અમેરિકાના ફ્લોરિડામાં 26 વર્ષીય તેલુગુ વિદ્યાર્થી અરુણ સાઈ રેડ્ડીનું બીમારીના કારણે મોત

Arun Sai Reddy | અમેરિકામાં (America) ઉચ્ચ શિક્ષણ મેળવી રહેલા ભારતીય વિદ્યાર્થીઓના મોતના કિસ્સાઓ સતત વધી રહ્યા છે, જે ચિંતાનો વિષય બન્યો છે. આ કડીમાં વધુ એક હૃદયદ્રાવક ઘટના સામે આવી છે, જ્યાં યુએસએના ફ્લોરિડામાં (Florida) રહેતા 26 વર્ષીય તેલુગુ વિદ્યાર્થી અરુણ સાઈ રેડ્ડીનું (Arun Sai Reddy) અચાનક બીમારીના કારણે અવસાન થયું છે. અરુણ મૂળ તેલંગાણાના (Telangana) મહબૂબનગર જિલ્લાનો વતની હતો.

ભણતર પૂરું કર્યા બાદ નોકરીની શોધમાં હતો અરુણ
મળતી માહિતી મુજબ, અરુણ સાઈ રેડ્ડી ફ્લોરિડાના ટેમ્પા (Tampa) શહેરમાં રહેતો હતો. તેણે પોતાનો અભ્યાસ પૂર્ણ કર્યા બાદ ત્યાં ‘સ્ટેમ ઓપ્શનલ પ્રેક્ટિકલ ટ્રેનિંગ’ (STEM OPT) પ્રોગ્રામ હેઠળ કામ કરી રહ્યો હતો. આ પ્રોગ્રામ આંતરરાષ્ટ્રીય વિદ્યાર્થીઓને અમેરિકામાં વ્યાવસાયિક કામનો અનુભવ મેળવવાની તક આપે છે. આ ટ્રેનિંગ દરમિયાન જ અરુણ ત્યાં ફૂલ-ટાઇમ (Full-Time) નોકરીની તકો શોધી રહ્યો હતો.

હોસ્પિટલમાં સારવાર દરમિયાન તોડ્યો દમ
અહેવાલો અનુસાર, 19 જૂનના રોજ અરુણની તબિયત અચાનક બગડી ગઈ હતી. તેને તાત્કાલિક નજીકની હોસ્પિટલમાં સારવાર માટે દાખલ કરવામાં આવ્યો હતો. જોકે, ડોક્ટરોના તમામ પ્રયાસો છતાં તેની સ્થિતિમાં સુધારો થયો નહોતો અને સારવાર દરમિયાન જ તેણે અંતિમ શ્વાસ લીધા હતા. આ અણધારી દુર્ઘટનાથી તેના પરિવાર અને મિત્રો ઊંડા આઘાતમાં સરી પડ્યા છે. હાલમાં પરિવારના સભ્યો અને સંબંધિત સત્તાવાળાઓ તેના પાર્થિવ દેહને ભારત (India) પરત લાવવા માટે જરૂરી વ્યવસ્થા કરી રહ્યા છે.