ગવર્નર કેમ્પે ભારતીય મૂળના નરેન્દ્ર રેડ્ડીની જ્યોર્જિયા ટ્રાન્સપોર્ટેશન એફિશિયન્સી ઓથોરિટી બોર્ડમાં નિમણૂક કરી

Narender Reddy Appointment | એટલાન્ટાથી (Atlanta) એક ગર્વ લેવા જેવા સમાચાર સામે આવ્યા છે. જ્યોર્જિયાના (Georgia) ગવર્નર બ્રાયન કેમ્પે (Brian Kemp) ભારતીય-અમેરિકન સમુદાયના અગ્રણી નેતા નરેન્દ્ર રેડ્ડીની (Narender Reddy) નવી રચાયેલી ‘જ્યોર્જિયા ટ્રાન્સપોર્ટેશન એફિશિયન્સી ઓથોરિટી’ – GTEA (Georgia Transportation Efficiency Authority) ના બોર્ડમાં નિમણૂક કરી છે.

આ એક રાજ્ય કક્ષાની એજન્સી છે, જેની સ્થાપના સમગ્ર જ્યોર્જિયામાં પરિવહન આયોજન (Transportation Planning) અને ઓપરેશનલ કાર્યક્ષમતામાં સુધારો કરવા માટે કરવામાં આવી છે.

નરેન્દ્ર રેડ્ડીએ આ નિમણૂક અંગે ખુશી વ્યક્ત કરતા જણાવ્યું હતું કે, આ તેમના માટે બહુમાનની વાત છે. આ નવી એજન્સી (GTEA) ની સ્થાપના એપ્રિલ 2026 માં જ્યોર્જિયા જનરલ એસેમ્બલી (Georgia General Assembly) દ્વારા મંજૂર કરાયેલા કાયદા દ્વારા કરવામાં આવી છે.

તેનો મુખ્ય ઉદ્દેશ્ય એટલાન્ટા-રીજન ટ્રાન્ઝિટ લિંક ઓથોરિટી અને જ્યોર્જિયા રીજનલ ટ્રાન્સપોર્ટેશન ઓથોરિટીના મુખ્ય કાર્યોને એકીકૃત કરીને ટ્રાન્સપોર્ટેશન ગવર્નન્સને (Transportation Governance) વધુ વ્યવસાયિક અને સુવ્યવસ્થિત બનાવવાનો છે.

રેડ્ડી છેલ્લા 22 વર્ષથી ‘જ્યોર્જિયા રીજનલ ટ્રાન્સપોર્ટેશન ઓથોરિટી’ – GRTA (Georgia Regional Transportation Authority) ના બોર્ડમાં સેવા આપી ચૂક્યા છે. તેમની લાંબી કારકિર્દી દરમિયાન તેઓ જ્યોર્જિયાના ત્રણ પૂર્વ ગવર્નરો સોની પરડ્યુ, નાથન ડીલ અને વર્તમાન ગવર્નર બ્રાયન કેમ્પ દ્વારા નિયુક્ત પામ્યા છે.

વ્યવસાયે ઉદ્યોગસાહસિક એવા નરેન્દ્ર રેડ્ડી બેંકિંગ (Banking), ફાઇનાન્સ (Finance) અને કોમર્શિયલ રિયલ એસ્ટેટ (Commercial Real Estate) ક્ષેત્રે દાયકાઓનો અનુભવ ધરાવે છે. તેઓ ‘સ્ટર્લિંગ રિયલ્ટી સર્વિસીસ’ (Sterling Realty Services) ના પ્રમુખ છે અને ક્વાન્ટમ નેશનલ બેંકના (Quantum National Bank) સ્થાપક ડિરેક્ટર રહી ચૂક્યા છે.