વૉશરૂમનો દરવાજો ખોલ્યો તો મોબાઇલ પર ગૂગલમાંથી આન્સર ગોખી રહ્યો હતો NEETનો વિદ્યાર્થી!

NEET Cheating Case | 21 જૂને આયોજિત થયેલી NEET-UG રી-એક્ઝામને ‘લીક-પ્રૂફ’ બનાવવા માટે ભલે સરકારે 51 હજાર જેમર્સ અને કડક સુરક્ષાનો પહેરો ગોઠવ્યો હતો, પરંતુ હૈદરાબાદથી નકલનો એક એવો હેરાન કરનારો વ્યક્તિગત કિસ્સો સામે આવ્યો છે જેને સાંભળીને સુરક્ષા એજન્સીઓ પણ દંગ રહી ગઈ છે.

અહીં આદિબટલા પોલીસ સ્ટેશન વિસ્તારના એક પરીક્ષા કેન્દ્ર પર એક 18 વર્ષીય વિદ્યાર્થીને પરીક્ષા દરમિયાન વૉશરૂમની અંદર મોબાઇલ ફોનથી ગૂગલ પર આન્સર સર્ચ કરતા રંગેહાથ ઝડપી લેવામાં આવ્યો છે.

સવારે 7 વાગ્યે જ રચી દીધું હતું કાવતરું: ફ્લશ ટેન્કમાં છુપાવ્યો ફોન

હૈદરાબાદ પોલીસ દ્વારા જાહેર કરાયેલી સત્તાવાર યાદી મુજબ, આરોપી વિદ્યાર્થી અછમપેટ (Achampet) નો રહેવાસી છે. તેનું પરીક્ષા કેન્દ્ર રાગનગુડા સ્થિત જિલ્લા પરિષદ હાઈસ્કૂલમાં હતું. વિદ્યાર્થીએ સુરક્ષા ચક્રને તોડવા માટે ખૂબ જ શાતિર રસ્તો અપનાવ્યો હતો.

સ્કૂલના વૉશરૂમની વેન્ટિલેટર બારી સીધી સ્કૂલની બહારની બાઉન્ડ્રી વોલ સાથે જોડાયેલી હોવાથી, વિદ્યાર્થી પરીક્ષા શરૂ થવાના ઘણા સમય પહેલા સવારે અંદાજે 7 વાગ્યે જ ત્યાં પહોંચી ગયો હતો. તેણે બહારથી જ વેન્ટિલેટરના રસ્તે વૉશરૂમની અંદર એક મોબાઇલ ફોન મૂકી દીધો હતો.

પોલીસ સુરક્ષા ટીમોએ સવારે 6 વાગ્યે અને પછી ફરીથી 11 વાગ્યે સમગ્ર પરિસરનું બે વાર સઘન નિરીક્ષણ કર્યું હતું. આ છતાં, ફ્લશ ટેન્કની અંદર વોટર-પ્રૂફ કવરમાં છુપાવવામાં આવેલો આ ફોન શરૂઆતની તપાસમાં સુરક્ષાકર્મીઓની નજરમાંથી બચી ગયો હતો.

પેટના દુખાવાનું બહાનું અને ગૂગલ પર સર્ચ

પરીક્ષા શરૂ થયા પછી, આરોપી વિદ્યાર્થીએ અચાનક ઇન્વિજિલેટર (Invigilator) ને પેટમાં સખત દુખાવાની ફરિયાદ કરી અને વૉશરૂમ જવાની પરવાનગી માંગી. આ વૉશરૂમ આખા પરીક્ષા કેન્દ્ર માટે એકમાત્ર કોમન ફેસિલિટી હતી અને સ્કૂલના મુખ્ય બિલ્ડિંગથી ઘણું દૂર આવેલું હતું, તેથી વિદ્યાર્થીને લાગ્યું કે તે ત્યાં સુરક્ષિત છે.

આ રીતે ભાંડો ફૂટ્યો

વૉશરૂમની અંદર વિદ્યાર્થીને ગયે જરૂરિયાત કરતાં વધુ સમય વીતી ગયો, ત્યારે હોલમાં તૈનાત ઇન્વિજિલેટરને શંકા ગઈ. તેમણે તરત જ કેટલાક સ્ટાફ મેમ્બર્સને ચેક કરવા માટે મોકલ્યા. જ્યારે સ્ટાફે અંદર જઈને જોયું, તો વિદ્યાર્થી મોબાઇલ ફોન પર સીધો ગૂગલ (Google) ના માધ્યમથી નીટ (NEET) પરીક્ષાના પ્રશ્નોના જવાબો સર્ચ કરી રહ્યો હતો. તેને રંગેહાથ પકડીને પોલીસને એલર્ટ કરવામાં આવી અને ફોન જપ્ત કરી લેવાયો. ડિવાઇસની તપાસમાં સામે આવ્યું કે તે એક્ટિવલી ગૂગલ સર્ચનો ઉપયોગ કરી રહ્યો હતો અને આ સિવાય ફોનમાં ઇન્સ્ટાગ્રામ (Instagram) સિવાય કોઈ બીજી શંકાસ્પદ એપ્લિકેશન એક્ટિવ નહોતી.

પોલીસ કસ્ટડીમાં આરોપી, કડક કલમો હેઠળ કેસ દાખલ

પૂછપરછ દરમિયાન આરોપી વિદ્યાર્થીએ પોતાનો ગુનો કબૂલી લીધો છે અને તે હાલમાં હૈદરાબાદ પોલીસની કસ્ટડીમાં છે. સ્કૂલ પ્રશાસનની લેખિત ફરિયાદ બાદ આદિબટલા પોલીસે આરોપી વિરુદ્ધ ભારતીય ન્યાય સંહિતા (BNS) ની સંબંધિત કલમો અને કડક ‘જાહેર પરીક્ષા (અયોગ્ય સાધનો નિવારણ) અધિનિયમ, 2024’ (Public Examinations – Prevention of Unfair Means – Act, 2024) હેઠળ ગુનો નોંધી લીધો છે.