ઈરાન યુદ્ધ વચ્ચે તેલના જહાજો માટે ખતરો: ભારતે અમેરિકા પાસે માંગી સ્પેશિયલ સિક્યોરિટી

US-Israel-Iran war | પશ્ચિમ એશિયા (West Asia) માં વધી રહેલા તણાવ અને દરિયાઈ હુમલાઓના જોખમ વચ્ચે ભારતે પોતાની ઉર્જા પુરવઠો (Energy Supply) સુરક્ષિત કરવા માટે મોટું કદમ ઉઠાવ્યું છે. રોયટર્સ (Reuters) ના રિપોર્ટ મુજબ, ભારત સરકાર મધ્ય પૂર્વથી આવતા તેલ અને ગેસના જહાજોની સુરક્ષા માટે અમેરિકા (USA) સાથે મરીન સિક્યોરિટી કવર (Maritime Security Cover) પર વાતચીત કરી રહી છે. ભારત ઈચ્છે છે કે ખાસ કરીને સ્ટ્રેટ ઓફ હોર્મુઝ (Strait of Hormuz) જેવા સંવેદનશીલ રસ્તાઓ પર અમેરિકી નૌસેના ભારતીય જહાજોને સુરક્ષા પૂરી પાડે.

નોંધનીય છે કે દુનિયાના કુલ તેલ પુરવઠાનો 1/5 ભાગ આ રસ્તેથી પસાર થાય છે. ભારત પોતાની જરૂરિયાતનું 40% તેલ અને 85 થી 90% રસોઈ ગેસ (LPG) આ જ વિસ્તારમાંથી આયાત કરે છે. રાષ્ટ્રપતિ ડોનાલ્ડ ટ્રમ્પે (Donald Trump) પણ દરિયાઈ વેપાર માટે નાણાકીય ગેરંટી અને સુરક્ષા આપવાના સંકેત આપ્યા છે. યુદ્ધની અસરને કારણે ભારતને મળતા ગેસ પુરવઠામાં પ્રતિદિન 60 મિલિયન સ્ટાન્ડર્ડ ક્યુબિક મીટર (MMSCMD) નો ઘટાડો નોંધાયો છે.

પરિસ્થિતિને પહોંચી વળવા ભારત હવે અબુ ધાબી નેશનલ ઓઈલ કંપની (ADNOC) અને ટોટલ એનર્જીસ (TotalEnergies) જેવી કંપનીઓ સાથે પણ વૈકલ્પિક વ્યવસ્થા માટે ચર્ચા કરી રહ્યું છે. અમેરિકાએ રાયસીના ડાયલોગ (Raisina Dialogue) દરમિયાન ભારતને ઉર્જા સુરક્ષામાં સહયોગ આપવાની ખાતરી આપી છે. જો સ્થિતિ વધુ બગડશે તો સરકાર ઉદ્યોગો માટે ગેસ સપ્લાયમાં પ્રાથમિકતાના ધોરણે ફેરફાર કરી શકે છે.