કુવૈતથી દિલ્હી આવી રહેલા ઇન્ડિગો વિમાનને બોમ્બથી ઉડાવી દેવાની ધમકી, અમદાવાદમાં ઇમરજન્સી લેન્ડિંગ

IndiGo Flight Bomb Threat | છેલ્લા કેટલાક સમયથી વિમાનોને ધમકીભર્યા સંદેશાઓ મળવાનો સિલસિલો યથાવત છે. શુક્રવારે કુવૈતથી (Kuwait) દિલ્હી આવી રહેલી IndiGo ની ફ્લાઇટને બોમ્બથી ઉડાવી દેવાની અને હાઇજેક (Hijack) કરવાની ધમકી મળતા ચકચાર મચી ગઈ હતી. સાવચેતીના ભાગરૂપે વિમાનનું અમદાવાદ એરપોર્ટ (Ahmedabad Airport) પર ઇમરજન્સી લેન્ડિંગ (Emergency Landing) કરાવવામાં આવ્યું હતું.

હાઇજેક અને બોમ્બની ધમકીથી ફફડાટ
મળતી માહિતી મુજબ, વિમાનમાં એક ટિશ્યુ પેપર (Tissue Paper) પર લખેલી નોટ મળી આવી હતી, જેમાં પ્લેનને હાઇજેક કરવાની અને બોમ્બથી ઉડાવી દેવાની ધમકી આપવામાં આવી હતી. આ સમાચાર મળતા જ તંત્ર એલર્ટ થઈ ગયું હતું. વિમાનમાં સવાર તમામ 180 મુસાફરો અને તેમના સામાનની સઘન તપાસ કરવામાં આવી હતી. હાલમાં સરદાર વલ્લભભાઈ પટેલ ઇન્ટરનેશનલ એરપોર્ટ (SVPIA) પર વિમાન સુરક્ષિત છે.

સુરક્ષા એજન્સીઓ એક્શનમાં, તપાસ શરૂ
ધમકીભરી નોટ મળ્યા બાદ સુરક્ષા એજન્સીઓ (Security Agencies) તુરંત સક્રિય થઈ ગઈ હતી. એરપોર્ટના સૂત્રોના જણાવ્યા અનુસાર (1) બોમ્બ ડિસ્પોઝલ સ્કવોડ દ્વારા વિમાનની સંપૂર્ણ તપાસ કરવામાં આવી છે. (2) પ્રોટોકોલ મુજબ તમામ મુસાફરોની ઓળખની પુષ્ટિ કરવામાં આવી રહી છે. (3) અત્યાર સુધી કોઈ શંકાસ્પદ વસ્તુ મળી આવી નથી. આ તપાસને કારણે દિલ્હી જતી ફ્લાઇટમાં આશરે બે કલાક જેટલો વિલંબ થઈ શકે છે.

જાન્યુઆરી મહિનામાં ધમકીઓની હારમાળા
આ વર્ષે જાન્યુઆરીમાં અગાઉ પણ બે વખત આવી ઘટનાઓ બની ચૂકી છે:

18 જાન્યુઆરી: દિલ્હીથી બાગડોગરા જતી ફ્લાઇટમાં બોમ્બની ધમકી મળતા તેને લખનૌ (Lucknow) ડાયવર્ટ કરવામાં આવી હતી.

22 જાન્યુઆરી: દિલ્હીથી પુણે જતી ફ્લાઇટના ટોઇલેટમાં હાથથી લખેલી ધમકીભરી નોટ મળી હતી, ત્યારબાદ પુણે એરપોર્ટ પર ઇમરજન્સી લેન્ડિંગ કરાયું હતું.

વારંવાર મળતી આ ધમકીઓને કારણે એરપોર્ટ સુરક્ષા અને એરલાઇન્સ કંપનીઓ માટે ચિંતામાં વધારો થયો છે.