અમેરિકામાં પત્ની અને બે બાળકો સાથે કારને ખીણમાં ધકેલનાર ડૉક્ટર ધર્મેશ પટેલ સામેના આરોપ ત્રણ વર્ષ બાદ રદ

અમેરિકાના કેલિફોર્નિયામાં પોતાના જ પરિવારને કાર સાથે 250 ફૂટ ઊંડી ખીણમાં ફેંકી દેવાના ચકચારી કેસમાં ભારતીય મૂળના રેડિયોલોજિસ્ટ (Radiologist) ડૉ. ધર્મેશ પટેલને મોટી રાહત મળી છે.

કેલિફોર્નિયાની એક અદાલતે ડૉ. પટેલ સામેના હત્યાના પ્રયાસના (Attempted Murder) તમામ ગુનાહિત આરોપોને સત્તાવાર રીતે ફગાવી (Dismiss) દીધા છે.

ડૉ. પટેલે કોર્ટ દ્વારા નિર્ધારિત 2 વર્ષનો મેન્ટલ હેલ્થ ડાયવર્ઝન પ્રોગ્રામ (Mental Health Diversion Program) સફળતાપૂર્વક પૂર્ણ કર્યા બાદ આ નિર્ણય લેવાયો છે, જેનાથી આ હાઇ-પ્રોફાઇલ કેસનો અંત આવ્યો છે.

આ સમગ્ર ઘટના 2 જાન્યુઆરી, 2023 ના રોજ બની હતી. 45 વર્ષના ધર્મેશ પટેલ પર આરોપ હતો કે તેમણે પોતાની પત્ની અને બે માસૂમ બાળકો સાથે ટેસ્લા મોડલ વાય (Tesla Model Y) કારને કેલિફોર્નિયાના હાઇવે 1 (Highway 1) પર આવેલા 250 ફૂટ ઊંચા ડેવિલ્સ સ્લાઇડ (Devil’s Slide) નામના ખિણ વિસ્તારમાંથી જાણીજોઈને નીચે ઉતારી દીધી હતી. જોકે, આ ભયાનક અકસ્માતમાં પરિવારના ચારેય સભ્યોનો ચમત્કારિક બચાવ થયો હતો, જેને બચાવ ટુકડીએ ‘એક સંપૂર્ણ ચમત્કાર’ ગણાવ્યો હતો.

સાન માટો કાઉન્ટી સુપિરિયર કોર્ટે (San Mateo County Superior Court) 6 જુલાઈના રોજ આ કેસને ફગાવી દીધો હતો. ડૉ. પટેલે સ્ટેનફોર્ડ યુનિવર્સિટીના (Stanford University) સાઇકિયાટ્રિસ્ટ (Psychiatrist) અને ફેમિલી થેરાપિસ્ટની દેખરેખ હેઠળ 2 વર્ષની આઉટપેશન્ટ સાઇકિયાટ્રિક ટ્રીટમેન્ટ (Outpatient Psychiatric Treatment) પૂર્ણ કરી હતી.

કેલિફોર્નિયાના કાયદા મુજબ, જો કોઈ આરોપી માનસિક સ્વાસ્થ્ય સુધારણા કાર્યક્રમ સફળતાપૂર્વક પૂર્ણ કરે, તો જજે ફરજિયાતપણે તેના પરથી ફોજદારી ચાર્જ હટાવવા પડે છે.

પ્રોસિક્યુટર્સ (Prosecutors) અને ડિસ્ટ્રિક્ટ એટર્ની સ્ટીવ વેગસ્ટાફે (Steve Wagstaffe) આ ડાયવર્ઝનનો સખત વિરોધ કર્યો હતો. તેમણે દલીલ કરી હતી કે હત્યાના પ્રયાસ જેવા ગંભીર ગુનાઓમાં આવી રાહત ન મળવી જોઈએ. બીજી તરફ, પટેલના વકીલોએ સાબિત કર્યું કે ઘટના સમયે તેઓ હેલ્યુસિનેશન (Hallucinations – ભ્રમણા) અને મેજર ડિપ્રેશનથી (Major Depression) પીડાતા હતા.

ડૉ. પટેલને ભ્રમ હતો કે તેમના બાળકોનું અપહરણ થઈ જશે. ડાયવર્ઝન પ્રોગ્રામ દરમિયાન કોર્ટે તેમને ધીમે-ધીમે પરિવાર સાથે રહેવાની મંજૂરી આપી હતી, કારણ કે તેમની પત્નીએ પણ તેમને માફ કરી દીધા હતા. કોર્ટે હવે આ કેસને સીલ (Seal) કરી દીધો છે. જોકે, ક્રિમિનલ કેસ ખતમ થવા છતાં ધર્મેશ પટેલની મેડિકલ કરિયર સમાપ્ત થઈ ગઈ છે. કેલિફોર્નિયાના મેડિકલ બોર્ડે (Medical Board of California) કન્ફર્મ કર્યું છે કે તેમણે ડિસેમ્બર 2025 માં પોતાનું મેડિકલ લાઇસન્સ (Medical License) સરેન્ડર કરી દીધું હતું.