Bavla News | અમદાવાદ જિલ્લા મહિલા અને બાળ અધિકારીની કચેરી દ્વારા મહિલા સુરક્ષા અને સશક્તિકરણ અભિયાનના ભાગરૂપે, બાવળા તાલુકાના જેકડા ગામે ઘરેલુ હિંસા અધિનિયમ, 2005 પર એક મહત્વપૂર્ણ કાયદાકીય માર્ગદર્શન સેમિનાર યોજાયો હતો. આ કાર્યક્રમનો મુખ્ય હેતુ ગ્રામ્ય સ્તરની મહિલાઓમાં કાનૂની જાગૃતિ ફેલાવીને તેમને પોતાના હકો અંગે સજાગ અને સશક્ત બનાવવાનો હતો.
બાવળા તાલુકા કાનૂની સેવા સત્તા મંડળના પેનલ એડવોકેટ્સ દ્વારા મહિલાઓને ઘરેલુ હિંસાના વિવિધ સ્વરૂપો (શારીરિક, માનસિક, આર્થિક) અને તેની ઓળખ કેવી રીતે કરવી તેની સમજણ આપી હતી. તેમણે ઘરેલુ હિંસા અધિનિયમ, ૨૦૦૫ હેઠળ મહિલાઓ માટે ઉપલબ્ધ કાનૂની જોગવાઈઓ, જેમ કે સુરક્ષા આદેશ, નિવાસ આદેશ, મેન્ટેનન્સ (વળતર) અને કાઉન્સેલિંગ સુવિધાઓ વિશે સરળ માર્ગદર્શન પૂરું પાડ્યું હતું. મહિલાઓએ ઉત્સાહથી ભાગ લઈને પોતાના પ્રશ્નોનું નિવારણ મેળવ્યું હતું.
કાર્યક્રમમાં મહિલાઓને તાત્કાલિક સહાય માટે ઉપલબ્ધ મહત્ત્વની સેવાઓ જેવી કે 181 મહિલા હેલ્પલાઇન, મહિલા પોલીસ સ્ટેશન, આશ્રય ગૃહ, અને કાઉન્સેલિંગ સેન્ટર વિશે વિગતવાર માહિતી આપવામાં આવી હતી. સંકલ્પ: હબ ફોર એમ્પાવરમેન્ટ ઓફ વિમન યોજનાની ટીમે મહિલાઓને નિર્ભય બનીને પોતાના હકો માટે અવાજ ઉઠાવવા માટે પ્રેરિત કર્યા હતા.
સેમિનારના અંતે સહભાગી મહિલાઓને કીટ વિતરણ કરવામાં આવ્યું હતું. જિલ્લા કચેરીએ આ અભિયાન અંતર્ગત વધુ ગામોમાં આવા કાર્યક્રમો ચાલુ રાખવાની પ્રતિબદ્ધતા વ્યક્ત કરી છે.