ માઇનિંગ કંપનીએ પણ 3-3 કરોડ રૂપિયાનું દાન આપ્યું છે. સુપર સ્મેલ્ટર્સ અને IVL ધનસેરી પેટ્રોકેમ ઇન્ડસ્ટ્રીઝે 2-2 કરોડ રૂપિયાનું યોગદાન આપ્યું છે.

વ્યક્તિગત દાનદાતાઓમાં સૌથી મોટું નામ કિશન ગોપાલ મોહિતાનું છે, જે વ્યવસાયે ફાઇનાન્સ પ્રોફેશનલ છે. તેમણે TMCને 3 કરોડ રૂપિયાનું દાન આપ્યું છે.
જ્યારે 2024માં ઇલેક્ટોરલ બોન્ડ્સનો ડેટા જાહેર થયો ત્યારે ખુલાસો થયો હતો કે એપ્રિલ 2019થી જાન્યુઆરી 2024 વચ્ચે TMCને કુલ 1,609 કરોડ રૂપિયા મળ્યા હતા. આ મોટા ફંડના આધારે TMC દેશની બીજી સૌથી વધુ ચંદો મેળવનારી પાર્ટી બની છે, જ્યારે પ્રથમ સ્થાને BJP છે.