વૈશ્વિક ઓઈલ કટોકટી: ક્રૂડ ઓઈલ $200 સુધી પહોંચવાની ભીતિ, અમેરિકાના વ્હાઇટ હાઉસે શરૂ કરી તૈયારીઓ

Global Crude Oil Crisis News: અમેરિકન પ્રમુખ ડોનાલ્ડ ટ્રમ્પ (Donald Trump) અને ઈઝરાયલ (Israel) દ્વારા ઈરાન પર કરવામાં આવેલા હુમલા બાદ શરૂ થયેલું યુદ્ધ હવે બીજા મહિનામાં પ્રવેશી ચૂક્યું છે. આ સંઘર્ષના કારણે વ્યૂહાત્મક રીતે અત્યંત મહત્ત્વના ગણાતા હોર્મુઝ સ્ટ્રેટ (Strait of Hormuz) ને ઈરાને બંધ કરી દેતાં વિશ્વના 20% થી 25% ઓઇલ અને ગેસ સપ્લાય પર સીધી અસર પડી છે. અહેવાલો અનુસાર, વ્હાઇટ હાઉસ (White House) હવે એવી ગંભીર સ્થિતિ માટે તૈયારી કરી રહ્યું છે જેમાં ક્રૂડ ઓઇલ (Crude Oil) ના ભાવ પ્રતિ બેરલ $150 થી $200 સુધી પહોંચી શકે છે.

જો માર્ગ બંધ રહેશે તો ભાવમાં પ્રચંડ વધારો નિશ્ચિત

યુદ્ધ શરૂ થયા પહેલા બ્રેન્ટ ક્રૂડ (Brent Crude) નો ભાવ $72 પ્રતિ બેરલ હતો, જે ઉછળીને $119 સુધી પહોંચી ગયો હતો. જોકે, ટ્રમ્પ દ્વારા યુદ્ધનો અંત લાવવાના સંકેત આપ્યા બાદ હાલમાં તે $107 પર ટ્રેડ થઈ રહ્યો છે. એનર્જી એક્સપર્ટ્સ (Energy Experts) ચેતવણી આપી રહ્યા છે કે જો હોર્મુઝ સ્ટ્રેટ હજુ 6 થી 8 અઠવાડિયા સુધી બંધ રહેશે, તો ઓઇલના ભાવમાં તોતિંગ વધારો નિશ્ચિત છે. અમેરિકાના ટ્રેઝરી વિભાગ (Treasury Department) એ સંકેત આપ્યા છે કે હવે $100 પ્રતિ બેરલ એ ‘ન્યૂ નોર્મલ’ બની જશે.

સામાન્ય જનતા પર આર્થિક બોજ

આ આર્થિક કટોકટીની સીધી અસર સામાન્ય જનતા પર જોવા મળી રહી છે:

યુદ્ધની શરૂઆતથી અત્યાર સુધીમાં પેટ્રોલ (Petrol) ના ભાવમાં 35% નો વધારો થયો છે.

ડીઝલ (Diesel) ના ભાવમાં 45% નો તોતિંગ વધારો નોંધાયો છે.

નિષ્ણાતો માને છે કે ઇંધણના વધતા ભાવને કારણે જીવનજરૂરી ચીજવસ્તુઓ, કરિયાણું અને ટ્રાન્સપોર્ટેશન (Transportation) મોંઘા થશે, જેનાથી મોંઘવારી (Inflation) માં મોટો ઉછાળો આવશે. પરિસ્થિતિને કાબૂમાં લેવા માટે વ્હાઇટ હાઉસ હવે ઇમરજન્સી પાવર્સ (Emergency Powers) નો ઉપયોગ કરી કિંમતોને નિયંત્રિત કરવા માટે ઉદ્યોગ જગતના સંપર્કમાં છે.