UPSC Exam New Rules 2026 | સંઘ લોક સેવા આયોગ (UPSC) દ્વારા વર્ષ 2026ની સિવિલ સેવા પરીક્ષા (CSE) માટેનું સત્તાવાર નોટિફિકેશન (Notification) જાહેર કરવામાં આવ્યું છે. આ વર્ષે આયોગે પરીક્ષાના નિયમોમાં પાયાના ફેરફારો કર્યા છે, જેની સીધી અસર અત્યારે સેવા આપી રહેલા અધિકારીઓ પર પડશે.
IAS અને IFS હવે ફરી પરીક્ષા નહીં આપી શકે
નવા નિયમો મુજબ, જે ઉમેદવારો અગાઉ UPSC પાસ કરીને IAS અથવા IFS તરીકે નિયુક્ત થઈ ચૂક્યા છે, તેઓ હવે UPSC CSE 2026ની પરીક્ષામાં બેસી શકશે નહીં. જો કોઈ ઉમેદવાર પ્રિલિમિનરી પરીક્ષા (Preliminary Exam) પાસ કર્યા પછી પરંતુ મેઇન્સ (Mains) પહેલા આ સેવાઓમાં નિમણૂક મેળવે છે, તો તેઓ આગળની પરીક્ષા આપવા માટે અપાત્ર ઠરશે.
IPS માટે બદલાયા નિયમો
IPS અધિકારીઓ માટે પણ નિયમો સ્પષ્ટ કરવામાં આવ્યા છે. જો કોઈ ઉમેદવાર અગાઉથી IPS તરીકે પસંદગી પામ્યો હોય, તો તે 2026ના પરિણામના આધારે ફરીથી એ જ સેવાનો (IPS) વિકલ્પ પસંદ કરી શકશે નહીં. જો તેમને રેન્ક સુધારવો હોય તો અન્ય સેવા પસંદ કરવી પડશે.
નોકરી છોડવા અને ટ્રેનિંગ (Training) અંગેની જોગવાઈ
રાજીનામું (Resignation): વર્ષ 2025 કે તે પહેલા પાસ થયેલા અધિકારીઓ 2026 અને 2027માં નોકરી ચાલુ રાખીને પરીક્ષા આપી શકશે. પરંતુ 2028માં પરીક્ષા આપવા માટે તેમણે ફરજિયાત રાજીનામું આપવું પડશે.
મુક્તિ (Exemption): જો કોઈ ઉમેદવાર 2026માં પસંદ થાય અને 2027માં ફરી પરીક્ષા આપવા માંગતો હોય, તો તેણે ટ્રેનિંગમાં જોડાવામાંથી સત્તાવાર મુક્તિ લેવી પડશે. મંજૂરી વગર ગેરહાજર રહેનારનું આવેદન રદબાતલ ગણાશે.
AI અને બાયોમેટ્રિક સુરક્ષા (AI & Biometric Security)
પરીક્ષામાં ગેરરીતિ રોકવા માટે UPSC હવે AI-આધારિત ફેશિયલ રેકગ્નિશન (Facial Recognition) અને આધાર વેરિફિકેશન (Aadhaar Verification) નો ઉપયોગ કરશે. ઉમેદવારોએ હવે આધાર સાથે જોડાયેલા નવા પોર્ટલ પર નોંધણી કરાવવી ફરજિયાત રહેશે.
શૈક્ષણિક લાયકાત (Eligibility)
IAS: કોઈપણ વિષયમાં સ્નાતક (Bachelor’s Degree).
IFS: એનિમલ હસબન્ડરી, બોટની, કેમિસ્ટ્રી અથવા મેથેમેટિક્સ જેવા વિશિષ્ટ વિષયો સાથે સ્નાતકની ડિગ્રી અનિવાર્ય.