ભારતની દરિયાઈ ખાદ્ય નિકાસમાં રેકોર્ડબ્રેક ઉછાળો, ચીન બન્યું મોટું ગ્રાહક

વૈશ્વિક પડકારો વચ્ચે ભારતની દરિયાઈ ખાદ્ય નિકાસ (Sea-food Export) એ નવી ઊંચાઈ સર કરી છે. નાણાકીય વર્ષ (Financial Year) 2025-26 માં ભારતની નિકાસ રેકોર્ડબ્રેક 72,325.82 કરોડ રૂપિયા (8.28 Billion Dollars) પર પહોંચી ગઈ છે.

અત્યાર સુધી અમેરિકા (USA) ભારત માટે સૌથી મોટું માર્કેટ હતું, પરંતુ ટેરિફ (Tariff) સંબંધિત સમસ્યાઓને કારણે ત્યાં નિકાસમાં ઘટાડો નોંધાયો છે. જોકે, ભારતના ‘પ્લાન-બી’ (Plan-B) એ આ નુકસાનની ભરપાઈ ચીન (China) અને અન્ય દેશો દ્વારા કરી દીધી છે.

વાણિજ્ય મંત્રાલયના ડેટા અનુસાર, કુલ નિકાસનો જથ્થો 19.32 લાખ મેટ્રિક ટન (Metric Ton) સુધી પહોંચ્યો છે. આ ઐતિહાસિક સફળતામાં ‘ફ્રોઝન ઝીંગા’ (Frozen Shrimp) મુખ્ય ગ્રોથ એન્જિન સાબિત થયા છે, જેનો હિસ્સો કુલ કમાણીના 2/3 ભાગ જેટલો એટલે કે 47,973.13 કરોડ રૂપિયા રહ્યો છે.

અમેરિકામાં નિકાસના મૂલ્યમાં 14.5% નો ઘટાડો થયો હોવા છતાં, ચીને ભારતીય સી-ફૂડની ખરીદીમાં 22.7% નો જંગી ઉછાળો નોંધાવ્યો છે. આ ઉપરાંત યુરોપિયન યુનિયન (EU) માં 37.9% અને દક્ષિણ-પૂર્વ એશિયા (South-East Asia) માં 36.1% નો વધારો જોવા મળ્યો છે. ફ્રોઝન ફિશ (Frozen Fish) અને સ્ક્વિડ (Squid) જેવી પ્રોડક્ટ્સે પણ આ સફળતામાં મહત્ત્વનું યોગદાન આપ્યું છે.