સિંગાપોર એરલાઇન્સની ફ્લાઇટમાં એર હોસ્ટેસની છેડતી કરનાર ભારતીય નાગરિકને 6 મહિનાની જેલ

Singapore Flight Molestation Case | સિંગાપોર (Singapore)ની એક અદાલતે ફ્લાઇટ એટેન્ડન્ટ (Flight Attendant) ની છેડતી (Molestation) કરવા અને તેને માનસિક તણાવ આપવાના ગુનામાં 35 વર્ષીય ભારતીય નાગરિક આકાશ તિવારીને 6 મહિનાની જેલની સજા ફટકારી છે.

આ ઉપરાંત, કોર્ટે પીડિતાને થયેલા માનસિક આઘાત અને તબીબી ખર્ચ પેટે આશરે 1270 સિંગાપોર ડોલર એટલે કે આશરે 982 યુએસ ડોલર (US Dollars) નું વળતર ચૂકવવાનો પણ આદેશ કર્યો છે. આરોપીએ છેડતી અને ધમકીભર્યા વર્તન દ્વારા પરેશાન કરવાના ગુનાની કબૂલાત કરી લીધી છે.

કોર્ટની કાર્યવાહી દરમિયાન સામે આવ્યું કે આ ઘટના સિંગાપોર એરલાઇન્સ (Singapore Airlines) ની ફ્લાઇટમાં ફેબ્રુઆરી મહિનામાં બની હતી. કોર્ટના આદેશને કારણે પીડિતા અને ફ્લાઇટની ઓળખ ગુપ્ત રાખવામાં આવી છે.

આકાશ તિવારી તેના 4 મિત્રો સાથે મુસાફરી કરી રહ્યો હતો અને આ આખું જૂથ ફ્લાઇટ દરમિયાન અત્યંત તોફાની વર્તન કરી રહ્યું હતું. તેઓ વારંવાર મહિલા ક્રૂ મેમ્બર્સ તરફ હાથ હલાવીને હસતા હતા.

પ્રથમ ઘટના ફ્લાઇટના ટેક-ઓફ પહેલાં બની જ્યારે એર હોસ્ટેસ ભોજનની પસંદગી કન્ફર્મ કરવા તેમની પાસે ગઈ હતી. આ દરમિયાન આકાશે તેનો હાથ લંબાવીને પીડિતાની જાંઘ પર ખોટી રીતે સ્પર્શ કર્યો હતો. આ હરકતથી પીડિતા સ્તબ્ધ થઈ ગઈ હતી, જ્યારે આરોપી અને તેના મિત્રો મોટેથી હસવા લાગ્યા હતા.

એર હોસ્ટેસે આ અંગે તેના સુપરવાઈઝરને જાણ કરી હતી, જેથી તેને તે લાઈનમાં ન જવાની સલાહ અપાઈ હતી. જો કે, ભોજનની ટ્રે એકત્રિત કરતી વખતે બીજી ઘટના બની હતી. આકાશે જાણીજોઈને પોતાની સીટ પરથી બહાર ઝૂકીને એર હોસ્ટેસને ફરીથી અયોગ્ય સ્પર્શ કર્યો હતો.

પીડિતાએ જ્યારે વિરોધ કર્યો ત્યારે માફી માંગવાના બદલે તે સ્મર્ક (Smirk – કટાક્ષભર્યું હસવું) કરી રહ્યો હતો. તેના એક મિત્રે તો એવી ટિપ્પણી પણ કરી કે તે બિયર પીને આ આખો ‘શો’ જોવા માંગે છે.

મુખ્ય ફ્લાઇટ સ્ટેવર્ડસની હાજરીમાં વિરોધ કરવા છતાં આરોપીએ પોતાની ભૂલ સ્વીકારી ન હતી. વિમાન લેન્ડ થવાનું હતું ત્યારે પીડિતા રિપોર્ટ કરવા ગેલી (Galley – વિમાનનું રસોડું) તરફ ગઈ, તો આરોપી તેની પાછળ ત્યાં પણ પહોંચી ગયો અને તેની ખૂબ નજીક આવીને ઊભો રહી ગયો.

ડરી ગયેલી એર હોસ્ટેસ રડવા લાગી હતી અને ધ્રૂજી રહી હતી. કેપ્ટન દ્વારા આ અંગે ચાંગી એરપોર્ટ (Changi Airport) ના સત્તાવાળાઓને અગાઉથી જ જાણ કરી દેવામાં આવી હતી, જેથી ફ્લાઇટ લેન્ડ થતાં જ પોલીસે આરોપીની ધરપકડ કરી લીધી હતી.

સરકારી વકીલોએ દલીલ કરી હતી કે આરોપીના મિત્રોના હસવાના કારણે પીડિતાનું અપમાન વધુ ગંભીર બન્યું હતું, જેના આધારે કોર્ટે સખત સજા ફટકારી છે.