સાવધાન! દિલ્હીમાં વૃદ્ધ NRI મહિલાને 18 દિવસ ‘ડિજિટલ અરેસ્ટ’ રાખી ₹14.80 કરોડની ઠગાઈ

Digital Arrest Cyber Fraud | રાજધાની દિલ્હીના ગ્રેટર કૈલાશ-2 વિસ્તારમાં સાયબર ઠગાઈની (Cyber Fraud) અત્યાર સુધીની સૌથી મોટી ઘટના સામે આવી છે. સાયબર ગુનેગારોએ એક 77 વર્ષીય NRI મહિલાને ડરાવી-ધમકાવીને તેમના ખાતામાંથી ₹14.80 કરોડ પડાવી લીધા છે.

શું છે સમગ્ર ઘટના?

પીડિત મહિલા ઇન્દ્રા તનેજા અને તેમના પતિ ઓમ તનેજા અમેરિકાની સરકારમાં (US Government) ફરજ બજાવતા હતા અને વર્ષ 2016માં નિવૃત્ત થઈ ભારત પરત ફર્યા હતા. 24 ડિસેમ્બર 2025ના રોજ ઇન્દ્રા તનેજા પર એક અજાણ્યો કોલ આવ્યો હતો. કોલ કરનારે પોતાની ઓળખ ટેલિકોમ રેગ્યુલેટરી ઓથોરિટી ઓફ ઈન્ડિયા (TRAI) ના અધિકારી તરીકે આપી હતી.

ઠગોએ મહિલાને ડરાવતા કહ્યું કે, તેમનો મોબાઈલ નંબર અશ્લીલ અને વાંધાજનક કોલ્સ માટે વપરાયો છે. એટલું જ નહીં, તેમના બેંક ખાતામાં રહેલા નાણાં ‘મની લોન્ડરિંગ’ (Money Laundering) દ્વારા આવ્યા હોવાનો ખોટો આરોપ લગાવી ડરાવવામાં આવ્યા હતા.

નકલી IPS બની 18 દિવસ સુધી રાખ્યા ‘ડિજિટલ અરેસ્ટ’

ત્યારબાદ આ કોલ મુંબઈના કોલાબા પોલીસ સ્ટેશનના નામે ટ્રાન્સફર કરવામાં આવ્યો. ત્યાં એક વ્યક્તિએ પોતાની ઓળખ IPS ઓફિસર તરીકે આપી અને ધમકી આપી કે જો તેઓ સહકાર નહીં આપે તો તેમની ‘ફિઝિકલ ધરપકડ’ (Physical Arrest) કરવામાં આવશે.

ઠગોએ દંપતીને 24 ડિસેમ્બરથી 10 જાન્યુઆરી સુધી સતત ડિજિટલ અરેસ્ટ (Digital Arrest) રાખ્યા હતા, એટલે કે તેમને વીડિયો કોલ પર નજર હેઠળ રાખી કોઈને પણ જાણ ન કરવા દબાણ કર્યું હતું. આ 18 દિવસ દરમિયાન આઠ હપ્તામાં RTGS દ્વારા કુલ ₹14.80 કરોડ અલગ-અલગ ખાતાઓમાં ટ્રાન્સફર કરાવી લીધા હતા.

પોલીસ તપાસ તેજ

10 જાન્યુઆરીએ જ્યારે દંપતીને છેતરપિંડીનો અહેસાસ થયો ત્યારે તેમણે તુરંત સાયબર હેલ્પલાઇન નંબર 1930 પર જાણ કરી હતી. હાલમાં સીઆર પાર્ક પોલીસ સ્ટેશન અને સ્પેશિયલ સેલની IFSO ટીમ આ મામલે ગંભીરતાથી તપાસ કરી રહી છે.

સાવચેતીનો સંદેશ: કોઈપણ સરકારી એજન્સી કે પોલીસ વીડિયો કોલ દ્વારા ક્યારેય કોઈની ધરપકડ (Arrest) કરતી નથી કે પૈસા ટ્રાન્સફર કરવાની માંગણી કરતી નથી. આવા કોલ આવે તો ગભરાયા વગર નજીકના પોલીસ સ્ટેશનનો સંપર્ક કરો.