ઓસ્ટ્રેલિયાના બોન્ડી આતંકી હુમલામાં ઘાયલ થયાનું નાટક કરી વળતર મેળવવાનો પ્રયાસ, ભારતીય નાગરિક સામે છેતરપિંડીનો આરોપ

ઓસ્ટ્રેલિયાના સિડનીમાં આવેલા બોન્ડી બીચ પર ડિસેમ્બર 2025માં થયેલા ભયાનક આતંકી હુમલાનો લાભ લઈને વળતર મેળવવાનો પ્રયાસ કર્યાનો એક ભારતીય નાગરિક સામે આરોપ લાગ્યો છે. પોલીસના જણાવ્યા અનુસાર, 46 વર્ષીય ભારતીય નાગરિકે હુમલા દરમિયાન શ્રેપનલ (વિસ્ફોટના ટુકડા) વાગવાથી પોતાને ઈજા થઈ હોવાનો ખોટો દાવો કર્યો હતો. જોકે, તપાસમાં સામે આવ્યું હોવાનું કહેવાય છે કે ઘટના સમયે તે બોન્ડી બીચ પર હાજર જ નહોતો.

પોલીસ તપાસમાં ખોટા દાવાનો પર્દાફાશ
મીડિયા અહેવાલો અનુસાર, સિમેક્સવેલ સિરિલ નામના ભારતીય નાગરિકે 14 ડિસેમ્બર 2025ના રોજ બોન્ડી બીચ પર થયેલા આતંકી હુમલા દરમિયાન પોતાને ઈજા થઈ હોવાનો દાવો કર્યો હતો. તેણે હુમલામાં ઘાયલ થયો હોવાનું જણાવી વળતર મેળવવાનો પ્રયાસ કર્યો હતો.

જોકે, ઓસ્ટ્રેલિયાની ન્યૂ સાઉથ વેલ્સ પોલીસની તપાસ દરમિયાન તેના દાવા અંગે શંકા ઊભી થઈ હતી. તપાસકર્તાઓના જણાવ્યા અનુસાર, હુમલા સમયે તે ઘટનાસ્થળે હાજર નહોતો અને તેને કોઈ ઈજા પણ થઈ નહોતી. આ મામલે પોલીસે તેની સામે ખોટી અથવા ગેરમાર્ગે દોરતી માહિતી આપીને આર્થિક લાભ મેળવવાનો પ્રયાસ કરવા સહિતના આરોપો હેઠળ કાર્યવાહી કરી છે.

આરોપી સામે કાયદેસરની કાર્યવાહી
અહેવાલ મુજબ, પોલીસ દ્વારા ધરપકડ કરવામાં આવ્યા બાદ આરોપીને શરતી જામીન આપવામાં આવ્યા હતા. તેને 18 નવેમ્બર 2026ના રોજ પેરામેટા લોકલ કોર્ટમાં હાજર થવાનું રહેશે.

દરમિયાન, તેનો વિઝા સમયગાળો પૂર્ણ થયા બાદ પણ ઓસ્ટ્રેલિયામાં રોકાયો હોવાની બાબત સામે આવતાં ઓસ્ટ્રેલિયન બોર્ડર ફોર્સ દ્વારા તેને ઇમિગ્રેશન કસ્ટડીમાં લેવામાં આવ્યો હોવાનું અહેવાલમાં જણાવાયું છે. તેને વિલવુડ ઇમિગ્રેશન ડિટેન્શન સેન્ટરમાં રાખવામાં આવ્યો છે. ફોજદારી કાર્યવાહી પૂર્ણ થયા બાદ તેને દેશનિકાલ કરવાની શક્યતા પણ વ્યક્ત કરવામાં આવી છે.

ઉલ્લેખનીય છે કે 14 ડિસેમ્બર 2025ના રોજ બોન્ડી બીચ પર હનુક્કાહ પર્વની ઉજવણી દરમિયાન થયેલા આતંકી હુમલામાં 15 લોકોનાં મોત થયાં હતાં અને અનેક લોકો ઘાયલ થયા હતા. આ દુઃખદ ઘટનાનો લાભ લઈને વળતર મેળવવા ખોટો દાવો કરવાના આરોપને પગલે આ મામલો ઓસ્ટ્રેલિયામાં ચર્ચાનો વિષય બન્યો છે.

નોંધ: આરોપો અંગેનો અંતિમ નિર્ણય કોર્ટ દ્વારા લેવામાં આવશે.