અમેરિકામાં જ ભણ્યા પછી પણ નોકરીના ફાંફાં પડશે! નવા નિયમથી 3 લાખ યુવાનોના ભવિષ્ય પર લટકતી તલવાર

US OPT Rules | અમેરિકા (United States) માં અભ્યાસ પૂર્ણ કર્યા પછી ત્યાં જ નોકરી કરવા ઈચ્છતા હજારો વિદેશી સ્નાતકો માટે મોટા સમાચાર સામે આવ્યા છે. યુએસ ડિપાર્ટમેન્ટ ઓફ હોમલેન્ડ સિક્યુરિટી (DHS) એ પુષ્ટિ કરી છે કે તેઓ ઓપ્શનલ પ્રેક્ટિકલ ટ્રેનિંગ (Optional Practical Training – OPT) પ્રોગ્રામનું પુનઃમૂલ્યાંકન કરી રહ્યા છે. આ ફેરફારથી F-1 વિઝા ધારકો માટે અભ્યાસ પછીના વર્ક રૂટમાં મોટા બદલાવ આવી શકે છે.

300,000 ભારતીય વિદ્યાર્થીઓ પર અસર

વૉશિંગ્ટન (Washington) થી મળતી માહિતી મુજબ, હાલમાં અમેરિકામાં 300,000 થી વધુ ભારતીય વિદ્યાર્થીઓ અભ્યાસ કરી રહ્યા છે, જેમાંથી ઘણા વિદ્યાર્થીઓ પોતાનો અભ્યાસ પૂરો કર્યા પછી OPT હેઠળ કામ કરી રહ્યા છે. હોમલેન્ડ સિક્યુરિટી સેક્રેટરી ક્રિસ્ટી નોએમે (Kristi Noem) જણાવ્યું હતું કે, DHS અત્યારે એ તપાસી રહ્યું છે કે વર્તમાન પ્રેક્ટિકલ ટ્રેનિંગનો સમયગાળો અને કાર્યક્ષેત્ર અમેરિકન લેબર માર્કેટ (Labor Market) અને રાષ્ટ્રીય સુરક્ષાના હિતમાં છે કે નહીં.

શું છે આ OPT પ્રોગ્રામ?

OPT પ્રોગ્રામ હેઠળ F-1 વિઝા ધારક વિદ્યાર્થીઓને તેમની ડિગ્રી પૂર્ણ કર્યા પછી 12 મહિના સુધી અમેરિકામાં કામ કરવાની મંજૂરી મળે છે. આ ઉપરાંત, વિજ્ઞાન, ટેકનોલોજી, એન્જિનિયરિંગ અને ગણિત (STEM) ક્ષેત્રના સ્નાતકો વધારાના 24 મહિનાના એક્સટેન્શન (Extension) માટે પાત્ર છે. ભારતીય વિદ્યાર્થીઓ માટે આ પ્રોગ્રામ H-1B વિઝા મેળવવા માટેનો એક મહત્વપૂર્ણ માર્ગ (Bridge) માનવામાં આવે છે.

‘અમેરિકા ફર્સ્ટ’ પોલિસી હેઠળ ફેરફાર

રાષ્ટ્રપતિ ડોનાલ્ડ ટ્રમ્પ (President Trump) ની ‘અમેરિકા ફર્સ્ટ’ (America First) ઇમિગ્રેશન પોલિસીને ધ્યાનમાં રાખીને આ સમીક્ષા કરવામાં આવી રહી છે. સરકારનો ઉદ્દેશ્ય અમેરિકન કામદારોને વિદેશી નાગરિકો દ્વારા વિસ્થાપિત થતા બચાવવાનો અને ઇમિગ્રેશન પ્રોગ્રામમાં થતી છેતરપિંડી રોકવાનો છે.

DHS એ સંકેત આપ્યો છે કે Spring 2025 ના એજન્ડામાં આ અંગે નવા નિયમો (Rulemaking) રજૂ કરવામાં આવી શકે છે. જો આ પ્રોગ્રામમાં કાપ મૂકવામાં આવે અથવા તેને સમાપ્ત કરવામાં આવે, તો હજારો ભારતીય પ્રોફેશનલ્સના અમેરિકામાં રહેવાના સપના પર સીધી અસર પડી શકે છે.