ફ્લોરિડામાં 7 વર્ષના બાળકના ડૂબી જવાથી મોત મામલે ભારતીય મૂળની ડૉક્ટરની ધરપકડ

Doctor Arrested Florida | અમેરિકાના લુઈઝિયાના રાજ્યની એક ભારતીય મૂળની મહિલા ડૉક્ટરની ફ્લોરિડામાં ધરપકડ કરવામાં આવી છે.

આ ડૉક્ટર પર 7 વર્ષના બાળકના ડૂબી જવાથી થયેલા મોત મામલે ગુનો દાખલ કરવામાં આવ્યો છે, કારણ કે આ ઘટના બની ત્યારે બાળક તેની દેખરેખ હેઠળ હતું.

પોલીસ તપાસ અનુસાર, આ ગંભીર ઘટના ગત એપ્રિલ મહિનામાં ફ્લોરિડાના ઓર્લાન્ડોમાં એક કોમ્યુનિટી સ્વિમિંગ પુલ પર બની હતી.

આરોપી ડૉક્ટરની ઓળખ સુકાન્થિની “સુકી” સુબૈયા તરીકે થઈ છે, જેઓ વ્યવસાયે ચિકિત્સક છે. તપાસકર્તાઓના જણાવ્યા અનુસાર, ડૉક્ટર સુબૈયા એપ્રિલમાં પોતાના પરિવારને મળવા ઓર્લાન્ડો ગયા હતા અને તેઓ પોતાના 7 વર્ષના પુત્ર તેમજ પડોશના બે 7 વર્ષના જોડિયા બાળકોને સ્વિમિંગ પુલ પર લઈ ગયા હતા.

જોડિયા બાળકોની માતાએ તેમને બાળકોને સ્વિમિંગ માટે લઈ જવાની પરવાનગી આપી હતી. તપાસમાં સામે આવ્યું કે ડૂબી ગયેલા બાળક કુશીલ બંડીએ લાઇફ જેકેટ પહેર્યું ન હતું, જોકે તેની બહેને પહેર્યું હતું. ડૉક્ટરે પૂછપરછ દરમિયાન જણાવ્યું હતું કે તેમને લાગ્યું કે બાળકને તરતા આવડે છે.

ઘટનાના સીસીટીવી ફૂટેજ મુજબ, બાળકો સાંજે 6:19 વાગ્યે પુલમાં પ્રવેશ્યા હતા અને થોડી જ મિનિટોમાં બાળક પાણીમાં સંઘર્ષ કરતો દેખાયો હતો તેમજ 6:21 વાગ્યે તે પાણીમાં ડૂબી ગયો હતો.

પોલીસનો દાવો છે કે ડૉક્ટર સુબૈયાએ બાળકના ડૂબવાના વિસ્તાર તરફ જોયું હોવા છતાં તરત જ તેને બચાવવા માટે કોઈ પગલાં લીધા ન હતા.

આશરે ૬:૨૬ વાગ્યે તેમણે પુલમાં પ્રવેશ કર્યો હતો પરંતુ પાણી ઘૂંટણ સુધી પહોંચતા જ તેઓ અટકી ગયા હતા અને અન્ય બે બાળકોને ડૂબેલા બાળકને બહાર કાઢવા કહ્યું હતું. બાદમાં અન્ય એક વ્યક્તિએ બાળકને બહાર કાઢ્યો હતો પરંતુ હોસ્પિટલમાં તેનું મોત નીપજ્યું હતું.

પોલીસ અને તપાસકર્તાઓનું કહેવું છે કે ડૉક્ટર હોવાને કારણે તેઓ ઓક્સિજનની અછત અને લાંબા સમય સુધી પાણીમાં રહેવાના જોખમો સારી રીતે જાણતા હતા.

પોલીસ દ્વારા તેમની સામે બાળકના મૃત્યુના કેસમાં ગંભીર બેદરકારી બદલ મેન્સલૉટર (મનુષ્યવધ)નો ગુનો નોંધવામાં આવ્યો છે.

બીજી તરફ, ડૉક્ટરના વકીલે આ આરોપોને ફગાવી દીધા છે અને તેને માત્ર એક દુર્ઘટના ગણાવી છે. આ મામલે આગળની ન્યાયિક કાર્યવાહી હાથ ધરવામાં આવી છે.