અમેરિકામાં બે વર્ષના બાળકને મરણતોલ માર મારવા બદલ ભારતીય મૂળના પિતા સામે હત્યાના પ્રયાસનો ગુનો

Father Charged Murder | અમેરિકાના (America) નોર્થ કેરોલિના (North Carolina) રાજ્યના ગાર્નર (Garner) શહેરમાંથી એક અત્યંત ચોંકાવનારી અને ક્રૂર ઘટના સામે આવી છે. અહીં રહેતા 44 વર્ષીય કિરણ નેથા પસુનુરી (Kiran Netha Pasunuri) નામના વ્યક્તિ પર તેના જ 2 વર્ષના (2-year-old) માસૂમ પુત્ર પર જીવલેણ હુમલો કરવાનો અને તેને ગંભીર ઈજાઓ પહોંચાડવાનો આરોપ લાગ્યો છે.

ગાર્નર પોલીસ ડિપાર્ટમેન્ટના (Garner Police Department) જણાવ્યા અનુસાર, આરોપી પિતા સામે ફર્સ્ટ-ડિગ્રી મર્ડરનો પ્રયાસ (attempted first-degree murder) અને ચાઇલ્ડ એબ્યુઝના (child abuse) ગંભીર ગુનાઓ નોંધવામાં આવ્યા છે.

કોર્ટના દસ્તાવેજો અનુસાર, આ માસૂમ બાળકને ગંભીર હાલતમાં હોસ્પિટલમાં (hospital) દાખલ કરવામાં આવ્યો હતો. બાળકના મગજમાં ભારે રક્તસ્ત્રાવ (brain bleed), આંખોમાં હેમરેજ અને કરોડરજ્જુના મણકામાં ફ્રેક્ચર (fractures) જેવી જીવલેણ ઈજાઓ થઈ હતી.

મગજ પરનું દબાણ ઓછું કરવા માટે ડોક્ટરોએ ઈમરજન્સી સર્જરી (emergency surgery) કરીને બાળકની ખોપરીનો એક ભાગ હટાવવો પડ્યો હતો.

તપાસકર્તાઓનો આક્ષેપ છે કે કિરણે બાળકને ઇરાદાપૂર્વક શારીરિક ત્રાસ આપ્યો હતો અને ઈજાઓ થયા બાદ પણ લાંબા સમય સુધી તેને કોઈ તબીબી સારવાર (medical care) આપી ન હતી. હાલમાં બાળકનો જીવ બચી ગયો છે પરંતુ તેની સ્થિતિ ગંભીર છે.

આરોપી કિરણને વેક કાઉન્ટી ડિટેન્શન સેન્ટરમાં (Wake County Detention Center) 2,00,000 ડોલરના બોન્ડ પર કસ્ટડીમાં રાખવામાં આવ્યો છે અને કોર્ટે તેને બાળક સાથે કોઈ પણ પ્રકારનો સંપર્ક રાખવા પર પ્રતિબંધ મૂક્યો છે.