Anshul Kuncha Murder | અમેરિકાના ફિલાડેલ્ફિયામાં એક અત્યંત ચોંકાવનારી અને હૃદયદ્રાવક ઘટના સામે આવી છે. ડ્રેક્સેલ યુનિવર્સિટીના (Drexel University) ગ્રેજ્યુએટ અને ડેટા એનાલિસ્ટ (Data Analyst) તરીકે કામ કરતા 28 વર્ષીય ભારતીય મૂળના યુવાન અંશુલ કુંચાની (Anshul Kuncha) પિઝા ડિલિવરી દરમિયાન ઘાતકી હત્યા કરવામાં આવી છે.
પોલીસના જણાવ્યા અનુસાર, આ હત્યા એક પૂર્વઆયોજિત કાવતરાના ભાગરૂપે લૂંટના ઈરાદે કરવામાં આવી હતી. આ કેસમાં પોલીસે 14 વર્ષના એક સગીર છોકરાની ધરપકડ કરી છે, જેના કારણે સ્થાનિક સમુદાય અને સોશિયલ મીડિયા પર ભારે ચકચાર મચી ગઈ છે.
પોલીસે જણાવ્યું કે, 14 વર્ષીય સગીર સિન્સિયર કેમ્પ્સ પર (Sincere Camps) 5 જૂનના રોજ નોર્થ ફિલાડેલ્ફિયામાં આવેલા રેમન્ડ રોઝન હોમ્સ (Raymond Rosen Homes) પબ્લિક હાઉસિંગ કોમ્પ્લેક્સના એક ખાલી એપાર્ટમેન્ટમાં નકલી પિઝા ઓર્ડર (Fake Pizza Order) આપીને અંશુલ કુંચાને બોલાવવાનો આરોપ છે.
અંશુલ જ્યારે ઓર્ડર આપવા પહોંચ્યો અને ડિલિવરી પૂરી કરીને પાછો ફરી રહ્યો હતો, ત્યારે તેને ઘેરી લેવામાં આવ્યો હતો. તપાસકર્તાઓ અનુસાર, અંશુલને લૂંટી લીધા બાદ તેના માથાના પાછળના ભાગમાં ગોળી મારીને કાવતરાપૂર્વક મોતને ઘાટ ઉતારવામાં આવ્યો હતો.
અધિકારીઓએ 10 જુલાઈના રોજ સગીર આરોપી કેમ્પ્સ સામે મર્ડર (Murder), રોબરી (Robbery), ક્રિમિનલ કોન્સ્પિરેસી (Criminal Conspiracy) અને ફાયરઆર્મ્સ ઓફન્સીસ (Firearms Offenses – ગેરકાયદેસર હથિયાર રાખવા) સહિતના ગંભીર ગુનાઓ હેઠળ ચાર્જ દાખલ કર્યો છે.
કોર્ટે આરોપીના જામીન નકારી કાઢ્યા છે અને તે હાલ કસ્ટડીમાં છે. જોકે, કાયદાકીય પ્રક્રિયા મુજબ જ્યાં સુધી ગુનો સાબિત ન થાય ત્યાં સુધી આરોપીને નિર્દોષ માનવામાં આવે છે. ઘટનાસ્થળેથી પોલીસને પીટ્સ પિઝાના (Pete’s Pizza) ત્રણ ન ખોલેલા પિઝા બોક્સ અને અંશુલની ડિલિવરી બેગ મળી આવી હતી, જે દર્શાવે છે કે તેણે ડિલિવરી સફળતાપૂર્વક પૂર્ણ કરી લીધી હતી.
સીસીટીવી ફૂટેજમાં (Surveillance Footage) બે શંકાસ્પદ વ્યક્તિઓ અંશુલનો પીછો કરતા દેખાયા હતા, જેમાંથી એકની ઓળખ થઈ ચૂકી છે અને અન્ય સાથીદારની શોધખોળ ચાલુ છે.
મૂળ ભારતના હૈદરાબાદના (Hyderabad) વતની અંશુલ કુંચા ઉચ્ચ શિક્ષણ મેળવવા માટે 4 વર્ષ પહેલાં અમેરિકા આવ્યા હતા. તેમણે 2024 માં ડ્રેક્સેલ યુનિવર્સિટીની લેબો કોલેજ ઓફ બિઝનેસમાંથી (LeBow College of Business) ગ્રેજ્યુએશન પૂરું કર્યું હતું અને તાજેતરમાં જ પેન્સિલવેનિયાના (Pennsylvania) વોરમિન્સ્ટરમાં ડેટા એનાલિસ્ટ તરીકે નોકરી શરૂ કરી હતી. તેઓ પોતાની વધારાની આવક માટે વીકએન્ડમાં (Weekends) પિઝા ડિલિવરીનું કામ કરતા હતા.
અંશુલના મૃત્યુ બાદ તેમની બહેન તન્વી કુંચાએ (Tanvi Kuncha) આ ઘટનાને એક સુઆયોજિત ટ્રેપ (Trap) ગણાવીને અન્ય વાલીઓને પોતાના બાળકોને વિદેશ મોકલતા પહેલાં ત્યાંના જોખમો વિશે વિચારવા અપીલ કરી છે.
ન્યૂયોર્કમાં (New York) ભારતીય કોન્સ્યુલેટ જનરલ (Consulate General of India) પણ અંશુલના પાર્થિવ દેહને ભારત પરત લાવવા માટે પરિવાર અને સ્થાનિક સત્તાવાળાઓ સાથે સતત સંપર્કમાં છે. આ ઘટનાએ અમેરિકામાં ભારતીય વિદ્યાર્થીઓ અને સામાન્ય શ્રમિકોની સુરક્ષા પર ફરી એકવાર ગંભીર સવાલો ઉભા કર્યા છે.