દેશની પ્રથમ હાઇડ્રોજન ટ્રેન તૈયાર, અન્ય ટ્રેન કરતા કેમ છે ખાસ જાણો…

India’s First Hydrogen Train | ભારતીય રેલવેએ દેશની પ્રથમ હાઇડ્રોજન-સંચાલિત ટ્રેન ચલાવવાની દિશામાં એક મોટું પગલું ભર્યું છે. કેન્દ્રીય રેલ મંત્રી અશ્વિની વૈષ્ણવે લોકસભામાં લેખિત જવાબમાં જણાવ્યું કે દેશની પ્રથમ હાઇડ્રોજન ટ્રેન-સેટનું નિર્માણ પૂર્ણ થઈ ગયું છે. રિસર્ચ, ડિઝાઇન એન્ડ સ્ટાન્ડર્ડ્સ ઓર્ગેનાઇઝેશન (RDSO) દ્વારા નિર્ધારિત માપદંડો મુજબ આ ટ્રેન-સેટ વિકસાવવામાં આવ્યો છે.

આત્મનિર્ભર ભારત તરફ એક પગલું

રેલ મંત્રીએ જણાવ્યું કે આ હાઇડ્રોજન ટ્રેન-સેટ સૌથી લાંબો અને સૌથી શક્તિશાળી હાઇડ્રોજન ટ્રેન-સેટ છે.

• આ ટ્રેન-સેટ સંપૂર્ણપણે સ્વદેશી રીતે ડિઝાઇન અને વિકસાવવામાં આવ્યો છે, જે આત્મનિર્ભર ભારતની દિશામાં ભારતીય રેલની પ્રતિબદ્ધતા દર્શાવે છે.
• ટ્રેનના સંચાલન માટે જરૂરી હાઇડ્રોજનની સપ્લાય માટે હરિયાણાના જીંદમાં ઇલેક્ટ્રોલિસિસ પ્રક્રિયા આધારિત ગ્રીન હાઇડ્રોજન ઉત્પાદન પ્લાન્ટ પણ સ્થાપિત કરવામાં આવી રહ્યો છે.

વિશ્વની સૌથી લાંબી હાઇડ્રોજન ટ્રેન

રેલ મંત્રીના જણાવ્યા અનુસાર, દેશની આ પ્રથમ હાઇડ્રોજન ટ્રેન-સેટની મુખ્ય વિશેષતાઓ નીચે મુજબ છે:

• કુલ કોચ: આ ટ્રેન-સેટમાં 10 કોચ છે, જે તેને વિશ્વની સૌથી લાંબી હાઇડ્રોજન ટ્રેન બનાવે છે.

• શક્તિ: તે 2400 kW ક્ષમતા સાથે બ્રોડ ગેજ પર ચાલનારી સૌથી શક્તિશાળી હાઇડ્રોજન ટ્રેન-સેટ છે.

• પાવર કાર: ટ્રેન-સેટમાં 1200 kW પ્રતિ પાવર કારની ક્ષમતાવાળી બે ડ્રાઇવિંગ પાવર કાર (DPC) સામેલ છે.

• પેસેન્જર કોચ: તેમાં 8 પેસેન્જર કોચ લગાવવામાં આવ્યા છે.

ઝીરો કાર્બન ઉત્સર્જન

આ ટ્રેન-સેટ પર્યાવરણને અનુકૂળ ટેકનોલોજીનો ઉપયોગ કરે છે.

• હાઇડ્રોજન-સંચાલિત આ ટ્રેન-સેટ સંપૂર્ણપણે ઝીરો કાર્બન ડાયોક્સાઇડ ઉત્સર્જન કરે છે.

• તેનું એકમાત્ર ઉત્સર્જન જળવાષ્પ છે, જે સ્વચ્છ, હરિત અને વૈકલ્પિક ઇંધણ આધારિત ટેકનોલોજીના વિકાસમાં ભારતીય રેલવેની એક મોટી છલાંગ છે.

રેલ મંત્રીએ સ્પષ્ટતા કરી છે કે આ એક પાયલોટ પ્રોજેક્ટ હોવાથી, તેની કિંમતની સરખામણી હાલની પરંપરાગત ટ્રેક્શન પ્રણાલીઓ સાથે કરવી યોગ્ય નથી.