ઝોહોના સ્થાપક શ્રીધર વેંબુનું નિવેદન: ‘શું વિદેશમાં રહેવા ભીખ માંગીએ?’

Sridhar Vembu Zoho | અમેરિકા દ્વારા ગ્રીન કાર્ડ પ્રક્રિયા અટકાવ્યા બાદ ઝોહોના ફાઉન્ડર શ્રીધર વેંબુએ ભારતીય ટેકીઝને સ્વદેશ પરત ફરીને ભારત માટે કામ કરવા અપીલ કરી હતી.

જો કે, આના ચાર દિવસ પછી જ ઝોહો કંપનીએ આ વર્ષે કર્મચારીઓને અપ્રેઝલ (પગાર વધારો) નહીં આપવાની જાહેરાત કરી, જેના કારણે સોશિયલ મીડિયા પર ભારે વિવાદ થયો અને વેંબુને બેવડી નીતિ અપનાવવા બદલ ટ્રોલ કરવામાં આવ્યા.

આ બાબતે પ્રતિક્રિયા આપતા શ્રીધર વેંબુએ સોશિયલ મીડિયા પર જણાવ્યું કે, જો કોઈ અન્ય દેશ તમને પોતાના ઘરે જવાનું કહે, તો તમારે પાછા આવવું જ પડે છે.

તેનો બીજો કોઈ વિકલ્પ શું હોઈ શકે? શું આપણે ત્યાં રહેવા માટે ભીખ માંગવી જોઈએ અથવા ગેરકાયદેસર રીતે રહેવું જોઈએ? સોફ્ટવેર ક્ષેત્ર ભલે પડકારજનક હોય, પરંતુ ભારતમાં બનાવવા માટે ઘણી બધી બાબતો ઉપલબ્ધ છે.

When another country tells you to go home, you come home. What is the alternative? Beg them to allow us to stay? Stay illegally?

There are a million things to build in India, even if software is saturated or goes away.

— Sridhar Vembu (@svembu) October 13, 2026

ઝોહો કંપનીમાં અપ્રેઝલ ન આપવાના કારણો જણાવતા વેંબુએ આર્ટિફિશિયલ ઇન્ટેલિજન્સ (AI) ના વધતા ખર્ચ અને પડકારજનક વૈશ્વિક ભૌગોલિક રાજકારણને જવાબદાર ગણાવ્યા છે.

તેમણે સ્પષ્ટ કર્યું કે ડેટા સેન્ટર માટે જરૂરી સર્વરના ભાવમાં ચાર ગણો વધારો થયો છે અને AI નો વપરાશ ઝડપથી વધવાથી ખર્ચ પણ વધી ગયો છે. આર્થિક અનિશ્ચિતતાના કારણે માર્કેટિંગ બજેટ ઘટાડવામાં આવ્યું છે અને કર્મચારીઓના પગાર વધારા પર રોક લગાવવામાં આવી છે.

કંપનીના સંકટ વચ્ચે તેમણે એમ પણ કહ્યું કે મોટાભાગના કર્મચારીઓ આ સ્થિતિ સમજે છે અને તેઓ આ મુશ્કેલ સમયમાંથી બહાર નીકળવા માટે સખત મહેનત કરી રહ્યા છે.

કંપની છેલ્લા 18 મહિનાથી કર્મચારીઓની સંખ્યામાં વધારો કરી રહી નથી અને આગામી 3 થી 5 વર્ષમાં કંપની પોતાની પુનઃરચના કરવા પર ધ્યાન કેન્દ્રિત કરી રહી છે.

સોશિયલ મીડિયા પર યુઝર્સે સવાલ ઉઠાવ્યો હતો કે જો ઝોહો જેવી દિગ્ગજ કંપની પોતે જ આર્થિક સંકટ સામેઝૂઝી રહી છે અને અપ્રેઝલ નથી આપી શકતી, તો પરત ફરતા NRIs માટે અહીં નવી તકો ઊભી કરવી કેટલી સરળ હશે?

કેટલાક લોકોએ સમર્થન આપતા કહ્યું કે મુશ્કેલ સમયમાં આવું સાચું બોલવા માટે હિંમત જોઈએ છે અને દેશભક્તિ કોઈ મજબૂત વાતાવરણ વિના પણ લોકોને પ્રેરણા આપી શકે છે.