અમેરિકાના ભારતીય મૂળના મુસ્લિમ કર્મચારી પર છરીના 15 ઘા ઝીંકાયા

Utah Mall Stabbing | અમેરિકાના ઉટાહ (Utah) રાજ્યમાંથી એક અત્યંત હૃદયદ્રાવક અને ચોંકાવનારી ઘટના સામે આવી છે, જ્યાં વેસ્ટ વેલી સિટીમાં (West Valley City) આવેલા વેલી ફેર મોલ (Valley Fair Mall)ની અંદર 13 જુલાઈ 2026ના રોજ એક ધર્મ આધારિત પૂર્વનિયોજિત હુમલો (Premeditated Attack) કરવામાં આવ્યો છે.

મોલમાં આવેલા એક જ્વેલરી કિયોસ્ક (Jewelry Kiosk) પર કામ કરતા ભારતીય મૂળના મુસ્લિમ કર્મચારી સૈયદ સોહાઈલુદ્દીન (Syed Sohailuddin) પર એક 48 વર્ષીય શખ્સે ધર્મના નામે 15થી વધુ વાર ચપ્પુના ઘા ઝીંકીને જીવલેણ હુમલો કર્યો હતો.

આ ભયાનક નફરત ગુના એટલે કે હેટ ક્રાઇમ (Hate Crime) ની ઘટનાએ સમગ્ર અમેરિકામાં રહેતા ભારતીય સમુદાય અને મુસ્લિમ સમુદાયને આઘાતમાં મૂકી દીધો છે. પોલીસે આરોપી પીટર માઇકલ લાર્સન (Peter Michael Larsen) ની ઘટનાસ્થળેથી જ ધરપકડ કરી લીધી છે.

પોલીસ એફિડેવિટ (Police Affidavit) અને ચાર્જિંગ ડોક્યુમેન્ટ્સ (Charging Documents) અનુસાર, આ ઘટના બપોરે આશરે ૨:૩૦ વાગ્યે બની હતી. આરોપી પીટર માઇકલ લાર્સન મોલમાં આવ્યો અને તેણે કિયોસ્ક પર હાજર સોહાઈલ પાસે પીવાનું પાણી માંગ્યું હતું.

સોહાઈલ જ્યારે પાણી લેવા ગયો ત્યારે લાર્સને તેની સાથે વાતચીત શરૂ કરી અને પૂછ્યું કે તે ક્યાંનો વતની છે. સોહાઈલે જવાબ આપ્યો કે તે ‘ભારત’ (India) નો છે. ત્યારબાદ લાર્સને પૂછ્યું કે શું તે મુસ્લિમ (Muslim) છે? સોહાઈલે ‘હા’ પાડી કે તરત જ આરોપીએ અમેરિકન ફ્લેગ (American Flag) ની ડિઝાઇનવાળું અને બ્રાસ નકલ હેન્ડલ (Brass Knuckle Handle) ધરાવતું પોકેટનાઇફ (Pocketknife – ચપ્પુ) કાઢ્યું અને સોહાઈલ પર તૂટી પડ્યો હતો.

આરોપીએ સોહાઈલના ગળા, ડાબા હાથ, માથા અને છાતીના ભાગે આડેધડ ચપ્પુના ૧૨ થી ૧૫ ઘા માર્યા હતા. આ ઘાતકી હુમલા દરમિયાન સોહાઈલ ઘૂંટણભર થઈને ભગવાન અને તેની માતાને મદદ માટે પોકારી રહ્યો હતો. મોલમાં હાજર અન્ય ગ્રાહકો અને બાયસ્ટેન્ડર્સ (Bystanders – પ્રત્યક્ષદર્શીઓ) તરત જ મદદે દોડ્યા હતા.

સોહાઈલના એક મુસ્લિમ મિત્રએ આરોપીને રોકવાનો પ્રયાસ કર્યો તો લાર્સને તેના પર પણ હુમલો કરી દીધો અને ‘હવે તારો વારો છે’ (You’re next) તેવી ધમકી આપી હતી. છેવટે, કેટલાક બહાદુર લોકોએ આરોપી પર વસ્તુઓ ફેંકી અને તેને ત્રણ-ચાર મુક્કા મારીને બેભાન કરી દીધો, જેના કારણે ચપ્પુ તેના હાથમાંથી છૂટી ગયું અને પોલીસ ન આવે ત્યાં સુધી તેને પકડી રાખ્યો હતો. જો લોકોએ સમયસર હસ્તક્ષેપ (Intervene) ન કર્યો હોત તો મોટી જાનહાનિ થઈ શકી હોત.

આરોપી પીટર માઇકલ લાર્સને પોલીસ પૂછપરછમાં જે ખુલાસા કર્યા છે તે ધ્રુજારી પેદા કરનારા છે. લાર્સને સ્વીકાર્યું છે કે તેનો હેતુ સોહાઈલની હત્યા કરવાનો જ હતો કારણ કે તે મુસ્લિમ હતો. તેણે જણાવ્યું કે તે દેશમાંથી મુસ્લિમોને હાંકી કાઢવા માટે એક કેટાલિસ્ટ (Catalyst – પ્રેરકબળ) બનવા માંગતો હતો. તેણે પ્લાન કર્યો હતો કે તે સોહાઈલનું માથું કાપીને (Decapitate) મોલના હોલવેમાં ફેંકશે જેથી લોકોમાં ડર પેદા થાય.

એટલું જ નહીં, આરોપીએ સોહાઈલનું હૃદય ખાવાની (Eat his heart) પણ ઈચ્છા વ્યક્ત કરી હતી જેથી આ ઘટના વધુ ડ્રામેટિક (Dramatic) બને. લાર્સને કહ્યું કે જો તેને મોકો મળ્યો હોત તો તે મોલમાં હાજર તમામ મુસ્લિમોને મારી નાખત.

આરોપીના પરિવારજનોએ જણાવ્યું કે લાર્સન સોશિયલ મીડિયા (Social Media) પર ઇસ્લામ વિરુદ્ધ ફેલાતી નકારાત્મક પ્રોપગેન્ડા (Propaganda) અને અફવાઓથી પ્રભાવિત થઈ ગયો હતો અને તે મેક્સિકન તથા આફ્રિકન અમેરિકનો પ્રત્યે પણ અત્યંત રંગભેદી (Racist) વિચારો ધરાવે છે.

સોલ્ટ લેક કાઉન્ટીના ડિસ્ટ્રિક્ટ એટર્ની (District Attorney) સિમ ગિલે (Sim Gill) જણાવ્યું છે કે પુરાવાઓના આધારે આરોપી સામે ‘એટેમ્પ્ટેડ એગ્રેવેટેડ મર્ડર’ (Attempted Aggravated Murder – હત્યાનો પ્રયાસ) ના બે ગુના નોંધાયા છે અને તેને ‘હેટ ક્રાઇમ પેનલ્ટી એન્હાન્સમેન્ટ’ (Hate Crime Penalty Enhancement) હેઠળ ગંભીર સજા અપાવવા પ્રોસિક્યુશન પ્રયાસ કરશે.

લાર્સન એક રીઢો ગુનેગાર છે અને ૨૦૨૨ માં પણ તેણે પોલીસ પર ફાયરિંગ કરવાનો પ્રયાસ કર્યો હતો, જેમાં તે પોલીસની ગોળીએ ઘવાયો હતો અને જેલમાંથી જાન્યુઆરી ૨૦૨૫ માં જ પેરોલ (Parole) પર બહાર આવ્યો હતો.

કાઉન્સિલ ઓન અમેરિકન-ઇસ્લામિક રિલેશન્સ (CAIR) અને ઉટાહ ઇસ્લામિક સેન્ટરના ઇમામ શુએબ દીને (Imam Shuaib Din) આ હુમલાને સમગ્ર મુસ્લિમ સમુદાય પરનો હુમલો ગણાવી સખત શબ્દોમાં નિંદ્યા કરી છે.

બીજી તરફ, પીડિત સોહાઈલ હાલ હોસ્પિટલમાં ગંભીર હાલતમાં સારવાર હેઠળ છે. તેના હૃદય, ફેફસાં અને હાથ પર ગંભીર ઈજાઓ થઈ છે અને મલ્ટિપલ સર્જરી (Multiple Surgeries) કરવામાં આવી છે.

સોહાઈલ તેના પરિવારમાં એકમાત્ર કમાનાર સભ્ય છે અને તેને બે નાના બાળકો છે. તેના મેડિકલ ખર્ચ અને પરિવારની સહાય માટે કમ્યુનિટી દ્વારા ગોફંડમી (GoFundMe) કેમ્પેઈન શરૂ કરવામાં આવ્યું છે, જેમાં શુક્રવાર બપોર સુધીમાં જ આશરે $3,40,000નું ફંડ એકત્રિત થઈ ચૂક્યું છે. સોહાઈલે હોસ્પિટલના બેડ પરથી જ એક વીડિયો સંદેશ દ્વારા તેને બચાવનારા બહાદુર લોકો અને આર્થિક મદદ કરનારા તમામ લોકોનો નબળા અવાજે આભાર માન્યો હતો.