- ‘મંગલમ કેન્ટીન’ થકી 1,700થી વધુ સખી મંડળની મહિલાઓને દર મહિને રૂ. 10 હજારથી 50 હજાર સુધીની આવક
- રાજ્યની વિવિધ સરકારી કચેરીઓ, શૈક્ષણિક સંસ્થાઓ, હોસ્ટેલ, હોસ્પિટલ જેવી મહત્વપૂર્ણ જગ્યાઓ પર ૨૦૦થી વધુ ‘મંગલમ કેન્ટીન’ કાર્યરત
Mangalam Canteen News | રાજ્યના ગ્રામ વિકાસ વિભાગ સંચાલિત ગુજરાત લાઇવલીહુડ પ્રમોશન કંપની લિમિટેડ (GLPC) દ્વારા મહિલા સ્વસહાય જૂથો-સખી મંડળોને સશક્ત બનાવવાના ઉદ્દેશ્ય સાથે ’હર ઘર સ્વદેશી, ઘર ઘર સ્વદેશી’ના સૂત્રને સાર્થક કરતી ૨૦૦થી વધુ ‘મંગલમ કેન્ટીન’ રાજ્યભરમાં કાર્યરત કરવામાં આવી છે.
આ કેન્ટીન રાજ્યની વિવિધ સરકારી કચેરીઓ, શૈક્ષણિક સંસ્થાઓ, હોસ્ટેલ, હોસ્પિટલો અને NGO જેવી મહત્વપૂર્ણ જગ્યાઓ પર ચાલી રહી છે, જેમાં વર્ષ 2024-25માં 50 નવી કેન્ટીનનો સમાવેશ થાય છે. મુખ્યમંત્રી શ્રી ભૂપેન્દ્ર પટેલના માર્ગદર્શન હેઠળ અને ગ્રામ વિકાસ મંત્રી કુંવરજીભાઈ બાવળિયાના નેતૃત્વમાં, હાલમાં 1,700થી વધુ સખી મંડળની મહિલાઓને રોજગારીની તકો મળી છે. આ પહેલથી મહિલાઓને તેમના સંચાલનના સ્તર પર આધારિત દર મહિને રૂ. 10 હજારથી ૫૦ હજાર સુધીની આવક મળી રહી છે, જે તેમની આર્થિક સ્વતંત્રતા અને પરિવારના ઉત્થાન માટે મહત્વનું યોગદાન આપી રહી છે.
રાજ્ય સરકાર દ્વારા ચાલુ વર્ષે ‘વન ડિસ્ટ્રિક્ટ વન કેન્ટીન’ પ્રચાર અભિયાન હેઠળ એકસરખા બ્રાન્ડ નેમ અને ડિઝાઇન સાથે 30 નવી ‘મંગલમ કેન્ટીનો’ શરૂ કરવામાં આવશે, જે પૈકી અત્યારસુધીમાં ૨૭ કેન્ટીન કાર્યરત થઈ ચૂકી છે. આ નવી કેન્ટીન પોલીસ વિભાગ, R&B કચેરીઓ, મ્યુનિસિપલ બિલ્ડિંગ્સ અને અન્ય સરકારી સંસ્થાઓ ખાતે શરૂ કરાશે.
GLPC દ્વારા ગામડાઓમાં કેટરિંગની સેવાઓ આપતી મહિલાઓને પ્રોત્સાહન અને માર્ગદર્શન થકી તાલીમ આપવામાં આવે છે, જેથી તેઓ વ્યવસાયિક કેન્ટીન સંચાલન અને કેટરિંગ સેવાઓ માટે સક્ષમ બની શકે. વર્ષ 2024માં GLPCએ તેમની પ્રથમ મોડલ ‘મંગલમ કેન્ટીન’ ગાંધીનગરના પોલીસ ભવન ખાતે ડિરેક્ટર જનરલ ઓફિસમાં શરૂ કરી હતી, જે સંપૂર્ણપણે છ સખી મંડળ મહિલાઓ દ્વારા સંચાલિત છે.
આ સફળતાને પગલે હવે અમદાવાદ પોલીસ કમિશનરની કચેરી અને ગાંધીનગર પોલીસ અધિક્ષકની કચેરી ખાતે પણ ‘મંગલમ કેન્ટીન’ શરૂ કરવામાં આવી છે, જે આરોગ્ય, સ્વચ્છતા અને ફૂડ સેફ્ટીના ઉચ્ચ ધોરણોનું પાલન કરીને પૌષ્ટિક ભોજન પૂરું પાડી રહી છે.