‘અમેરિકા માટે ભારત સૌથી મહત્વનું’: ટ્રમ્પ આવતા વર્ષે ભારત આવશે: સર્જિયો ગોર

Sergio Gor India Visit | અમેરિકાના નવા રાજદૂત સર્જિયો ગોર (Sergio Gor) એ ભારતમાં સત્તાવાર રીતે પોતાનો કાર્યભાર સંભાળી લીધો છે. પદ સંભાળતાની સાથે જ તેમણે વડાપ્રધાન નરેન્દ્ર મોદી અને રાષ્ટ્રપતિ ડોનાલ્ડ ટ્રમ્પ (Donald Trump) વચ્ચેના ગાઢ સંબંધો તેમજ ભારત-અમેરિકાના વ્યૂહાત્મક હિતો પર મોટું નિવેદન આપ્યું છે.

PM મોદી અને ટ્રમ્પની અતૂટ દોસ્તી

સર્જિયો ગોરે દિલ્હીમાં પત્રકારોને સંબોધતા કહ્યું કે, “મેં રાષ્ટ્રપતિ ટ્રમ્પ સાથે આખી દુનિયાનો પ્રવાસ કર્યો છે અને હું ખાતરીપૂર્વક કહી શકું છું કે વડાપ્રધાન મોદી (PM Modi) સાથે તેમની મિત્રતા એકદમ સાચી અને અતૂટ છે.” તેમણે ઉમેર્યું કે ભારત અને અમેરિકા માત્ર હિતોથી જ નહીં, પરંતુ ઉચ્ચ સ્તરની મિત્રતાથી જોડાયેલા છે. જો મિત્રો વચ્ચે ક્યારેક મતભેદ થાય, તો પણ તેઓ સાથે મળીને તેને ઉકેલી લે છે.

2025 માં ટ્રમ્પની ભારત મુલાકાત?

રાજદૂતે મહત્વપૂર્ણ સંકેત આપતા જણાવ્યું હતું કે રાષ્ટ્રપતિ ડોનાલ્ડ ટ્રમ્પ આવતા વર્ષ (2025) સુધીમાં ભારતની મુલાકાત લઈ શકે છે. ટ્રમ્પ હાલમાં વોશિંગ્ટન ડી.સી. ને નવું સ્વરૂપ આપવામાં વ્યસ્ત હોવા છતાં, ભારત પ્રત્યેનો તેમનો લગાવ ઓછો થયો નથી.

ઈન્ડિયા ગેટની પ્રશંસા અને નવો પ્રોજેક્ટ

સર્જિયો ગોરે એક રસપ્રદ વાત શેર કરતા કહ્યું કે ટ્રમ્પ વ્હાઇટ હાઉસ (White House) માં પેરિસના ‘આર્ક ડી ટ્રાયમ્ફ’ (Arc de Triomphe) જેવો જ એક પ્રોજેક્ટ બનાવવા માંગે છે. જોકે, ગોરે મજાકમાં કહ્યું કે પેરિસ કરતા દિલ્હીમાં આવેલો ઈન્ડિયા ગેટ (India Gate) કદાચ વધુ સુંદર છે અને ટ્રમ્પ પણ તેનાથી પ્રભાવિત છે.

સર્જિયો ગોરે સ્પષ્ટ કર્યું હતું કે અમેરિકા માટે ભારતથી વધુ મહત્વનું બીજું કોઈ રાષ્ટ્ર નથી અને બંને દેશો વચ્ચેના ટ્રેડ ડીલ (Trade Deal) ને અંતિમ ઓપ આપવા માટે તેઓ દ્રઢ નિશ્ચયી છે.