મોંઘવારીનો રાઉન્ડ ટુ : બિસ્કિટ, સાબુથી લઈને ચા સુધીની દૈનિક વપરાશની વસ્તુઓ મોંઘી થશે; FMCG કંપનીઓ ભાવ વધારવાની તૈયારીમાં

FMCG Price Hike | મોંઘવારીના મારથી પીડાતા સામાન્ય ભારતીય ગ્રાહકો માટે વધુ એક ખરાબ સમાચાર આવ્યા છે. દેશમાં રોજના વપરાશની ચીજવસ્તુઓ એટલે કે FMCG (Fast Moving Consumer Goods) બનાવતી અગ્રણી કંપનીઓ આગામી દિવસોમાં ભાવવધારો કરવાની તૈયારી કરી રહી છે.

ઈરાન યુદ્ધ (Iran War) અને વૈશ્વિક પરિસ્થિતિઓને કારણે કાચા માલ (Raw Materials) તેમજ કોમોડિટી (Commodity)ના ભાવમાં થયેલા વધારાને પગલે કંપનીઓએ આ નિર્ણય લેવો પડ્યો છે.

સપ્ટેમ્બર ક્વાર્ટર (September Quarter) એટલે કે Q3માં બિસ્કિટ (Biscuit), સાબુ (Soap), ચા (Tea) અને અન્ય દૈનિક ચીજવસ્તુઓના ભાવમાં ફરી એકવાર ઉછાળો જોવા મળી શકે છે.

મળતી માહિતી મુજબ, જૂન ક્વાર્ટર (June Quarter)માં FMCG ક્ષેત્રની કંપનીઓએ પહેલાથી જ 2-5% સુધીનો ભાવવધારો કર્યો હતો. પરંતુ ખાંડ (Sugar) અને પામ ઓઈલ (Palm Oil) જેવી મુખ્ય સામગ્રીના ભાવમાં સતત વધારો થતાં કંપનીઓના પ્રોફિટ માર્જિન (Profit Margin) પર ભારે દબાણ આવી રહ્યું છે. જેના કારણે કંપનીઓ હવે ગ્રાહકો પર વધારાનો બોજ નાખવા મજબૂર બની છે.

બિસ્કિટ ઉત્પાદક બ્રાન્ડ બ્રિટાનિયા (Britannia)ના જણાવ્યા અનુસાર, ચાલુ ક્વાર્ટરમાં કંપની ૧.૫-૨% જેટલો વધુ ભાવવધારો રજૂ કરી શકે છે.

કંપનીના એગ્ઝિક્યુટિવ્સના મતે, રૂ. 5 અને રૂ. 10ના નાના પેકેટ્સ (Packs)માં કિંમત વધારવાને બદલે ‘શ્રિંકફ્લેશન’ (Shrinkflation) તકનીકનો ઉપયોગ કરવામાં આવશે. શ્રિંકફ્લેશન એટલે કે પ્રોડક્ટની કિંમત સમાન રાખવામાં આવશે પરંતુ તેની અંદરનો જથ્થો (Quantity) ઘટાડી દેવામાં આવશે.

બીજી તરફ, હિન્દુસ્તાન યુનિલિવર (Hindustan Unilever – HUL) પણ સપ્ટેમ્બર ક્વાર્ટરમાં ૨-૫% સરેરાશ ફુગાવો (Inflation) અનુભવી રહી છે. કંપની અલગ-અલગ પ્રોડક્ટ કેટેગરીમાં તબક્કાવાર ભાવવધારો લાવવાની યોજના ધરાવે છે.

ડાબર ઈન્ડિયા (Dabur India), ગોદરેજ કન્ઝ્યુમર પ્રોડક્ટ્સ (Godrej Consumer Products) અને ટાટા કન્ઝ્યુમર પ્રોડક્ટ્સ (Tata Consumer Products) જેવી મોટો હિસ્સો ધરાવતી કંપનીઓએ પણ સંકેત આપ્યા છે કે જો કાચા માલના ભાવ નિયંત્રણમાં નહીં આવે તો આગામી સમયમાં કિંમતો વધારવી અનિવાર્ય બનશે.

એક તરફ મોંઘવારીને કારણે સામાન્ય ઘરગથ્થુ વસ્તુઓની માંગ પર અસર પડી રહી છે, ત્યારે બીજી તરફ પ્રીમિયમ લિકર (Premium Liquor) અને દારૂના વેચાણમાં મજબૂત વૃદ્ધિ જોવા મળી રહી છે.

યુનાઈટેડ સ્પિરિટ્સ (United Spirits), રાડિકો ખેતાન (Radico Khaitan) અને યુનાઈટેડ બ્રુઅરીઝ (United Breweries) જેવી કંપનીઓએ પ્રોફિટ (Profit) અને રેવન્યુ (Revenue)માં ડબલ ડિજિટ ગ્રોથ (Double Digit Growth) નોંધાવ્યો છે.

આમ, એકતરફ દૈનિક જીવનજરૂરી સામાન ખરીદવો મોંઘો બની રહ્યો છે ત્યારે પ્રીમિયમ પ્રોડક્ટ્સ માટે ગ્રાહકો વધુ ખર્ચ કરી રહ્યા હોય તેવો અનોખો ટ્રેન્ડ (Trend) પણ જોવા મળી રહ્યો છે.