અમેરિકામાં વિમાન દુર્ઘટનામાં 24 વર્ષીય ભારતીય ટેક પ્રોફેશનલ સાઈ કાર્તિકનું મોત, કમ્પ્યુટર સાયન્સમાં કર્યું હતું માસ્ટર્સ

Missouri Plane Crash | અમેરિકાના (America) મિઝોરીમાં (Missouri) એક ભયાનક વિમાન દુર્ઘટનામાં (Plane Crash) 24 વર્ષીય ભારતીય ટેકનોલોજી પ્રોફેશનલ સાઈ કાર્તિક વર્મા દાતલા (Sai Karthik Varma Datla) સહિત 12 લોકોના કરુણ મોત નીપજ્યા છે.

આ અકસ્માત 14 જૂનના રોજ બટલર મેમોરિયલ એરપોર્ટ (Butler Memorial Airport) પરથી ટેક-ઓફ થયાના ગણતરીના સમયમાં જ સર્જાયો હતો, જેમાં સ્કાયડાઈવિંગ (Skydiving) એરક્રાફ્ટ ક્રેશ થઈ ગયું હતું.

યુએસએમાં કરિયર બનાવવાનું સપનું અધૂરું રહ્યું
બેટ્સ કાઉન્ટી કોરોનર ઓફિસ (Bates County Coroner’s Office) દ્વારા અકસ્માતના બે દિવસ બાદ પીડિતોની ઓળખ જાહેર કરવામાં આવી હતી. આ પેસિફિક એરોસ્પેસ P750XL (Pacific Aerospace P750XL) વિમાનમાં સવાર 12 લોકોમાં સાઈ કાર્તિક એકમાત્ર ભારતીય નાગરિક હતા.

મૂળ ભારતના સાઈ કાર્તિક જાન્યુઆરી 2023માં ઉચ્ચ શિક્ષણ મેળવવા અને ટેકનોલોજી ક્ષેત્રે ઉજ્જવળ કરિયર (Career) બનાવવા માટે અમેરિકા આવ્યા હતા. તેમણે તાજેતરમાં જ યુનિવર્સિટી ઓફ સેન્ટ્રલ મિઝોરીમાંથી (University of Central Missouri) કમ્પ્યુટર સાયન્સમાં માસ્ટર્સ ડિગ્રી મેળવી હતી અને તેઓ કેન્સાસ સિટી (Kansas City) મેટ્રોપોલિટન વિસ્તારમાં હેલ્થકેર ટેકનોલોજી સેક્ટરમાં કામ કરી રહ્યા હતા.

કેવી રીતે સર્જાયો અકસ્માત?
આ અકસ્માત કેન્સાસ સિટીથી આશરે 70 માઈલ દક્ષિણમાં આવેલા બટલર મેમોરિયલ એરપોર્ટ પર સવારે 11:30 વાગ્યે થયો હતો. પ્રત્યક્ષદર્શીઓ અને તપાસકર્તાઓના જણાવ્યા અનુસાર, વિમાને ટેક-ઓફ કર્યા બાદ તરત જ તે પાછું વળ્યું હતું અને તેમાં કોઈ ટેકનિકલ ખામી સર્જાઈ હોવાનું જણાતું હતું.

એરપોર્ટની પ્રોપર્ટી પર જ પ્લેન ક્રેશ થતાં જ તેમાં ભીષણ આગ લાગી ગઈ હતી, જેના કારણે પાયલોટ અને 11 સ્કાયડાઇવર્સ સહિત તમામ 12 લોકોના ઘટનાસ્થળે જ મોત નીપજ્યા હતા. આ પ્લેનનું સંચાલન ‘સ્કાયડાઈવ કેન્સાસ સિટી’ (Skydive Kansas City) દ્વારા કરવામાં આવી રહ્યું હતું.

પરિવારની મદદ માટે GoFundMe કેમ્પેઈન શરૂ
સાઈ કાર્તિકના મિત્રોએ તેમને અત્યંત મહેનતુ, દયાળુ અને પરિવાર પ્રત્યે સમર્પિત યુવાન તરીકે યાદ કર્યા હતા. તેમના પરિવારને આ મુશ્કેલ સમયમાં આર્થિક સહાય પૂરી પાડવા માટે પારિવારિક મિત્ર સોમેશ્વર રાવ કોલા દ્વારા એક ગોફંડમી (GoFundMe) ઝુંબેશ શરૂ કરવામાં આવી છે. હાલમાં નેશનલ ટ્રાન્સપોર્ટેશન સેફ્ટી બોર્ડ (NTSB) દ્વારા આ અકસ્માતના કારણોની તપાસ કરવામાં આવી રહી છે, જેનો અંતિમ અહેવાલ આવતા કેટલાક મહિનાઓ લાગી શકે છે.