USA માં માર્ગ દુર્ઘટના બાદ તેલંગાણાના યુવકનું મોત: જન્મદિવસના દિવસે જ હોસ્પિટલમાં દમ તોડ્યો

Telangana Techie Death | અમેરિકાના મિશિગન (Michigan) રાજ્યમાં બનેલી એક દુઃખદ ઘટનામાં તેલંગાણા (Telangana)ના નિર્મલ (Nirmal) જિલ્લાના 26 વર્ષીય યુવક નિત્યાનંદ રેડ્ડી ગાન્નુ (Nithyananda Reddy Gannu)નું રોડ અકસ્માત બાદ સારવાર દરમિયાન મોત થયું છે.

ભારતમાંથી માસ્ટર્સ (Master’s Degree) નો અભ્યાસ પૂર્ણ કર્યા બાદ ડેઇટ્રોઇટ (Detroit) માં સોફ્ટવેર એન્જિનિયર તરીકે સ્થાયી થયેલા નિત્યાનંદના અવસાનથી તેના વતન નરસાપુર ગામમાં ભારે શોકની કાલીમા છવાઈ ગઈ છે.

મળતી માહિતી મુજબ, 18 જુલાઈના રોજ નિત્યાનંદ પોતાની ટૂ-વ્હીલર (Two-Wheeler) પર જઈ રહ્યો હતો ત્યારે એક કારે તેને જોરદાર ટક્કર મારી હતી.

આ અકસ્માતમાં તેને ગંભીર ફેક્ચર (Fracture) અને અન્ય ઇજાઓ થઈ હતી. તેના મિત્રોએ તેને તાત્કાલિક હોસ્પિટલમાં દાખલ કર્યો હતો જ્યાં ઇમરજન્સી સર્જરી (Emergency Surgery) કરવામાં આવી હતી.

સર્જરી બાદ એક દુર્લભ મેડિકલ પરિસ્થિતિ જેને ‘સેરેબ્રલ ફેટ એમ્બોલિઝમ’ (Cerebral Fat Embolism) કહેવામાં આવે છે તે સર્જાઈ હતી. આ સ્થિતિમાં હાડકાના ફેક્ચરથી ફેટના કણો લોહીના પ્રવાહ દ્વારા મગજ સુધી પહોંચી જાય છે અને ક્લોટ્સ (Clots) બનાવે છે. તેના કારણે તેનું બ્રેન ડેડ (Brain Dead) થતાં નિધન થયું હતું.

આ કરૂણ ઘટનામાં સૌથી હૃદયસ્પર્શી બાબત એ હતી કે 23 જુલાઈના રોજ નિત્યાનંદનો જન્મદિવસ (Birthday) હતો. તે જ દિવસે આશામાં ને આશામાં તેના મિત્રોએ હોસ્પિટલમાં બેડસાઇડ પર તેનો જન્મદિવસ ઉજવ્યો હતો, પરંતુ થોડી જ વારમાં તબીબોએ તેને મૃત જાહેર કર્યો હતો.

તેના મિત્રો અને પરિવારે પાર્થિવ દેહને ભારત લાવવા (Repatriation) અને તબીબી ખર્ચ માટે ગોફંડમી (GoFundMe) પર કેમ્પેઇન શરૂ કર્યું હતું, જેમાં લોકોએ $67,000થી વધુનું ફંડ એકઠું કર્યું છે. હાલ પરિવારજનો તેના મૃતાત્માના અંતિમ સંસ્કાર માટે દેહને વતનમાં લાવવાની રાહ જોઈ રહ્યા છે.