Canada Study Visa 2026: કેનેડામાં સ્ટુડન્ટ વિઝામાં મોટો ઘટાડો

• કેનેડા કહે છે ‘આ બેસ્ટ સમય છે’, પણ સત્તાવાર આંકડા કંઈક જુદી જ કહાની કહી રહ્યા છે!

Canada Student Visa |  ભારતમાં કેનેડાના હાઈ કમિશનર ક્રિસ કૂટરે (Chris Cooter) તાજેતરમાં જણાવ્યું છે કે ભારતીય વિદ્યાર્થીઓ માટે કેનેડા એપ્લાય કરવાનો આ “કદાચ અત્યાર સુધીનો સૌથી શ્રેષ્ઠ સમય” છે, કારણ કે દેશ હજુ સુધી આંતરરાષ્ટ્રીય વિદ્યાર્થીઓની નિર્ધારિત મર્યાદા (International Student Cap) સુધી પણ પહોંચ્યો નથી.

જોકે, તેમના આ દાવાઓ વચ્ચે ઇમિગ્રેશન, રેફ્યુજીસ એન્ડ સિટીઝનશિપ કેનેડા (IRCC) ના સત્તાવાર આંકડા એક તદ્દન અલગ જ ચિત્ર રજૂ કરે છે, જે નવા વિદ્યાર્થીઓના આગમનમાં તીવ્ર ઘટાડો અને ઘટતા ઇમિગ્રેશન ટાર્ગેટ દર્શાવે છે.

IRCC ના લેટેસ્ટ ડેટા અનુસાર, કેનેડાએ જાન્યુઆરી 2026 માં માત્ર 7,040 નવા આંતરરાષ્ટ્રીય વિદ્યાર્થીઓ (International Students) નું સ્વાગત કર્યું હતું. આ આંકડો ગયા વર્ષના જાન્યુઆરી મહિનાની સરખામણીએ અંદાજે 37% ઓછો છે.

આ ઉપરાંત, અસ્થાયી રહેવાસીઓ (Temporary Residents) ના કુલ આગમનમાં વાર્ષિક ધોરણે 28% નો ઘટાડો થયો છે, જ્યારે ટેમ્પરરી વર્કર્સ (Temporary Workers) ના આગમનમાં 20% નો ઘટાડો નોંધાયો છે.

સમાચાર એજન્સી ANI ને આપેલા ઇન્ટરવ્યુમાં ક્રિસ કૂટરે જણાવ્યું કે ભારતમાં એવી એક ખોટી માન્યતા (Misperception) પ્રવર્તી રહી છે કે કેનેડાએ ઇન્ટરનેશનલ સ્ટુડન્ટ્સ માટે પોતાના દરવાજા બંધ કરી દીધા છે. તેમણે ઉમેર્યું, “અમે હજી સુધી નક્કી કરેલી કેપ (Cap) સુધી પણ પહોંચ્યા નથી. તેથી એક ભારતીય વિદ્યાર્થી તરીકે એપ્લાય કરવાનો આ બેસ્ટ સમય છે, કારણ કે અમે તમને ત્યાં ઈચ્છીએ છીએ અને કેપમાં પૂરતી જગ્યા ખાલી છે.”

કૂટરે સ્પષ્ટતા કરી કે થોડા વર્ષો પહેલા લાદવામાં આવેલી આ મર્યાદાનો મુખ્ય હેતુ આવાસની અછત (Housing Shortage) ને દૂર કરવાનો અને નબળી ગુણવત્તાવાળી કોલેજો (Fly-by-night colleges) પર લગામ લગાવવાનો હતો, જે સમસ્યાઓ હવે ઉકેલાઈ ગઈ છે.

પરંતુ વાસ્તવિકતા એ છે કે વર્ષ 2026 માં પણ આ કેપ યથાવત છે. IRCC એ જણાવ્યું છે કે તેઓ આ વર્ષે પરમિટ એક્સટેન્શન સહિત કુલ 408,000 સ્ટડી પરમિટ (Study Permits) ઇશ્યુ કરવાની અપેક્ષા રાખે છે.

જાન્યુઆરી 2026 થી સરકારી સંસ્થાઓમાં માસ્ટર્સ અને ડોક્ટરેટના વિદ્યાર્થીઓને પ્રોવિન્શિયલ એટેસ્ટેશન લેટર (PAL/TAL) ની જરૂરિયાતમાંથી મુક્તિ આપવામાં આવી છે, છતાં એકંદર કેપ ચાલુ જ છે.

આ મંદી પીક એડમિશન સીઝન (Peak Admission Season) દરમિયાન પણ સ્પષ્ટ જોવા મળી હતી. સામાન્ય રીતે કેનેડાનો સૌથી વ્યસ્ત ઇનટેક ગણાતા ઓગસ્ટ મહિનામાં, નવા સ્ટુડન્ટ્સનું આગમન વર્ષ 2024 ના 79,725 થી ઘટીને ગત વર્ષે 45,010 થઈ ગયું હતું.

જો આપણે વર્ષવાર ડેટા પર નજર કરીએ, તો સ્ટડી પરમિટ ધારકોની સંખ્યા 2023 માં 680,700 ની ટોચે પહોંચ્યા બાદ સતત ઘટી રહી છે. વર્ષ 2024 માં તે 24.4% ઘટીને 514,710 અને વર્ષ 2025 માં 25.9% ઘટીને 381,310 થઈ ગઈ હતી. જ્યારે વર્ષ 2026 માં (જાન્યુઆરી-એપ્રિલ સુધી) આ આંકડો માત્ર 95,000 નોંધાયો છે.

આ ઘટાડા પાછળ કડક વિઝા નિયમો (Stricter visa rules), ઊંચો રિફ્યુઝલ રેટ (Refusal Rate) અને છેલ્લા બે વર્ષમાં નીતિઓમાં થયેલા ફેરફારો મુખ્ય જવાબદાર માનવામાં આવે છે.