સપનું નહીં તૂટે: અફઘાનિસ્તાનની રેફ્યુજી મહિલા ક્રિકેટરો માટે ICCનો મોટો નિર્ણય

Afghan Women Cricket | ઇન્ટરનેશનલ ક્રિકેટ કાઉન્સિલ (International Cricket Council – ICC) દ્વારા અફઘાનિસ્તાનની રેફ્યુજી (Refugee – શરણાર્થી) મહિલા ક્રિકેટરો માટે એક ઐતિહાસિક અને મોટો નિર્ણય લેવામાં આવ્યો છે.

ICC એ આ વિસ્થાપિત ખેલાડીઓ માટે વર્ષ 2030 સુધીનો એક ખાસ ડેવલપમેન્ટ રોડમેપ (Development Roadmap) તૈયાર કર્યો છે, જેથી તેઓ ભવિષ્યમાં સત્તાવાર ઇન્ટરનેશનલ ક્વોલિફિકેશન ટૂર્નામેન્ટ (International Qualification Tournament) માં ભાગ લઈ શકે. આ પહેલનો મુખ્ય હેતુ મહિલા ખેલાડીઓને ફરીથી આંતરરાષ્ટ્રીય સ્તરે ઓળખ અને સમાન તકો અપાવવાનો છે.

વર્ષ 2021માં અફઘાનિસ્તાનમાં તાલિબાન શાસન આવ્યા બાદ ઘણી મહિલા ક્રિકેટરોને પોતાનો દેશ છોડવો પડ્યો હતો અને તેઓ ઓસ્ટ્રેલિયા (Australia) સહિત અન્ય દેશોમાં શરણ લેવા મજબૂર બની હતી.

ક્રિકેટ ઓસ્ટ્રેલિયા (Cricket Australia) એ આ ખેલાડીઓ અને તેમના પરિવારોને હ્યુમેનિટેરિયન વિઝા (Humanitarian Visa – માનવતાવાદી વિઝા) અપાવવામાં તેમજ તેમને સ્થાનિક ક્લબો અને ટ્રેનિંગ પ્રોગ્રામ (Training Program) સાથે જોડવામાં મહત્વની ભૂમિકા ભજવી છે.

જાન્યુઆરી 2025માં, આ ટીમે મેલબર્નમાં ‘અફઘાન વિમેન્સ XI’ (Afghan Women’s XI) ના નામે પોતાનો પ્રથમ મેચ રમીને નવી શરૂઆત કરી હતી.

આ પ્રોજેક્ટ (Project) ને વધુ મજબૂત બનાવવા માટે હવે ICC એ ક્રિકેટ ઓસ્ટ્રેલિયા, ઇંગ્લેન્ડ એન્ડ વેલ્સ ક્રિકેટ બોર્ડ (ECB) અને ભારતીય ક્રિકેટ કંટ્રોલ બોર્ડ (BCCI) સાથે હાથ મિલાવ્યા છે.

આ વિશેષ સહાયતા કાર્યક્રમ હેઠળ મહિલા ખેલાડીઓને આર્થિક મદદ, વર્લ્ડ-ક્લાસ કોચિંગ (World-class Coaching), ફિટનેસ સપોર્ટ (Fitness Support) અને નિયમિત હાઈ-પર્ફોર્મન્સ ટ્રેનિંગ (High-performance Training) આપવામાં આવશે.

અફઘાન રેફ્યુજી ટીમની ખેલાડી ફિરોઝા અમીરી (Firooza Amiri) એ ICC ના આ નિર્ણયને આવકારતા જણાવ્યું છે કે, આનાથી તેમના ભવિષ્યના સપનાઓ અને અધિકારોને એક નવી આશા મળી છે.