અમેરિકામાં ભારતીય મૂળના વકીલ પર સંકટ: નકલી આશ્રય અરજીઓ માટે $470K ના દંડની કાર્યવાહી

US Asylum Fraud | યુનાઇટેડ સ્ટેટ્સ (USA) ના ડિપાર્ટમેન્ટ ઓફ હોમલેન્ડ સિક્યોરિટી (DHS) અને ઇમિગ્રેશન એન્ડ કસ્ટમ્સ એન્ફોર્સમેન્ટ (ICE) એ એક ભારતીય મૂળના ઇમિગ્રેશન વકીલ સામે લગભગ $471,000 (આશરે 4 કરોડ રૂપિયા) નો સિવિલ દંડ ફટકારવાની પ્રક્રિયા શરૂ કરી છે. વકીલ સૂરજ રાજ સિંઘ (Suraj Raj Singh) પર આરોપ છે કે તેમણે પોતાના અસીલો માટે કથિત રીતે ‘કોપી-પેસ્ટ’ (Copy-Paste) કરીને એકસરખી ઉત્પીડનની વાર્તાઓ સાથે દઝનબંધ ખોટી આશ્રય (Asylum) અરજીઓ દાખલ કરી હતી.

ICE દ્વારા જાહેર કરાયેલ નોટિસ ઓફ ઇન્ટેન્ટ ટુ ફાઇન અનુસાર, સિંઘે 54 ઇમિગ્રેશન કેસોમાં 118 બનાવટી દસ્તાવેજો તૈયાર કરીને રજૂ કર્યા હતા. અધિકારીઓનો દાવો છે કે સિંઘે અલગ-અલગ ક્લાયન્ટ્સ માટે લગભગ સમાન ભાષા અને કિસ્સાઓનો ઉપયોગ કર્યો હતો. આ કાર્યવાહી ટ્રમ્પ પ્રશાસન (Trump Administration) દ્વારા ઇમિગ્રેશન વકીલો દ્વારા કરવામાં આવતા આશ્રય ફ્રોડ સામેના કડક અભિયાનનો એક ભાગ છે.

ફેડરલ સત્તાવાળાઓ 8 U.S.C. § 1324c હેઠળ મહત્તમ $470,584 નો દંડ વસૂલવાનો પ્રયાસ કરી રહ્યા છે. આ પહેલાં ગયા મહિને પણ અન્ય એક ઇમિગ્રેશન વકીલ વિનોદ દૌડામાની (Vinod Doddamani) સામે 32 કેસોમાં 64 બનાવટી દસ્તાવેજો રજૂ કરવા બદલ $250,000 થી વધુનો દંડ ફટકારવાની કાર્યવાહી કરવામાં આવી હતી.

જોકે, આ કાર્યવાહી વહીવટી પ્રકૃતિની (Administrative) છે અને તેનાથી ગુનો સાબિત થતો નથી. સૂરજ રાજ સિંઘ પાસે એડમિનિસ્ટ્રેટિવ લો જજ સમક્ષ આ આરોપોને પડકારવાનો અને કાનૂની સમીક્ષા માંગવાનો અધિકાર રહેશે.