‘ભારતમાં અનામત ક્યારેય ખતમ નહીં થાય, વિદેશ જતાં રહો’: જનરલ કેટેગરીના વિદ્યાર્થીઓને ભારતીય ઇન્વેસ્ટરની સલાહ, સોશિયલ મીડિયા પર છેડાઈ ચર્ચા

ભારતમાં અનામત (Reservation) અને મેરિટને લઈને ચાલી રહેલી ચર્ચા વચ્ચે સોશિયલ મીડિયા પર એક નવી અને મોટી બહેસ શરૂ થઈ ગઈ છે.

દુબઈમાં રહેતા જાણીતા ભારતીય રોકાણકાર (Investor) અક્ષત શ્રીવાસ્તવે દેશના લાખો જનરલ કેટેગરી (General Category)ના વિદ્યાર્થીઓને સલાહ આપી છે કે જો તેમને તક મળે તો તેમણે વિદેશ જઈને પોતાની કારકિર્દી બનાવવી જોઈએ.

અક્ષત શ્રીવાસ્તવે સોશિયલ મીડિયા પ્લેટફોર્મ X પર લખ્યું કે, “જો તમને દેશની બહાર જવાની તક મળે તો વિચાર્યા વગર જતાં રહો.” તેમણે તર્ક આપ્યો છે કે ભારતમાં કોઈ પણ રાજકીય પક્ષ સત્તા પર આવે, અનામત પ્રથા ક્યારેય નાબૂદ થવાની નથી. જેમ જેમ સંસાધનો ઘટશે તેમ રાજકીય પક્ષો દ્વારા મફત યોજનાઓ (Freebies) આપવાનું પ્રમાણ વધશે. તેથી વિદ્યાર્થીઓએ સરકાર કે રાજકારણ પાસેથી કોઈ અપેક્ષા રાખવી જોઈએ નહીં.

આર્થિક સ્વતંત્રતા મેળવવા પર ભાર અક્ષત శ్రీવાસ્તવે વિદ્યાર્થીઓને શિખામણ આપતા જણાવ્યું કે તમારો એકમાત્ર સાચો સહારો તમારી સખત મહેનત અને કમાણી છે. સરકારો તમારા માટે નવી તકો ઊભી નહીં કરે, પરંતુ તમારે જાતે જ તકો શોધવી પડશે. વિદેશમાં રહેવાથી ખૂબ જ ઝડપથી આર્થિક સ્વતંત્રતા (Financial Freedom) મેળવી શકાય છે. એકવાર તમે આર્થિક રીતે સક્ષમ થઈ જાવ, પછી જ્યારે પણ ઈચ્છો ત્યારે ભારત પાછા આવી શકો છો.

કયા દેશોમાં છે સારી તકો? પોતાની પોસ્ટમાં અક્ષત શ્રીવાસ્તવે લખ્યું કે તેઓ લાંબા સમય સુધી સિંગાપોર, UAE અને થાઈલેન્ડમાં રહ્યા છે. 2026ના વર્તમાન સમયમાં વિદેશ જવા માટેના કેટલાક મહત્વના મુદ્દાઓ તેમણે શેર કર્યા છે:

1. યુએસ (US) અને યુરોપના દેશોમાં વીઝા સંબંધિત કડક નિયમોના કારણે અભ્યાસ અર્થે જવાનો જૂનો માર્ગ હવે મુશ્કેલ બની ગયો છે.
2. ઘણા દેશોમાં વસ્તી ઘટી રહી છે, જેમ કે જાપાન. જો જનરલ કેટેગરીના વિદ્યાર્થીઓ જાપાનીઝ ભાષા શીખવાનો પ્રયત્ન કરે તો ત્યાં નવી તકોના દરવાજા ખુલી શકે છે.
3. Agoda જેવી મોટી વૈશ્વિક કંપનીઓ અત્યારે પણ થાઈલેન્ડ ઓફિસ માટે મોટી સંખ્યામાં ભારતીયોને હાયર કરી રહી છે.
4. આગામી વર્ષોમાં UAEમાં અભ્યાસ કરનારા વિદ્યાર્થીઓ માટે વધુ સારી અને સરળ વ્યવસ્થાઓ બનશે.

તેમણે ઉમેર્યું કે જો તમે ટોપ 1% વિદ્યાર્થીઓમાં સામેલ છો અને નેટવર્કિંગ તથા મહેનત કરવા તૈયાર છો, તો તમને વિદેશમાં સારી નોકરી ચોક્કસ મળી શકે છે. તેમણે પોતે પણ ભારતમાંથી 3 લોકોને હાયર કરીને UAEમાં નોકરી અપાવી હોવાનો દાવો કર્યો છે.

If you ever get a chance to move abroad, do it. Don’t think twice.

This is especially true if you are a General Category student, who competes on merit.

See reservation & all is not going away, irrespective of which political party comes to power.

As resources shrink,…

— Akshat Shrivastava (@Akshat_World) September 20, 2026

સોશિયલ મીડિયા પર મિશ્ર પ્રતિક્રિયાઓ અક્ષત શ્રીવાસ્તવની આ પોસ્ટ સોશિયલ મીડિયા પર વાયરલ થઈ રહી છે. કેટલાક યુઝર્સ તેમની વાત સાથે સહમત થઈ રહ્યા છે, તો કેટલાક લોકો વિદેશ જવાના પડકારો તરફ ધ્યાન દોરી રહ્યા છે. કાસિફ રઝા નામના એક યુઝરે કોમેન્ટ કરતા લખ્યું કે 2026 પછી વૈશ્વિક સ્થિતિઓ બદલાઈ છે અને વિદેશમાં એન્ટ્રી મેળવવી એટલી સરળ નથી રહી. સિંગાપોર અને મલેશિયા જેવા દેશોમાં પણ નિયમો ખૂબ કડક થયા છે.

(નોંધ: આ રોકાણકારના અંગત વિચારો છે. વાચકોને વિદેશ જવાનો કે કારકિર્દીનો કોઈ પણ નિર્ણય પોતાના વિવેક અને યોગ્ય તપાસના આધારે લેવાની સલાહ આપવામાં આવે છે.)