લુકઆઉટ માઉન્ટેન રેલવેના કંડક્ટરને વાયરલ વેલકમ મેસેજ બદલ નોકરીમાંથી કઢાયા, સોશિયલ મીડિયા પર વિવાદ

અમેરિકાના ટેનેસી (Tennessee) રાજ્યમાં આવેલા 131 વર્ષ જૂના ઐતિહાસિક પ્રવાસી આકર્ષણ ‘ઇનક્લાઇન રેલવે’ (Incline Railway) ના એક પાર્ટ-ટાઇમ કંડક્ટરને (Conductor) ચોથી જુલાઈના રોજ મુસાફરોને આપવામાં આવેલા એક વિવાદાસ્પદ વેલકમ મેસેજ (Welcome Message) બદલ નોકરીમાંથી બરતરફ કરવામાં આવ્યા છે.

કંડક્ટરનો આ વીડિયો સોશિયલ મીડિયા (Social Media) પ્લેટફોર્મ ટિકટોક (TikTok) પર વાયરલ (Viral) થયા બાદ વ્યાપક હોબાળો મચ્યો હતો અને લોકોએ તેને ઝેનોફોબિક (Xenophobic – વિદેશીઓ પ્રત્યે દ્વેષભાવ રાખવો) ગણાવ્યો હતો.

આ ઘટના 4 જુલાઈના રોજ અમેરિકાના સ્વતંત્રતા દિવસ (Independence Day) પર લુકઆઉટ માઉન્ટેન (Lookout Mountain) તરફ જતી રેલવેમાં બની હતી. વાયરલ વીડિયોમાં ટ્રેનના કંડક્ટર જેક પીટરસન (Jack Peterson) મુસાફરોનું સ્વાગત કરતા કહે છે કે, “અહીં હાજર રહેલા બહુ જ થોડા અમેરિકનોને હેપ્પી ઇન્ડિપેન્ડન્સ ડે.

બાકીના તમામ લોકોને પૃથ્વી પરના સૌથી મહાન દેશમાં આવકાર છે, અને જો તમે અસંમત હોવ, તો તમે અહીંથી જઈ શકો છો.” પીટરસનનું આ નિવેદન પૂરું થતાં જ એક મુસાફર ગુસ્સામાં ‘શટ અપ’ (Shut up) એટલે કે ‘ચૂપ થઈ જા’ એમ બોલતો સંભળાય છે.

નેથન શેરેર (Nathan Scherer) નામના પ્રવાસી દ્વારા પોસ્ટ કરાયેલા આ વીડિયોને સોશિયલ મીડિયા પર લાખો વ્યુઝ (Views) મળ્યા હતા અને તીવ્ર પ્રતિક્રિયાઓ આવી હતી.

આ ઘટના બાદ ઇનક્લાઇન રેલવેનું સંચાલન કરતી ચેટાનુગા એરિયા રીજનલ ટ્રાન્સપોર્ટેશન ઓથોરિટી (CARTA) એ તાત્કાલિક પગલાં ભરીને કંડક્ટર પીટરસનને તે જ દિવસે નોકરીમાંથી હાંકી કાઢ્યા હતા અને જાહેરમાં માફી માંગી હતી.

CARTA ના ચીફ ઓફ સ્ટાફ (Chief of Staff) સ્કોટ વિલ્સને (Scott Wilson) જણાવ્યું કે, “હું તે મુસાફરો અને વીડિયો જોનારા તમામ લોકોની માફી માંગુ છું. અમારી સંસ્થા આવી ભાષાને જરાય ચલાવી લેતી નથી.”

બીજી તરફ, ફાયર કરાયેલા કંડક્ટર પીટરસને પોતાનો બચાવ કરતા કહ્યું કે તેઓ માત્ર દેશભક્તિ વ્યક્ત કરી રહ્યા હતા અને તેમનો હેતુ કોઈ વિદેશી પ્રવાસીઓનું અપમાન કરવાનો નહોતો. આ ઘટનાએ હાલ ઇન્ટરનેટ પર ફ્રીડમ ઓફ સ્પીચ (Freedom of Speech) અને વ્યવસાયિક શિષ્ટાચાર અંગે એક નવી ચર્ચા જગાવી છે.