ઉરીમાં ભારતીય સેનાએ ઘૂસણખોરીનો પ્રયાસ નિષ્ફળ બનાવ્યો, એક પાકિસ્તાની આતંકી ઠાર

જમ્મુ અને કાશ્મીરના (Jammu and Kashmir) ઉરી સેક્ટરમાં (Uri Sector) ભારતીય સુરક્ષા દળોને મોટી સફળતા મળી છે. શનિવારે ભારતીય સેના (Indian Army) અને જમ્મુ-કાશ્મીર પોલીસ દ્વારા હાથ ધરવામાં આવેલા એક સંયુક્ત ઓપરેશનમાં (Joint Operation) એક પાકિસ્તાની આતંકીને ઠાર કરવામાં આવ્યો છે. ભારતીય સેનાની ચિનાર કોર્પ્સ (Chinar Corps) દ્વારા સોશિયલ મીડિયા પર આ અંગે સત્તાવાર માહિતી આપવામાં આવી છે.

જમ્મુ-કાશ્મીર પોલીસને સરહદ પારથી આતંકીઓની ઘૂસણખોરી (Infiltration) અંગે સચોટ બાતમી મળી હતી. જેના આધારે સુરક્ષા દળોએ 14 અને 15 માર્ચની મધ્યરાત્રિએ બુચ્છર વિસ્તારમાં ‘ઓપરેશન દિગ્ગી 2’ (Op Diggi 2) લોન્ચ કર્યું હતું.

સર્ચ ઓપરેશન દરમિયાન એલર્ટ જવાનોએ ગીચ ઝાડીઓમાં શંકાસ્પદ હલચલ જોઈ હતી. જ્યારે જવાનોએ શંકાસ્પદ વ્યક્તિને પડકાર્યો, ત્યારે આતંકીએ સુરક્ષા દળો પર અંધાધૂંધ ગોળીબાર (Firing) શરૂ કરી દીધો હતો. વળતા પ્રહારમાં ભારતીય જવાનોએ આતંકીને સ્થળ પર જ ખતમ કરી દીધો હતો.

એન્કાઉન્ટર (Encounter) બાદ સર્ચ દરમિયાન ઘટનાસ્થળેથી એક એકે રાઇફલ (AK Rifle), પિસ્તોલ અને મોટા જથ્થામાં દારૂગોળો (Ammunition) સહિતનો યુદ્ધ જેવો સામાન મળી આવ્યો છે.

સેનાના જણાવ્યા અનુસાર, હાલમાં આ વિસ્તારમાં ઓપરેશન ચાલુ છે અને વધુ તપાસ કરવામાં આવી રહી છે. આ સફળતાથી સરહદ પર આતંકી મનસૂબાઓને મોટો ફટકો પડ્યો છે.