Gujarat Fuel & LPG Supply: ગુજરાતમાં ઈંધણની અછત નથી, જાણો શું કહ્યું સરકારે

મિડલ ઈસ્ટ (Middle East) માં અમેરિકા, ઈઝરાયલ અને ઈરાન વચ્ચે સર્જાયેલી યુદ્ધ જેવી ભયંકર પરિસ્થિતિને પગલે ઈંધણના પુરવઠાને લઈને અનેક અટકળો વહેતી થઈ છે. આ વૈશ્વિક અસ્થિરતા વચ્ચે ગુજરાત સરકાર (Government of Gujarat) અને કેન્દ્ર સરકાર સતત સ્થિતિ પર નજર રાખી રહી છે. તાજેતરમાં અમદાવાદ ખાતે પ્રેસ ઇન્ફોર્મેશન બ્યૂરો (PIB) દ્વારા આયોજિત પ્રેસ બ્રીફિંગમાં રાજ્યના ઉચ્ચ અધિકારીઓએ સ્પષ્ટતા કરી છે કે ગુજરાતમાં પેટ્રોલ, ડીઝલ અને LPG નો પૂરતો જથ્થો ઉપલબ્ધ છે.

ઈંધણની સ્થિતિ (Fuel Availability) IOC ના એક્ઝિક્યુટિવ ડાયરેક્ટર સંજીબ બેહરાએ જણાવ્યું હતું કે, સમગ્ર રાજ્યમાં ઈંધણનો પુરવઠો પૂરતા પ્રમાણમાં છે. હાલમાં ગુજરાતમાં 6,688 પેટ્રોલ પંપ (Petrol Pumps) કાર્યરત છે, જેમાંથી 5,133 જાહેર ક્ષેત્રના (PSU) અને 1,555 ખાનગી કંપનીઓના છે. રાજ્યના 17 સપ્લાય પોઈન્ટ્સ પર ઇન્વેન્ટરીનું સ્તર જળવાઈ રહ્યું હોવાથી નાગરિકોએ ‘પેનિક બાયિંગ’ (Panic Buying) થી બચવું જોઈએ.

LPG પુરવઠો અને વિતરણ (LPG Supply & Trend) માર્ચ 2026 દરમિયાન LPG ના વપરાશમાં મોટો ઉછાળો જોવા મળ્યો હતો. 4 April ના રોજ 1,76,983 બુકિંગ સામે 2,43,088 સિલિન્ડરની ડિલિવરી કરવામાં આવી છે, જે દર્શાવે છે કે બેકલોગ (Backlog) ઝડપથી ક્લિયર થઈ રહ્યો છે. જોકે, અસાધારણ માંગને કારણે ડિલિવરીનો સમય 1 દિવસથી વધીને 4 દિવસ થયો છે, પરંતુ તેને સુધારવા કામગીરી તેજ કરાઈ છે. ગુજરાતમાં 88% બુકિંગ ડિજિટલ (Digital) માધ્યમથી થાય છે અને 85% ડિલિવરી OTP આધારિત વેરિફિકેશનથી સુરક્ષિત છે.

કોમર્શિયલ ગેસ માટે નવી વ્યવસ્થા વર્તમાન સ્થિતિને જોતા સરકારે કોમર્શિયલ LPG પુરવઠામાં પ્રાથમિકતા નક્કી કરી છે. હોસ્પિટલો અને શૈક્ષણિક સંસ્થાઓને 100% પુરવઠો સુનિશ્ચિત કરાયો છે. જ્યારે ફાર્મા અને ડેરી ઉદ્યોગને 70% પુરવઠો અપાશે. સ્ટીલ અને ટેક્સટાઈલ જેવા બિન-જરૂરી ઉદ્યોગોને 20% પુરવઠો આપી તેમને PNG જેવા વૈકલ્પિક સ્ત્રોત અપનાવવા પ્રોત્સાહિત કરાયા છે. સરકારની આ વ્યવસ્થાથી સામાન્ય જનતાને મળતા ઘરેલુ ગેસ પર કોઈ અસર પડશે નહીં.