ચાંદીમાં આવશે તેજી: Chinaનો નવો ‘સિલ્વર પ્લાન’ ભારત સહિત દુનિયાભરમાં ભાવ ભડકાવશે!

China Silver export policy: જો તમે ચાંદીમાં રોકાણ કર્યું છે અથવા ખરીદવાનું વિચારી રહ્યા છો, તો આ સમાચાર તમારા માટે ખૂબ મહત્વના છે. વર્ષ 2026માં ચાંદીના ભાવ વર્તમાન સ્તર કરતા પણ વધુ ઝડપે વધી શકે છે. આ તેજી પાછળનું મુખ્ય કારણ આપણો પડોશી દેશ ચીન અને તેની નવી નિકાસ નીતિ (Export Policy) છે.

1 જાન્યુઆરી, 2026થી ચીનનો મોટો દાવ

દુનિયામાં ચાંદીનું બીજું સૌથી મોટું ઉત્પાદક ચીન આગામી વર્ષની શરૂઆતથી ચાંદીની નિકાસ પર કડક નિયંત્રણો લાદવા જઈ રહ્યું છે:

• નિકાસ માટે લાયસન્સ: ચીની કંપનીઓએ હવે ચાંદીની નિકાસ કરવા માટે સરકાર પાસેથી ખાસ લાયસન્સ લેવું પડશે.

• નાના નિકાસકારોની બાદબાકી: ચીન માત્ર એવી જ કંપનીઓને લાયસન્સ આપશે જે વાર્ષિક ઓછામાં ઓછું 80 ટન ચાંદીનું ઉત્પાદન કરતી હોય. આનાથી નાના નિકાસકારો બજારમાંથી બહાર થઈ જશે અને સપ્લાયમાં મોટો ઘટાડો આવશે.

માગ અને પુરવઠાનું જોખમી ગણિત

નિષ્ણાતોના મતે, ચીનના આ પગલાથી આંતરરાષ્ટ્રીય બજારમાં ચાંદીની ભારે અછત સર્જાશે:

• વૈશ્વિક અછત: વિશ્વમાં પહેલેથી જ ચાંદીની માગ અને ઉત્પાદન વચ્ચે મોટું અંતર છે.

• સપ્લાયમાં ઘટાડો: સિલ્વર એકેડેમીના અહેવાલ મુજબ, ચીનના આ નિર્ણયથી વૈશ્વિક સપ્લાયમાં વાર્ષિક 2,500 ટનથી વધુનો ઘટાડો થઈ શકે છે.

• નિયંત્રણનો ખેલ: ચીન ભલે આને ‘રાષ્ટ્રીય સંસાધનનું સંરક્ષણ’ કહેતું હોય, પરંતુ વાસ્તવમાં તે વૈશ્વિક ભાવ પર પોતાનું વર્ચસ્વ જમાવવા માંગે છે.

ભારત પર શું અસર થશે?

ભારત ચાંદીનો મોટો વપરાશકર્તા દેશ છે. જ્વેલરી ઉપરાંત સોલાર પેનલ, ઇલેક્ટ્રિક વાહનો (EV) અને ઈલેક્ટ્રોનિક્સ ક્ષેત્રે ચાંદીનો ઔદ્યોગિક વપરાશ સતત વધી રહ્યો છે.

• જો ચીન તરફથી સપ્લાય મર્યાદિત થશે, તો ભારતીય બજારમાં ચાંદીના ભાવ નવી ઐતિહાસિક સપાટી વટાવી શકે છે.

• ચીન વૈશ્વિક બજારમાં 60-70% ચાંદી સપ્લાય કરે છે, તેથી તેની કોઈ પણ નાની હિલચાલ ભારતમાં મોંઘવારી વધારી શકે છે.

આગામી સમયમાં ચાંદી માત્ર ઘરેણાં માટે જ નહીં પણ ઔદ્યોગિક જરૂરિયાત માટે પણ ‘સોના’ જેવી કિંમતી બની રહેશે.