અમેરિકા જવાનું સપનું જોનારાઓને મોટો ફટકો: ટ્રમ્પે વિશ્વભરમાં વિઝા ઇન્ટરવ્યુ પર રોક લગાવી

US Visa Pause | ડોનાલ્ડ ટ્રમ્પ (Donald Trump) ના નેતૃત્વ હેઠળના અમેરિકન પ્રશાસને ઇમિગ્રેશન નિયમોને (Immigration Rules) વધુ કડક બનાવતા વિશ્વભરમાં યુએસ વિઝા એપોઇન્ટમેન્ટ્સ (US Visa Appointments) પર કામચલાઉ ધોરણે રોક લગાવી દીધી છે.

અમેરિકી સ્ટેટ ડિપાર્ટમેન્ટ દ્વારા વિશ્વભરના યુએસ એમ્બેસી અને કન્સ્યુલેટ્સમાં કામ કરતા કન્સ્યુલર અધિકારીઓ માટે એક ગ્લોબલ ટ્રેનિંગ પ્રોગ્રામ શરૂ કરવામાં આવ્યો છે.

આ તાલીમના કારણે વિઝા ઈન્ટરવ્યુ અને એપોઇન્ટમેન્ટ શિડ્યુલમાં ફેરફાર કરવામાં આવી રહ્યા છે. જે લોકોના ઈન્ટરવ્યુ પહેલેથી જ નક્કી હતા, તેમને ઈમેલ મોકલીને એપોઇન્ટમેન્ટ રદ કરવાની જાણ કરવામાં આવી છે.

અમેરિકી અધિકારીઓના જણાવ્યા મુજબ, આ ખાસ તાલીમનો મુખ્ય ઉદ્દેશ્ય વિઝા અરજદારોનું સ્ક્રીનિંગ (Screening) વધુ સઘન બનાવવાનો છે, જેથી ભવિષ્યમાં અમેરિકાના સરકારી લાભો કે સરકારી સહાય પર નિર્ભર રહે તેવી શક્યતા ધરાવતી વ્યક્તિઓને વિઝા આપવાનું ટાળી શકાય.

ઇમિગ્રેશન પર ટ્રમ્પ સરકારના કડક પ્રહારો: ટ્રમ્પ સરકારના આ નિર્ણયથી યુએસ વિઝાની રાહ જોઈ રહેલા હજારો ભારતીયો સહિત વિશ્વભરના અરજદારોને મોટો આંચકો લાગ્યો છે. માત્ર એપોઇન્ટમેન્ટ રોકવી જ નહીં, પરંતુ અમેરિકાએ અન્ય કેટલાક મોટા નિર્ણયો પણ લીધા છે:

બિઝનેસ અને ટુરીસ્ટ વિઝા રદ કરવાની તૈયારી: અમેરિકા અગાઉ આશ્રય માટે અરજી કરનારા લગભગ 2,00,000 વિદેશીઓના B1 અને B2 વિઝા રદ કરવાની યોજના બનાવી રહ્યું છે. જો આમ થશે તો તે યુએસ ઇતિહાસનું સૌથી મોટું વિઝા રદ્દીકરણ હશે.

H-1B વિઝાની ફીમાં અધધ વધારો: હોમલેન્ડ સિક્યોરિટી વિભાગે (DHS) H-1B વિઝા અરજીઓ પર 103,265 US Dollar (આશરે રૂ. 99 લાખ) સુધીની વધારાની ફી લાદવાની દરખાસ્ત મૂકી છે. આ નિર્ણયથી આઇટી પ્રોફેશનલ્સ (IT Professionals) અને અમેરિકન કંપનીઓને મોટો આર્થિક ફટકો પડશે.

ટ્રમ્પ પ્રશાસનનું કહેવું છે કે દેશની આંતરિક સુરક્ષા વધારવા માટે આ પગલાં જરૂરી છે. જોકે, માનવઅધિકાર જૂથો અને કાનૂની નિષ્ણાતો આ નિર્ણયોની ભારે ટીકા કરી રહ્યા છે. અગાઉ 75 દેશોના નાગરિકો માટે ઈમિગ્રન્ટ વિઝા સ્થગિત કરવાના ટ્રમ્પના નિર્ણયને અમેરિકન કોર્ટે રદ કર્યો હતો, પરંતુ નવી ટ્રેનિંગના બહાને એપોઇન્ટમેન્ટ સ્થગિત થતાં ફરી અનિશ્ચિતતાનો માહોલ સર્જાયો છે.