કચ્છમાં ISISની વિચારધારાનો પ્રચાર કરનાર લોડાઈનો શખસ ઝડપાયો

Kutch SOG Action | કચ્છ જિલ્લામાં સોશિયલ મીડિયા (Social Media) દ્વારા દેશવિરોધી પ્રવૃત્તિઓ કરનારા તત્ત્વો સામે પોલીસે કડક કાર્યવાહી હાથ ધરી છે.

પશ્ચિમ કચ્છ સ્પેશિયલ ઓપરેશન ગ્રુપ (SOG) એ ભુજ તાલુકાના લોડાઈ ગામમાંથી એક શખસની અટકાયત કરી છે. આ શખસ પ્રતિબંધિત આતંકી સંગઠન ISIS (ઇસ્લામિક સ્ટેટ ઓફ ઇરાક એન્ડ સીરિયા) ની વિચારધારાનો પ્રચાર કરવા અને ઉશ્કેરણીજનક સામગ્રી ફેલાવવામાં સંડોવાયેલો હતો.

બાતમીના આધારે હાથ ધરાયેલી તપાસમાં સામે આવ્યું કે, ફકીરમામદ ઈસા ગગડા નામનો આ શખસ છેલ્લા 4 વર્ષથી સોશિયલ મીડિયા પર સક્રિય હતો.

તે સતત એવી ઉશ્કેરણીજનક પોસ્ટ્સ અને કન્ટેન્ટ (Content) શેર કરતો હતો જેનાથી દેશની એકતા અને અખંડિતતા જોખમાય. SOG દ્વારા હાથ ધરાયેલા ટેકનિકલ સર્વેલન્સ (Technical Surveillance) માં તેના કનેક્શન અને આતંકવાદી સંગઠનને પ્રોત્સાહન આપતી વિગતો ચોંકાવનારી રીતે બહાર આવી છે.

આ ગંભીર ગુના બદલ આરોપી સામે પધ્ધર પોલીસ સ્ટેશનમાં વિધિવત ફરિયાદ નોંધાવવામાં આવી છે. પોલીસ હવે તેના ડિજિટલ ઉપકરણો (Digital Devices) ની ઝીણવટભરી તપાસ કરી રહી છે જેથી જાણી શકાય કે તે અન્ય કોઈ આંતરરાષ્ટ્રીય કે સ્થાનિક નેટવર્ક સાથે જોડાયેલો હતો કે કેમ.