અમેરિકામાં ભારતીય મૂળની મહિલાની તેના પતિએ ગોળી મારી હત્યા કરી પોતે પણ આત્મહત્યા કરી લીધી

અમેરિકાના દક્ષિણ કેરોલિના રાજ્યની રાજધાની કોલંબિયાના બાર્ન્સ સ્પ્રિંગ્સ રોડ (Barnes Springs Road) પર આવેલા એક ઘરમાં બનેલી ચોંકાવનારી ઘટનામાં પોલીસે બે મૃતકોની ઓળખ જાહેર કરી છે. તપાસકર્તાઓના મતે, આ મામલો ઘરેલું હિંસાથી (Domestic Violence) પ્રેરિત મર્ડર-સુસાઇડનો (Murder-Suicide) હોવાનું પ્રાથમિક દ્રષ્ટિએ જણાઈ રહ્યું છે.

આ કમનસીબ ઘટનામાં મૃતક મહિલાની ઓળખ 53 વર્ષીય એની ક્રિસ્ટિનલ પુષ્પનાથન તરીકે થઈ છે, જેઓ ભારતીય મૂળના અમેરિકન નાગરિક હતા. જ્યારે શંકાસ્પદ હુમલાખોર પતિની ઓળખ 67 વર્ષીય કેનેથ ડ્વેન બેન્ટન તરીકે થઈ છે, જેનું હોસ્પિટલમાં સારવાર દરમિયાન મોત નીપજ્યું હતું.

ફોરેસ્ટ એરેસ પોલીસ ડિપાર્ટમેન્ટના (Forest Acres Police Department) જણાવ્યા અનુસાર, 26 મે ના રોજ પરિવારના એક સભ્યની વિનંતી પર પોલીસની ટીમ તપાસ માટે તેમના ઘરે પહોંચી હતી. ઘરમાં જબરદસ્તીથી પ્રવેશતા જ પોલીસને એની પુષ્પનાથનનો ગોળી વાગેલો મૃતદેહ મળી આવ્યો હતો. ત્યારબાદ પોલીસે ઘરની અંદર હાજર બેન્ટનનો સંપર્ક કર્યો હતો.

હોસ્ટેજ નેગોશિએટર્સની (Hostage Negotiators) મદદથી તેને આત્મસમર્પણ કરવા માટે રાજી કરવામાં આવ્યો હતો. પોલીસે જોયું કે બેન્ટન પણ ગોળી વાગવાથી ગંભીર રીતે ઘાયલ હતો, જેથી તેને તાત્કાલિક સ્થાનિક હોસ્પિટલમાં દાખલ કરાયો હતો, જ્યાં 2 દિવસ પછી તેનું મોત થયું હતું.

પોલીસ રેકોર્ડ દર્શાવે છે કે વર્ષ 2015 થી 2021 ની વચ્ચે આ દંપતીના ઘરેથી પોલીસને 5 વખત ફરિયાદના કોલ આવ્યા હતા. જો કે તે સમયે કોઈ નક્કર પુરાવા ન મળતા કેસ નહોતો નોંધાયો.

ફોરેસ્ટ એરેસના પોલીસ ચીફ ડોન રોબિન્સને આ ઘટનાને અત્યંત દુઃખદ ગણાવી છે અને જણાવ્યું છે કે આનાથી જનતાને કોઈ ખતરો નથી. હાલમાં સ્થાનિક ભારતીય-અમેરિકન સહાયક જૂથો મૃતક મહિલાના પરિવારને મદદ કરી રહ્યા છે અને તેના પાર્થિવ દેહને ભારત મોકલવા માટે જરૂરી વ્યવસ્થા કરી રહ્યા છે.